Esayi 43 - NQAARIIT NE ROOG

O Yaal oxe soom na wataa a Isra’el

¹ Ndiiki koy, wo Yakoob, keeke o Yaal oxe sakoonga a layu. Wo Isra’el, oxe bindoonga kaa tee: «Ba o saɗar dara, yaam wataaxoong. Kaam xoyong no gon of, jegatong!

² Boo o xaañaa poofi ke, xam ref fa wo, too boo o jootaa xa quluɓ axe, ƭuudkirang muk. O xaañangaa kam fiɗel sax oo, doxkiro, too ƈulfaan ne waagankirang dara,

³ yaam mi refu o Yaal oxe Roog of, o Tedu xe Isra’el, refna o Muumucil of. Xam cooxit a Misira ta ref a bateer of, Kuus fa Seeba a softel a wo.

⁴ Ne njigand of a maginna na kid es, o jaranaam mayu soo um fexong taxu um ɓoxot wiin lakas na seek of, soo softong qeet lakas.

⁵ Ba o diid, yaam mexey fa wo. Xam nomtitiid xa taan of no batand, fokattiidong no mudand.

⁶ Xam lay o ɓemb-roog o janoon ee: ‹Cooxti a den›, soo o ɓemb-roog o ñamaak, um layin ee: ‹Ba o geek a den.› Nomtitiidyo xa ƥees xa koor na saax a koƭu ke, soo xa ƥees xa tew no cat adna.

⁷ Nomtiidyo we na nqoyooxaa gon es, fop we sakuuma, mool a den, fi a den, ndax da lalit o ndam es.»

Nuun ndefu seede es

⁸ Sutiidi xeet feene mbuulna, ke da njegna a kid fop oo, a ndam, ke da njegna nof fop oo.

⁹ Fat a saax ake fop a mbokatoor, qeet ke a njuqoor. Ndi fum no roog ke yegnitu keene, too a andnoor a in ke xew’ina yaaga? Fat a mbaaƭ seede den too a lalit ee den ƥuru. Neene, xan lakas we a nan-giloox a den soo a mboorin ee: «Ndigil kak oo.»

¹⁰ O Yaal oxe kaa tee: «Nuun ndefu seede es, ndef o tag es oxe jiluuma. Ke buguuma refu nu and, ngim too njaɓ ee mi yoo. Jegee roog fa lakas faa adooxaxama, too jegkee fa lakas faa reefanaxama.

¹¹ Mi doŋ, mi refu o Yaal oxe, too jegee o muumucil o lakas, a refangee mi.

¹² Mi layu fa nuun, mi muclu a nuun too mi yegnu a nuun fop itam. Reeƭee muk a roog fa njan faa refna a ndeer nuun. Nuun ndefu seede es boog. Keene o Yaal oxe a layu. Mi refu Roog,

¹³ refin yaaga pes sakaand. O leng waagee o wat tig no ɓay es, too ke um fi’aa, o leng supitkiran.»

A ƭat a qas ale kam a koƥ-a-ƥor ale

¹⁴ Keeke o Yaal oxe refna o baawat nuun, a ref o Tedu xe Isra’el a layu: «Took o fex a nuun, heblaam o kiin Babilon, ndax ta ɓol a kinglir ake fop. Maaga, xa ƈeel axe no Kaakalde we xan a suptoox ƭomatax.

¹⁵ Mi refu o Yaal oxe, ref o Tedu xe nuun fo o Saasak oxe Isra’el fo o maad nuun.»

¹⁶ Keeke o Yaal oxe a layu, ten oxe wet’ina a qal kam o maag ole, a sex a ƭat kam poofi cegu doole ke,

¹⁷ ten oxe inna a sareet-xire fo pis den, xiixire fo a salma-koor den, weene a yen’a junjang too inoox’atee, a ñuf ɗuƭ nen o jam soo a sooy:

¹⁸ «Ba nu mbetandooxat ke xew’ina yaaga, too ba nu topatooxat ke faafna.

¹⁹ Ndiiki koy, qas um fi’kataa, too oxe feeñiidaa. Ndax nu anddiran? Iyo, xam sex a ƭat kam a koƥ-a-ƥor ale soo suqit xa quluɓ no fo mbiñ fo mbeeru ne.

²⁰ Muumeen a koƥ ke fo xa ƥox-a-koƥ axe fo a ba ake xan a niwaam, yaam ne um balinkaa foofi kam a koƥ-a-ƥor ale soo suqit xa quluɓ no fo mbiñ fo mbeeru koroŋ ne, ndax um ci xeet fee jiluuma da yer.

²¹ Maaga, xeet feene sakuuma xan a simataxam.»

Layoor ne Roog fa Isra’el

²² O Yaal oxe kaa tee: «Wo Yakoob, ƴufginooxiraamo, nuun xeet fee Isra’el, nu nqijaniraam.

²³ Ɓoxotiidiraamo paal nen sadax toxel, too niwtiraamo sadax lakas. Seriroong o ɓoxotaam sadax tuufe-duufe, too xijlandtiroong cuuraay.

²⁴ Jikaniraamo qeeñe-xeeñe seeru, too giñnoortiraamo neebam fee no sadax cegel ke wo, ndaa kaa o ñaatlandtaam pakaad of, xijlandtaam tooñ of.

²⁵ Yaqanee koy, mi na fortaa pakaad of yaam oxe refuuma, too wetandooxkatiim tooñ of.

²⁶ Wetandooxaam ke o jambaxam, gari i layoor. Layi wo fa xoox of ke waagoonga o ci ɓur.

²⁷ O taan of oxe faqaqooroona sax a bakaada, too we na layanang a siiknoora fa mi.

²⁸ Ten taxu fudnaam kelfa ke no mbiñ o tedu nqe, xeet fee Yakoob, um ɓoxot a den, da ngefel tuƈ, soo xaƴ a Isra’el, fañ we ten a mbenan.»