Esayi 41 - NQAARIIT NE ROOG

O kiin oxe o Yaal oxe a xotnoorna a ƭat

¹ O Yaal oxe kaa tee: «Nuun we ngenna na pimb ake, naangyo cel, nan-gilooxaam. Nuun qeet ke, ƥonooryo njambaar, matiid too lay. Iyo, fat i matir, mi fa nuun, ndax i layoor.

² An suttiidu no batand oxe o cofel ole a reefanna? An ɓoxotun a saax ake, a fi maad we a nananin? Laƥ um kaa mokandaa a den boo nen fo ut, soo a qali um a yetnaa a den nen ñaax laa nqeñ a maƥna.

³ Kaa daabaa a den, a suur, too dara pirkiran, o jaf um a kosaa lanq ke soom.

⁴ An garu fo keene xewna? Ten refu oxe na xoyaa suk no wiin wuu ndefna no kaa xotitna no mberaand naa. Mi o mat oo, mi o Yaal oxe. Mi refu o eetaand oxe, too mi na refkahinaa fo we na mbalakkaa.»

⁵ We ngenna na pimb ake a nga’aan a paax too a ndiida, we ngenna no cat adna a sendaa rap-rap. Owe matiidaa, a ngaraa.

⁶ Oxuu refna kaa dimle’aa o kend um soo a layan ee: «Saƭakinooxi rek.»

⁷ O seesex oxe kaa saƭakinaa o qaaxaw oxe, soo o ƥooɓodaxin oxe a saƭakinaa o tafax oxe. Kaa layan ee: «Taƥin ne a faaxa.» Kaa rengan, ndax yo’nooxkee.

Wo Isra’el, ba o saɗar

⁸ «Wo Isra’el fee o tag es, wo Yakoob fee jiluuma, wo o tim ole Abraham fee xaariit es,

⁹ wo fee xottiiduuma no cat adna soo xoytong na xa cegel axe moƴna o liitoox, wo fee layuuma yee: ‹Wo refu o tag es. Kaam jilong too deɓiroong muk›,

¹⁰ ba o saɗar, yaam mexey fa wo. Ba o firiɓ, yaam mi refu Roog of. Kaam saƭkandang, ƴufgang soo damtang o ɓay o ñamaak es ole ɓonooxna o cofel.

¹¹ No ndigil, fop we na mbañraa fa wo xan a sed soo a njeerel. Fop we na ŋaalooraa fa wo xan a saŋkoox soo a mooc.

¹² Xan o waaƭaa we ndeeƭna fañ of, too ga’kiro a den. We nqire’oogna fa wo xan a mooc, a kasaara’oox,

¹³ yaam mi o Yaal oxe Roog of, mi na damang no ɓay o ñamaak, layang ee: ‹Ba o saɗar dara, yaam mexe ƴufgiidang.› »

¹⁴ O Yaal oxe kaa tee: «Ba o saɗar dara, wo Yakoob fee na xalaataa yee refiro tus, wo yoqatin fooreer le Isra’el, yaam mi na ƴufgang, mi o Tedu xe Isra’el na watkang.

¹⁵ Xam fi’ong njelem ngaaƈir mbeelu nqas pul naa mayna a bej. Xan o ɓaƈit xa coong axe, mokand a den, a ñaang ake, o duguñ a den da nandat fo ñaax.

¹⁶ Xan o fees a den, nqeñ ne a maƥ a den, a und ale a pasar a den. Wo o mat, xan o felakinoox no Yaal oxe, fakoorit o Tedu xe Isra’el.»

A koƥ-a-ƥor ale suptooxna

¹⁷ «Rool we fo toroxu we owe mbaaƭaa foofi, ndaa nga’ee o ndoq. Ɗelem den kaa weerat koroŋ yaam a koɗom, ndaa mi o Yaal oxe, xam jaaɓ a den, mi Roog fee Isra’el, waaskiim a den.

¹⁸ Xam suqit xa quluɓ took a ƈoong ake naangna hundang, balin a cur ndeer a qooɗ ake. Xam fi peel a may na koƥ-a-ƥor ale, soo a cur foofi yee gañ no lanq beeru ke.

¹⁹ Xam saxin kam a koƥ-a-ƥor ale taxar seedar fo saas fo fo mbafid mirti fo taxar oliiw, soo no tan ole, um jimb teen pilaawo fo nar fo quƭ.

²⁰ Neene, xan fop a nga, a and, a ngoroox soo a njaɓ ee o ɓay no Yaal oxe fi’u keene, o Tedu xe Isra’el sakun.»

O Yaal oxe xe naƥnooxaa pangool ke

²¹ O Yaal oxe kaa tee: «Layyo ke nu ndaawreena.» O Maad oxe Yakoob kaa tee: «Lalityo ke nu nqeteena.

²² Matiidyo too yegin a in padafuleer. Layyo a in ke xew’ina no mberaand naa, too xan i ƭeetlooxan a paax, ndax i and muj fee mbaat boog nu lay a in ke na xewkaa.

²³ Yegnityo ke na garaa, too yaaga xan i and ee roog nu ndefu. Mbi’yo rek paax mbaat paaxeer, ndax i mboor a kid, nga’andoorin.

²⁴ Kaa koy, nuun, nu ndefee tus. Ke nu mbi’aa xa koɓong oo, too o jil a nuun cednooxu yoo.

²⁵ Intaam o koor no ɓemb-roog o janoon, too oxey garaa. Gon um le ne’eel no batand. Kaa duutaa maad we ne lopopooƈ a nootteel mbaat ne o maamax qaw a duuttaa ƭok um.

²⁶ An yegnitu boog keene xewna yaaga xewafulee, ndax i andin? An yegnit’un yaaga, ndax i mbaag o lay ee: ‹A ɓura.› A woora yee o leng na nuun yegnit’iran, o leng nanee nu layaa tig.

²⁷ Mi refu oxe eetna o yegnit Siyoŋ ee: ‹Nga’yo, owey a ngaraa›, oxe na ɓisiidaa o nan o felu le, um lulin Yeerusaleem

²⁸ Ɗeetaam boo xij, too ga’iim o leng na den oxaa waagna o lay teen tig, boo um laamtin, ta doonaam.

²⁹ No ndigil, den fop ndefee tus, too a pi den xa koɓong oo. Xa taaƴ axe den nqeñ ƥor fo xa koɓong a ndefu.»