Esayi 40 - NQAARIIT NE ROOG

A YAAL ALE ISRA’EL ( 40—55 ) Yegnit ne na bat ale na xeet fee no Yaal oxe

¹ Roog nuun kaa lay ee: «Yaalyo xeet es, kaam ee nu yaal xeet es!

² Ƥutandyo kam Yeerusaleem, yegneenoo yee coono um a naaga tak, ta waasanel tooñ um, yaam a daawta no ɓay no Yaal oxe ndabid pakaad um boo a caf a ƭak.»

³ O ñuxur oley falalooxaa yee: «Sexanyo o Yaal oxe a ƭat kam a koƥ-a-ƥor ale, ngoltan a Roog in a qal no tan ole.

⁴ Fat a quuxur aluu refna a uupel, o joong oluu refna fo ñaang luu refna a girdel, a yilɓit ake a mbodrandel, soo a qalnqaluuƈ ake a mbatnel.

⁵ O ndam onqe no Yaal oxe xan a feeñ, too o kiin oo kiin xan a ga’in. Neene a refkaa, yaam no don no Yaal oxe a hatu.»

⁶ O ñuxur oley layaa yee: «Yegniti!» Um doon ee: «Xar um yegnitkaa?» «Cer kuu ndefna kaa nand nen daaƭ, o mosel um fop a ref nen piɗ daaƭ.

⁷ Daaƭ le xan a weer, piɗ ke a ƥooroox, yaa haaƭ le no Yaal oxe a wuuɗna took den. Ndigil kak oo, xeet fee daaƭ a refu.

⁸ Daaƭ le xan a weer, piɗ ke a ƥooroox, ndaa fa lay fee Roog in xan a ref boo faw.»

O nan o felu le wareena o daawnit

⁹ Ŋaayi took o joong o jiig, wo Siyoŋ fee na yegnitiidaa yegil mbaax ne. Kaam ee fat o ñuxur of a jib took, wo Yeerusaleem fee na ɓisiidaa o nan o felu le. Jibneen, too ba o saɗar dara. Layi teeru ke Yudaa yee: «Roog nuun oxey!»

¹⁰ O Yaal oxe na refkaa boo faw oxey a garaa, a yoon fa katil, too xan o ɓay um a maadoox. Xan a yoontiid tabid um, soo ke ta jalna a adooxanin.

¹¹ Xan a gay ged le ten ne o kaynaak a gaytaa ged um. Xan a korolit paal ke o ɓay um, a deegoox fo mbaal ne, soo a ɗox paal ƥasil ke.»

O magnel ole fo o and ole Roog

¹² An eedtu poofi ke no maag ole daŋ o ɓay um? An liiƥtu a asamaan fee o ɓay um? An nugu na saxal um fo ut ole no lanq ke? An eedtu xa coong axe fo a ñaang ake a poox um?

¹³ An andu ne Yiif le no Yaal oxe a fodna? An waagu o ref o aa-as um mbaat o caajangin um?

¹⁴ Fa an a ga’ritu, ndax ta xooliɗ? An aqatinun a ƭat o cofel? An jangnun o and soo a andnoorin a ƭat o jeg-yiif?

¹⁵ A saax ake kaa ndef nen o toq foofi laa na samtaa na saxal mbaat nen mbep lanq kam eedir. A pimb ake moƴee o meɗ o ut onqaa na yetaa.

¹⁶ Taxar ke Libaŋ sax ndeykee fiɗel fa ndoxir sadax, too cegel ke ten ndeykee o Yaal oxe sadax.

¹⁷ A saax ake fop ndefee tus mbaambir um. Kaa ɗeetaa a den nen cegeer fo nen a ƥay.

Roog jegee o nand

¹⁸ An nu mbugu o nandandit a Roog? Nitaal num nu mbugun o ndendandit?

¹⁹ O daaƴ oluu ga’oona o kiin o baane’u rek jawun, soo o qaaxaw a soobtin wurus, a mosandtin ceen xaaliis.

²⁰ Oxe roolna koy, boo waagee o jeg nandu neene, kaa waaƭaa o ɗeg a qanq olaa max ke mbaaganeerna dara, soo a ɗeet o kiin o baane’u xaa waaguuna o sexan o ten o daaƴ olaa na saƭikkaa koŋ.

²¹ Ndax kaa nu andiran? Ndax kaa nu naniran? Ndax nu miñaand o yegnaa o ten no mberaand naa boo ndiik? Ndax kaa nu andee and ne adna a feroorna?

²² Uum-maamaad le no Yaal oxe oxey took-ee-took, a yooroox lanq ke, too we ngenna a lanq kaa ndef no ten nen soƈ. Kaa letin asamaan fee nen sooy yelefu, a letnin nen ƭiif, ndax ta genel.

²³ O ten na fudnaa gelwaar we boo ndefkatee tus, soo yaal sañ-sañ ke, ta maaf a den boo ndefkatee dara.

²⁴ Kaa sogeel o njimb, a sogeel o nduuf, a paƴ den a ndet boo a ndamlooxaa, soo ta wuuɗ took den, da mbeer koroŋ, a und a maƥ a den nen ñaax.

²⁵ O Tedu xe kaa tee: «An nu nandanditkaxam boog? Ndi an fodu fa mi?

²⁶ Yoɗyo a kid nuun took too ƭeet! An saku kene fop? Ten refu oxe na fokataa a den ne da mbodeena fop. Kaa xoyaa a den fop, oxuu refna ta taar no gon um na pexey sañ-sañ um fa maak fa doole um fa njegu katil. Jegee o leng na den oxaa ta weecna.»

Doole fa nqas no xe na heesaa

²⁷ «Nuun we xa taan Yakoob, xar taxu nu layaa, kaam ee wo Isra’el, xar taxu o jeepeetaa yee: ‹O Yaal oxe ga’ee ke na daliidaxam, Roog es ga’ee ke refna wargal es›?

²⁸ Ndax kaa andino? Ndax kaa nanino? O Yaal oxe refu Roog bo na moos boo moos. O ten saku adna fee, a xotit no cat boo no cat. Naagee o xijaa, too doole um wañooxkee muk. O leng waagee paang o jeg-yiif um fop.

²⁹ Kaa ci’aa doole oxe xijna, a moƴ o saƭakinaa oxe ñakna doole.

³⁰ Mbes ke kaa nqijaa, a ñakaa doole, xir say we sax kaa tolofaa leek-leek,

³¹ ndaa we yaakaarna o Yaal oxe kaa ndaawaa doole fa nqas. Kaa yetaa nen a canjiik, a ƈufaa, too nqijkee, a ñaaƴaa, too ñakkee doole.»