Esayi 39 - NQAARIIT NE ROOG

Hiskiya a dalna waa lultiid’eena Babilon

¹ Na jamaane faaga, Merodak-Baladan fee o maad oxe Babilon, a ref o ƥiy Baladan, a lulta a Hiskiya xa leetar fo a ƭeeteer, yaam a yeg ee kaa jir’u boo a wodat.

² Hiskiya a dalna waa luliid’eena, soo a lal a den o mbiñ onqe tikoorik cegu njiriiñ ke ndefna xaaliis fee fa wurus fee fo pelu tuñ ke fa diwliin fa njafeñu fee a ngeek’eena. A lala a den itam ngeekand ne no ƥonax ke ten fo ke reeƭna no tap ke ten fop. Ɗasin’ee a den dara, ta ref no mbind um mbaat no maat um boo ta xet.

³ Cinj kaaga, o tuleer Esayi a soƥiida o maad Hiskiya, a laamtin ee: «Xar refu o jaf no goor weene, too sax mam a inooru?» Hiskiya a doonaan ee: «Taa Babilon a inooru, a ƭeetiidaam.»

⁴ Esayi a doona teen ee: «Xar a nga’u kam mbind of koy?» Hiskiya a doonaan ee: «A nga’a fop ke refna teen, ɗasniim a den dara na halal es.»

⁵ Maaga, Esayi a laya a Hiskiya yee: «Nan-gilooxi ke o Yaal oxe Hupna fop a layna:

⁶ ‹Ga’angi, ñaal key a ngaraa kaa ke refna no mbind of fop fo ke daan of a ngeerna teen fop, a ɓiskeel Babilon. Dara yoqkee teen. Keene o Yaal oxe a layu.

⁷ Xan leng-leng na xa taan of ŋaƈit sax a ƥisel, a njalanaa o maad oxe Babilon kam mbind no maad ne ten.› »

⁸ Hiskiya a doona a Esayi yee: «Fa lay fee no Yaal oxe yegnaxamoona a faaxa lool», took a xalaataa yee: «Feek mexe ñoowaa, xan i ndef na jam fo no yaadax.»