Esayi 31 - NQAARIIT NE ROOG

Miimisira we wiin soom a ndefu

¹ Sabab took no we na ƈufanaa Misira, ndax da ƈufginook maaga, a ngaɗ mbir den no pis soo a ngooloox a sareet-xire ke yaam o mayel den fo ŋaaŋaay say we, yaam ne da njegna doole, a mbañ o mbiƈaqiloox o Tedu xe Isra’el, mbaaƭee o Yaal oxe.

² Ten itam o yaal-o-and oo, too a waaga o ɓisiid taamaala. Fa lay um watkee muk. Xan a inooxan mbind ne no soxodu we fo we na ƈufgaa jofaƭaru we.

³ Miimisira we wiin doŋ a ndefu, ndefee Roog. Pis ke den njer rek a ndefu, ndefee yiif. Yaa o Yaal oxe a yoɗkaa o ɓay um, oxe na ƴufgaa xan a tolof, oxe na ƴufgeel a yen, too den ɗik fop xan a saŋkoox.

O Yaal oxe na xoxtaa a Yeerusaleem

⁴ Keeke o Yaal oxe a layaxam: «Ne njogoy mbaat o njogoy o njanglax a ŋuurtaa, ndax ta xoxit mbuufuɗag um na yaj no gaynaak waa inooxanuuna too naagee o diidaa xa buuq axe den, mbaat ta firiɓ yaam fangax le den, neene a refitkaa na mi fee o Yaal oxe Hupna fop, yaa um fudooxkaa took o joong ole Siyoŋ fo took ƴoong le ten, ndax um xire’it maaga.»

⁵ Ne ndiiƭ a letnitaa a nafir um, yaa ta yetaa, neene o Yaal oxe Hupna fop a letnitkaa a saytax um took Yeerusaleem. Xan a saytooxin soo a watin. Xan a wuusin soo a muclin.

⁶ Nuun Ii-isra’el we, nomtooxiidyo me no xe nu mbes’ina a cinj tigi.

⁷ A koom, xan nu ndeɓ pangool ke nuun mbi’teena xaaliis fo ke mbi’teena wurus, too xa ƥay nuun a njal’u a den, da mbakaadnooroogu a nuun.

⁸ Xan laƥ a maaf a Asuur, too refkee laƥ no koor. Laƥ ne na fandkan refee laƥ no kiin. Aa-asuur we xan a ngod o joor mbaambir laƥ neene, soo mbes ke den a ndefik faɗ.

⁹ Oxe refna ɓil den xan a god o joor yaam diid, soo aa-adax we no xiixire we ten a ndiƈatoox a laay a anddiloor ale den. Keene o Yaal oxe a layu, ten oxe fiɗel um a refna kam Siyoŋ, soo ndoxand um a ref Yeerusaleem.