Esayi 30 - NQAARIIT NE ROOG

A ñaaƈnooƭ ale Roog a bugeerna

¹ O Yaal oxe kaa tee: «Sabab took xa ƥiy axe nananeerna! Kaa da yuuɓaa too mbokatkiraam teen soo a ndalnaa kiɓoor kaa njagooreerna fo Yiif es. Neene, kaa da cokrandaa bakaad took fa ngend um.

² Kaa ndetaa Misira, ndax da njaɓnook maa Firawon fee, a laqook no yook ne Misira, too asooxiraam.

³ Njaɓnooxand nuun me Firawon fee xan a hod a nuun, laqooxand ne no yook ne Misira a sednoor a nuun.

⁴ A soƥangaa sax ee kelfa ke nuun kaa mbadiid Cowaan boo a ƈut, soo we nu lulna a ndok Xanes,

⁵ fop xan a sed yaam xeet faa jeganeerna a den o njiriiñ. Xeet feene ƴufigkee a den mbaat ta dimle a den, ndaa xan a sednoor a den soo a wennoor a den.»

We na njikkaa o ndimle nqe Misira

⁶ «Ke na dalkaa muumeen ke na koƥ-a-ƥor ale no ɓemb-roog o ñamaak: Kaa da nqaañaa saax le no coono ke fo naqad ke, me cogoy tew fo koor a ñoowaa fo a sax fa Niŋki-naŋka fee na yetaa, a suf na xa paam kalal den, soo paax ke da njegna, da sufin no keeleemb, a ƥisin xeet faa jeganeerna a den o njiriiñ o leng.

⁷ Ƈufig ne Misira xa koɓong fo kasaara doŋ a refu. Ten taxu um xoyan ee: ‹O soosong oxe macarna.› »

Xeet fa nanaƭaru fee xan a xawel

⁸ O Yaal oxe a laya a Esayi yee: «Ndiiki koy, bindi keene na alfa mbaambir den, bindin itam no safe, ndax ta ref seede faa na refkaa boo faw no camaane ke na ngaraa.

⁹ No ndigil, xeet fa nanaƭaranu yoo, a ndef xa ƥiy xa maamaaɓ, xa ƥiy axaa mbugeerna o nan-giloox a cangin ale no Yaal oxe.

¹⁰ Kaa da layaa ɗeet we yee: ‹Nu njaree o njegaa peeñax!›, a lay duleer we yee: ‹Ba nu yegin a in ndigil ne. Ke moƴanna a in, refu i layeel pelu soo yegneel kaa guutatirna fo ndigil ne.

¹¹ Ƭapyo a qal ale soo nquruloox a ƭat ale. Ba nu ne’at o Tedu xe Isra’el mbaambir in!› »

A koolax a caaxaan

¹² Ten taxu keeke o Tedu xe Isra’el a layu: «Feek kaa nu nqeef fa lay feene, ndoon a koolax nuun no naanaxir ƥor fo na xa maaƥ, mbi a den ndamlooxand nuun,

¹³ tooñ neene xan a ref na nuun nen o quuy o feeñu no saŋe njiig. Oxaa joyaa rek, ee junjang ndak fo ndak.

¹⁴ Xan a mok rip nen mbokin no maamax naa gefeena, a fañel o yirim, boo jegatee no kefatin ke sax o mbaambaar onqaa waageena o gefit fiɗel no keƥandan mbaat ta xaftel o mboofi no mband.»

A koolax a booru

¹⁵ Keeke o Yaal oxe na refkaa boo faw, a ref o Tedu xe Isra’el a layu: «Yaa nu nomtooxiidna me mi too mbod o mbid doŋ, nu muckaa, too o ɓuuɓ fo a koolax na ndefkaa doole nuun, ndaa nu mbugiran.

¹⁶ Kaa nu lay ee: ‹Ha’aa, xan i ŋaay pis, ƈufin ndet!› Ten taxu xan nu ŋaay pis, ƈufin ndet, ndax nu ngod o joor. Kaa nu layaa yee: ‹Kaa i mbug o ŋaay pis ƈuuƴuf say.› Ten taxu raarax nuun xan a ndef ƴuuƴuf say.

¹⁷ Xan juni na nuun a ngod o joor yaam o leng kut oxaa na diirooxanaa a den, too xan ɓetuk rek a ndaxaa a nuun, nuun fop boo yaa nu ndefkataa nen a maaw a keenne no jul o joong, nen a teex a lupe took ñaang.»

Jamaane fee na muc ale

¹⁸ Yaag oo toox de, o Yaal oxe kaa cungaa, ndax ta yirim a nuun. Neene, xan a inoox, a jeg o liir na nuun, yaam o Yaal oxe Roog fa njofu a refu. Fop we yaakaaruuna a ƭaaya.

¹⁹ Wo xeet fee Siyoŋ, wo fee na ñoowaa Yeerusaleem, loolkatiro boo muk. A mbanuu ƴufginooxoona o Yaal oxe, xan a yirmong, ten fa naneerong yaqanu ta jaaɓong.

²⁰ O Yaal oxe xan a ci a nuun ñaamel kam naqad fee fo foofi kam coono fee. Oxe na aqatinang goƭkatirang muk, ndaa a kid of xan a naang jak fo ten.

²¹ Nof of xan a nanit fa lay feeke a cinj of: ‹A ƭat ale ley, ñaaƴyo teen›, ta ref yaa o ɗapaa na ñamaak mbaat na janoon.

²² Xan o ɗeet nen qoolaƭaru xaaliis fee muurna nitaal sexe ke wo fa wurus fee xa taaƴ xa cawe xe wo a soobteena. Xan o ɓax a den nen ƭaaq, lay a den ee: ‹Acayo tafil!›

²³ Maaga, xan Roog a deɓ took ax ke o ɓaxkaa no lanq ke, too ñaamel ke lanq ke a mbatkaa xan a mbaax soo a mbel. A koom, xan xa siir axe wo a suufik kam xa suufand xa yaaju.

²⁴ Qoox ke fo xa paam axe na njalteel na xa qol axe xan a ñaamaa boob xanju laa da pictandteena a caangir fo o furset.

²⁵ No ñaal naa na bar a ƭomu le, yaa taax-took ke a njiƭtooxkaa, xan a jeg a qayaandiin fo a ƈufnand foofi took o joong o jigdu luu refna fo took ñaang jiig luu refna.

²⁶ A qoolaand ale na qoor ale xan a nandat fo ale no njeeƈ ne, soo ale no njeeƈ ne a ɓaatoox a caf ɓetaa ƭaq boo nen a qoolaand ñaal ɓetuu ƭik, a koom alaa o Yaal oxe a laxaskaa kaañax ke na xeet um soo a wodand a uut ake na pad ake ta fadeena.

O Yaal oxe xey garaa, ndax ta yar a Asuur

²⁷ O Yaal oxe fa xoox um oxey garaa, a inoortiid koƭu, fuux um a raaɓaa, a nandtaa o dox o maak. Kaa fuɗɗaa fo fuux, soo fa lay um a ref fiɗel laa na raaɓaa.

²⁸ Haaƭ um kaa nandtaa a qayaandiin alaa balna boo a gar o kiin no cok. Kaa taaraariidaa a saax ake fo taaraar taamaala ne, soo a rok qeet ke a laxaaɓ, ndax ta mo’and a den.

²⁹ Xan nu nqaanaa nen o yeng olaa xew a roofandteel. Xan nu njeg o ɗaay na qeeñ nuun nen we na ñaaƴaa no fangax a liit, ndax da ndet no joong olaa no Yaal oxe, farna fo ɓil le Isra’el.

³⁰ O Yaal oxe xan a jibin o ñuxur o jegu o ndam ole ten. Xan a lalit o ɓay um ole na fudooxiidaa kam fuux maak le ten fo kam aal fiɗel laa na raaɓaa fo kam mbuyaam njegu doole fo kam a und a maak fo kam a kalam a ƥuuɓu.

³¹ Maaga, xan Asuur a diid yaam o ñuxur no Yaal oxe na xawitkan o cap um.

³² O loq oluu ta ɗaayaneena, too o Yaal oxe a fadkan o ten, a ñal ake fo fo nqilimb ne xan a mbangoox. O Yaal oxe xan a xire fo ten, a yoɗanin o ɓay um.

³³ Tofet a jagande yaaga. O maad oxe a jagandane itam. Kaa yaaj soo a xooɗ, soo xa saangaan ee gañ teen fo xa cuuƭ xa pagkatar. O Yaal oxe xan a damnitin haaƭ um nen a ƈufnand fiɗel.