Esayi 3 - NQAARIIT NE ROOG

A nootax ale no maat ne Yudaa

¹ Nga’yo, o Yaal oxe na refkaa boo faw Hupna fop xan a suqit na Yeerusaleem fa Yudaa o ndimle fo ndamlooxand nuu ta waagna o ref. Xan a jaɓ ñaamel den fo foofi den fop

² fo a salma-koor ake fo xiixire we fo haahate we fo duleer we fo ɗeet we fo maak we

³ fo aa-adax no xiixire we fo kelfa ke fo aa-as we fo waane’u we fo ñaañango we.

⁴ Xam coox a den xa caaƈ xa tutuuñ da kelfa a den soo a maadooxaa took den nuu da mbugitna.

⁵ Xeet fee xan a ñagadilraa, oxuu refna a ñotombilaa o kend um. Teɓandoong ke xan a inooxan maak we, soo fo mboƭomsogor ne a inooxan we niweena tigi.

⁶ Maaga, xan o koor a pok oxaa ta fogitna mbind faap, a layin ee: «Jegaa sabadoor, refi o aa-adax in boog, gadoox kefatin kene.»

⁷ A koom koy, xan o lakas oxe a doonin ee: «Mi kañ, refkiim o baawaadin nuun. Jegiim no mbind es ñaamel mbaat toki. Ba nu ndodaam o aa-adax xeet fee muk!»

⁸ Yeerusaleem oxe gefaa tuƈ, soo Yudaa a naag junjang a lanq, yaam xa ƭelem den fo a pi den kaa njuumoor fo o Yaal oxe, da mbañ o magnel ole no ndam onqe ten.

⁹ A tagid den na laltaa jiko fa mbaaxeer den. Kaa lambnaa bakaad den nen wiin we Sodoom too ƭasnee teen dara. Ndaw naqad took den, yaam kaa oranaa a qoox den o njakad.

¹⁰ Layyo o cofu xe yee a ɗaaya, yaam xan calel um a ndef muud um.

¹¹ Kaa koy, ndaw naqad took no soxodu xe, yaam xan a rabdel a pi um.

¹² Raarawnit we na ñagadilaa xeet es, soo we na sertaa o lad a maadooxaa took den. Wo xeet es, ɗooɗox of kaa mo’andang soo a nqotnoorang a ƭat a paaxeer ale.

Layoor ne no Yaal oxe fo aa-adax we

¹³ O Yaal oxe kaa layooriidel, a geenoox no hate xeet um.

¹⁴ A refa no hate’aa maak we fo kelfa ke na xeet um ee: «Nuun o mat mbiitnu a ƭing taxar biiñ ale, ngeer no pind nuun ke nu njaɓitna no rool we.

¹⁵ An ci’u a nuun nu nduguñaa xeet es soo nduutaa toroxu we? Mi o Yaal oxe na refkaa boo faw Hupna fop layu keene.»

Rew mosu we Yeerusaleem

¹⁶ O Yaal oxe kaa tee: «Feek xa ƥiy xa tew axe Siyoŋ kaa nga’atinoox, a ñaaƴtaa jad o cok soo a ƭeettaa nga’yaamoo, a seŋeƈaa soo a mbangnaa a ƈang-a-caf den,

¹⁷ xam ƴaarin ƭuf den soo meelin a tagid den.»

¹⁸ A koom, xan o Yaal oxe a suqit na den fop ke da mosandoortaa: a ƈang-a-caf ake fo paal-xoox ke fo kumooxel ke saxitna nen o nqool o ndeɓ

¹⁹ fo xa loŋ-loŋ axe fo xa ƈang axe fo xa libidoor axe

²⁰ fo a ƈang-xoox ake fo ñang ke fo xa qap axe fo fo ndog qeeñe-xeeñe ke fo xa nombo xe

²¹ fo xa keɗ axe fo xa keɗ-o-ñis axe

²² fo toki ñaaƴir ke fo toki maak ke fo kaala ke fo fo ngalpe ne

²³ fo xa ƭeendoor axe fo toki yelefu ke fo tañalax ke fo a muxul a yelefu ke.

²⁴ Qeeñe-xeeñe pelu ke xan a nqooñataa potu, o qap a refat o ƥaak, maar mosu ke a nduusel a ƥula, ñirax mosu ke a ndefat toki ñaawoor, soo o mosel a refat gaci.

Ñaaw we Yeerusaleem

²⁵ Wo Yeerusaleem, xan laƥ a ñaam goor we wo, xir say we wo a nqonit na ñoq ale.

²⁶ Maaga, teeru fee fop xan a ndef na coytax fo na ƭomatax nen o tew oxaa ñakna fop soo a moof a lanq.