Esayi 28 - NQAARIIT NE ROOG

KE YEGNITEENA NA ISRA’EL FA YUDAA ( 28—35 ) Nqeñ yaayaq ne took Samari

¹ Sabab took teeru fee refna o ndip o nga’atinoor onqe no yeeyer say we Efrayim, a ref mbiɗ leeƥu ne o mosel um a jegeerna sen, a fod took a yulanq a caɓu taxar ale no we a yer biiñ a adinna.

² O Yaal oxe xey a hebliidaa o koor o cegu doole too a jambaar, a nandtaa a teƥ a kalam a ƥuuɓu, a und a yaayaq, mbuyaam njegu doole naa na ɓaxooxaa nen o jaɓ, a maafaa junjang a lanq fop.

³ O ndip o nga’atinoor onqe no yeeyer say we Efrayim xan a duutel,

⁴ soo mbiɗ leeƥu ne o mosel um a fodna took a yulanq a caɓu taxar ale a ref nen o jala laa foorateelna. No ɓay no xuu ta eetna, xan a ɗuudin ndak fo ndak.

⁵ A koom, o Yaal oxe Hupna fop xan a ref o ndip o njegu o ndam fo a ƈang a mosu no yoqatin we na xeet um.

⁶ Xan a ref yiif o cofel no xe na ɗegaa hate no xeloorand ole fa doole no we na nomtaa song le no pañ oxe no ndokand ne na teeru fee.

Ke layeena no duleer maamaaɓ we

⁷ Den wene itam kaa njayang-njayangnaa yaam biiñ, soo a yer a qaaɗu xut ake a ngulmandaa a den: Saasadax we fo duleer Roog we kaa tifil-tifilnaa yaam a yer a qaaɗu ke, a njaxasoox yaam biiñ fee. A yer a qaaɗu ke kaa ngulmandaa a den, da tiipaa, yaa da njo’tanaa a Roog soo a layaa xa ƥaral, yaa da ngate’aa.

⁸ A taabul ake den kaa muurooxat fo basil ke den, too ndoƭ ke den owey muu refna.

⁹ Kaa da laamtaa yee: «Ndi an Esayi a aqatinaa o and? An a xooldandaa a cangin ale? A toɓtatin akaa na sogaa mbaas ƭeen a aqatinaa.

¹⁰ Nan-gilooxyo: kebil took kebil, kebil took kebil, bargal took bargal, bargal took bargal, o ndik mene, o ndik maana.»

¹¹ A woora yee fo o don no we na ndo’aa fo na fa lak fa njan o Yaal oxe a bugko laytataa fa xeet fene.

¹² Yaag oo toox de, a lay’a a den ee: «A ñootnax ale xey, nqaƴyo oxe xijna ta ñootnoox! O ɓutnooxand ole xey!» Kaa koy, mbug’ee o nan-giloox.

¹³ Xan fa lay fee no Yaal oxe a ref na den boog kebil took kebil, kebil took kebil, bargal took bargal, bargal took bargal, o ndik mene, o ndik maana. Ten taxu xan a lupaa xoox, yaa da ñaaƴaa soo a mbeñexoox, a mbogel soo a ndamel.

Ɓil le jaƭna kooñ ne

¹⁴ Ten taxu, nan-gilooxyo fa lay fee no Yaal oxe, nuun xaaxaadnax we, nuun ɗooɗox we na xeet fene ngenna Yeerusaleem.

¹⁵ Kaa nu layaa yee: «I ndalna ngiɓoor fa fa nqon fee, njeg nanoor fa jaaniif. Taamaala fee a bug oo biltoox, daawkee a in, yaam o maaɓ ole refu ndaɗand in, soo naanaxir ke a ref laqooxand in.»

¹⁶ Ten taxu, keeke o Yaal oxe na refkaa boo faw a layu: «Mexey doonaa kam Siyoŋ ɓil fer laa ɗeetlooxeena, ɓil jafeñu laa jaƭna kooñ ne, a saƭik fer. Oxuu hoolooxuuna, xan a saƭik.

¹⁷ Xan a ƭat a ref o ƥaak o liiƥir es, soo o cofel ole a ref o ƥaak o fodrandir es.» A kalam a ƥuuɓu ke xan a yaq ndaɗand maamaaɓ ne, soo poofi ke a maƥ laqooxand naanaxir ne.

¹⁸ Ngiɓoor ne nuun fa fa nqon fee xan a ɗegel, too nanoor ne nuun fa jaaniif saƭikkee. Yaa taamaala fee a biltooxkaa, xan a duut a nuun.

¹⁹ A mbanuu ta garna rek, xan a maƥ a nuun, yaam xan a garaa nqes nuu refna, ñaal fo o yeng. Yaa a cangin aleene a xoolkaa a nuun, xan nu ndiid.

²⁰ Njong ne xan a raƥ lool, ndax ta letnooxel, too pay ngulooxel ne xan a neew lool, ndax ta muurooxel.

²¹ Nen no joong olaa Perasiim, o Yaal oxe xan a inoox, nen kam a yulanq alaa Gibe’on, xan a fuux, a fadin a pi um, a pi um a andaande, soo a fi calel um, calel um com’andtu.

²² Ndiiki boog, mbaasyo o nqaadnax onqe nuun, ndik ceen ke nu ngumteena a moƴel o nqiisin, yaam yaq fee no saax le fop a fosooxe boo a ƴut. Nantaanum no Yaal oxe na refkaa boo faw Hupna fop.

O and ole no qooxoox oxe

²³ Mbetyo nof nuun, nan-giloox o ñuxur es. Naangyo tek, too nan-giloox fa lay es!

²⁴ Oxe na guuraa ndax ta duuf, ndax na kuur a genkaa? Ndax xan a seeƭaa, a jiqtaa o saawit um kili?

²⁵ Mee ndax a fodrandangaa lanq ke boo a ƴut, kaa duufaa pooƭ ke, a suuy kaane fee, aareer ke, ta yasin da mbi a cur, ɓasi fee fa maalo fee, ta duuf a den no fo mbiñ ne da njegeena, soo fasaaƥ le ta farnin na xa lak axe.

²⁶ Roog um kaa aqatin ne ta waruuna o fi’it, a jangnin o ten.

²⁷ Aareer sugkaand, too ngaane gaaƈkaand, ndaa aareer o logdaand a bacteel, soo ngaane a gisteel o ɓay.

²⁸ Mbooƭ a ƥees a sugteel, ndaa a jega hap, a soxteel a tom, ndaa refee boo yaa ta raƈtooxna.

²⁹ Keene itam no Yaal oxe Hupna fop a inooru. O as um kaa jom’andit, soo o and um a xooɗ.