Esayi 27 - NQAARIIT NE ROOG

Niŋki-naŋka fee no maag ole a maafe

¹ A koom, xan o Yaal oxe a xot laƥ maak mbeelu njegu doole ne ten, a xaw a Lewiyatan, mbangool ne na ƴufaa too a xuyaa, a war a Niŋki-naŋka feene kam o maag ole.

O Yaal oxe fo a ƭing taxar biiñ ale ten

² A koom, nqaananyo a ƭing taxar biiñ ale na biiñ fa mbelu fee.

³ Mi o Yaal oxe na yetooxan. Kaam sooran na waxtu fuu refna, yetooxan ñaal fo o yeng, ndax dara yaqkiran.

⁴ Fuuxanatinum, ndaa um soƥangaa teen tomb fo takar-ñiig, xam dal took den, dox a den bee riw.

⁵ Kaa koy, oxuu fi’axama ndaɗand, xan a reer fa mi jam, kaam ee xan i njamoor.

A baasan ale Isra’el

⁶ Na pe ake na ngaraa, xan xa taan axe Yakoob a yaadoox, Isra’el a neep bo soo a fiɗ, xa tim um ee gañ kam adna fee.

⁷ Ndax o Yaal oxe a xawta a den ne ta xawit’ina we nqawoogna a den? Ndax a warnoora a den ne ta warnoorit’ina we mbarnoor’ina a den?

⁸ Ha’aa, ndaa a raxa a den, a sut a den saax le. Neene a xawtu a den. A koom alaa fo a und ale no batand, a raxta a den haaƭ jegu doole le ten.

⁹ Keene na refkaa a bateer tooñ ne Yakoob, too keeke a baasan tooñ um a rimkaa: A ƥil ake na xa sadaxand axe fop xan a mokandel, ne jaagal a moxoñteel, too a teex a lupe ke Asera fo toxir qeeñe-xeeñe ke ngeenooxatinkee muk.

Teeru fee waaseena pelek

¹⁰ Teeru fa njegu doole fee a wootata, a refat ngenand nqaƴe, a waasel nen a koƥ-a-ƥor. Xa qeel axe teen a suufaa, a kooraa teen soo a mbiitnaa fo mbafid ne.

¹¹ Yaa a naaq ake a mbeerkaa, xan a ƥolel, rew we a ngar, a umbik a den. Ii, xeet feene njegee yiif. Ten taxu oxe sakuuna jegee o liir no ten, oxe mooluuna yirmiran.

A nomtax a maak ale no we pasaroox’ina

¹² A koom, xan o Yaal oxe a bac xa yaƥ axe, no kaa xotitna no xuluɓ ole Ofrat boo na ƈufnand alaa Misira, soo nuun Ii-isra’el we, nu ngiseel o leng o leng.

¹³ A koom, xan a luuƥ a maak ale a jib, soo we mo’’ina kam saax laa Asuur fo we pasaroox’ina no saax laa Misira a nomtooxiid. Xan a ngung mbaambir no Yaal oxe took o joong o tedu le kam Yeerusaleem.