Esayi 26 - NQAARIIT NE ROOG

A kim ale na teeru fa saƭku koŋ fee

¹ A koom xan a kim aleeke a gimel kam saax le Yudaa: «I njega teeru fa saƭku koŋ. O Yaal oxe a sipana a in a muc ale, ta ref tabax fo saŋe mbooru in.

² Mbetyo xa ton-maax axe, ndax xeet fa njofu fee a rokiid, ten fee damooxna no ngor um.

³ Oxe gid a ƭakeerna kaa o woornan jam fee. Ii, kaa o woornan jam fee, yaam kaa hoolooxong.

⁴ Ngoolooxyo o Yaal oxe boo kili, yaam o Yaal oxe refu ɓil le na refkaa boo faw.

⁵ A maafa we ngen’ina took-ee-took, a fudin teeru fa ngoƭu took fee. A fudnaan boo a lanq, a deɓin no fo ut ole,

⁶ soo a caf ake no toroxu we fo ake no neewu doole we a nduutin.»

A qeƭ ale no camaane palakaand ke

⁷ O ƭat onqe no cofu xe kaa naag pec. Kaa o fodrandaa a qul ale no cofu xe.

⁸ Wo o Yaal oxe, wo i yaakaaru na ƭat ale no kate ke wo. Ke xa laaw in a mbugna, refu o ne’aa gon of, a ƈufginooxang.

⁹ O laaw es kaa diilooxang no yeng ole fop, soo yiif es itam a waaƭang kam ee kam es, yaam yaa kate of a mbadnooxkaa took lanq ke, xan we ngenna na adna fee a aqatoox o cofel.

¹⁰ O soxodu xe a yirmange sax, aqatooxkee o cofel ole. No paaxeer rek a genkaa kam saax a ƭat le, too ga’kee muk o magnel ole wo, wo o Yaal oxe.

¹¹ O Yaal oxe, o ɓay of ole yoɗooxa took, ndaa nga’iran. Xan a mos o nga o jaflax of na xeet of soo a sed yaam keene. Xan fiɗel le jagandaneena fañ we wo a raaɓ a den!

¹² O Yaal oxe, kaa o woornaa a in jam fee, yaam fop ke i mbadnaa, wo na fi’an.

¹³ O Yaal oxe Roog in, yaal lakas tefee wo a njeg’a a in. Ndiiki koy, gon of soom i ƈufginooraa.

¹⁴ Weene a nqona too ñoowatinkee, a ñak too inooxatinkee, yaam xelooraa fa den, saŋik a den soo ñuf fop ke da mbaag’eena o mbetandooraa.

¹⁵ Wo o Yaal oxe, mayƭandaa xeet fee. Kaam ee mayƭandaa xeet fee, lalit o ndam of soo ɗaay xa ŋat axe no saax le fop.

¹⁶ O Yaal oxe, ye i ndeeƭna no njaaxɗataand, i mbaaƭoogaang. I ƈufginooxaang na qeƭ, ye a qaw ale wo a dalna took in.

¹⁷ O Yaal oxe, kaa i nand’u mbaambir of nen o bodeer oxaa na gaajooxaa, a lañtooxaa yaam a ɗomeel soo a wuuqaa.

¹⁸ I mbuda, ƭomel, ndaa nqeñ ƥor i ñootu. I ƥisiidee saax le a muc, too i ñootee o leng na adna.

A qontax ale no xon we fo a qaw ale took lanq ke

¹⁹ Wo xeet es, xon we wo xan a ñoowatin, xa tal axe den a nqontoox! We ngulooxna lanq ke xan a yokoox soo a mbelakinoox, yaam liim of liim a qoolaand oo, too lanq ke xan a ndakin xon we no ñoow ole.

²⁰ Wo xeet es, roki no tok of too weg begax ke. Laqooxi a pe a leng-leng boo yaa fuux le a faafkaa,

²¹ yaam o Yaal oxe xey a sutooriidaa no ngenand um, ndax ta xaw we ngenna no lanq ke yaam tooñ den. Lanq ke xan a mbeeñil fo’oy le ɓaxooxna teen too singkatee we mbareena.