Esayi 25 - NQAARIIT NE ROOG

A kim a kidmir no xe wateena

¹ O Yaal oxe, wo refu Roog es. Xam simatang, xaanaa gon of, yaam comlaand ke fi’oona. Yuuƥ ke wo yaaga kaa mboor, a saƭik.

² Tasaa teeru fee, fi’in juum a ƥil, teeru fa njegu doole fee, o gefin tuƈ, saŋe ne no qeet can ke refatee teeru too maxatinkaand boo muk.

³ Ten taxu xeet fa mayu katil fee a ƥoxotang o ndam, teeru ke na saax a yednu ke a saɗarong,

⁴ yaam wo reeƭu ndaɗand no neewu doole xe fo njaɓnooxand no ndool onqe reeƭna na naqad. Wo reeƭu itam laqooxand yaa fo mbuyaam maak ne fo yook naa na saytooxaa na sumaan a cegu doole le no njeeƈ ne. Haaƭ le no wiin fo’oy we kaa nand’u nen mbuyaam naa na xawooxaa no tabax,

⁵ nen a sumaan no lanq beeru. Ñufaa combol le no ñaañagadil we. Ne yook eel a ñuftaa a sumaan ale, neene a kim o ndam ale no wiin fo’oy we a ñufte.

Mbumbaay ne no qeet ke fop

⁶ O Yaal oxe Hupna fop xan a fi’an qeet ke fop mbumbaay took o joong oleene. Mbumbaay a tegeƴ a neeru a refkaa, a yoon fa biiñ fa mbelu, a ref mbumbaay a tegeƴ a moku fa biiñ fa nqoolu qac.

⁷ Took o joong oleene o mat o Yaal oxe a watnitkaa muurax ne muur’ina qeet ke fo mbaƴ ne lip’eena a saax ake.

⁸ Xan a ñuf fa nqon boo kili. O Yaal oxe na refkaa boo faw xan a forit xa kooniit axe no mukit no fop, too xan a watin gaci fee dalna xeet um took lanq ke fop. Keene o Yaal oxe a regtu.

⁹ A koom oxuu refna a lay ee: «Roog in oxey, no ten i ndoon’u yaakaar in, too ten o mat muclu a in. O Yaal oxe xey, no ten i ndoon’u yaakaar in. Fat i ndef no ɗaay too mbelakinoox na muc ale i ndaawitna no ten.»

¹⁰ No ndigil, xan o ɓay no Yaal oxe a ref took o joong olene. Mowaab xan a duutel me ta refna nen daaƭ kam a tos,

Mowaab xan a duguñel

¹¹ a wiisooxaa teen ne oxaa na laɓaa a jeemtaa a beƈ. Kaa koy, o Yaal oxe xan a fudin a magnandax um, ke ta wiisooxna fop oo.

¹² Xan a maaf soo a fudin saŋe ciig ke wo saƭikna koŋ, a naag a den junjang boo kam fo ut ole.