Esayi 22 - NQAARIIT NE ROOG

Yeerusaleem a maƭooxe

¹ Ke layeena na «Yulanq ale no mbeeñil ne»: Yeerusaleem, xar damong boo we ngenoonga fop a ŋaay na xa tung-took axe,

² wo teeru fa yo’nooxu fee mayna coow fo o mbelakinax? Xon we wo kat, laƥ ñaamee a den, mbartaand na ñoq ale.

³ Xiixire we wo fop xan a ngodandoor o joor, boo da ngelko fo nqaƴaa a qali ke xan a mbi’el faɗ. We ngenna me wo fop xan a mbi’andoorel faɗ boo no we na ƈufkaa koƭu sax.

⁴ Ten taxu um lay ee: «Mbaasaamoo pelek, nqaƴaamoo um lool boo torox. Ba nu njeemaam o yaal no njakad onqe na dalkaa o njaaƈ o ndoog onqe refna xeet es.»

⁵ Yaam o Yaal oxe na refkaa boo faw Hupna fop, xan a fi ñaal o njombe fo o njakad fo a saŋkax na Yulanq ale no mbeeñil ne: xan saŋe ne a jiƭtel, xa paɗax a njibit farna fo xa coong axe.

⁶ Elam a gadooxa a tungaar um, Araam a humin a sareet-xire ke ten, soo Kiir a woos pegoor um.

⁷ A yulanq ake wo moƴna o mos owe maya muut fo a sareet-xire, soo ŋaaŋaay pis a mbogooxan a ñoq ale no tokand ke wo.

⁸ Wo Yudaa, xan ke na singang a watnel. A koom, geleer’aa a kid of farna fo o geekand ƥonax ke no mbind ne na xoyeel Suungaan.

⁹ Nu nga’a xa kef xa mayu no saŋe ne na teeru fee Dawid. Nu yaxandooxa foofi no mbalka ne a lanq.

¹⁰ Nu lima pind ke Yeerusaleem soo ngef leng-leng na den, ndax nu saƭkand saŋe ne.

¹¹ Nu mbi’a mbalka ndeer saŋe ƭik ke, ndax poofi ke no mbalka ngiid ne a caarooxaa teen, ndaa nu ƭeetee no xe fi’na keene too nu nga’ee oxe jagand’uuna no miñu kaa.

¹² A koom, o Yaal oxe na refkaa boo faw Hupna fop kaa sim’u a nuun nu lool, ƭomatoox, nduusoox soo nderoox xa saaku,

¹³ ndaa o ɗaay fo o mbelakinax ndefu meen. Qoox ke we mbareel, paal ke a nqirseel, a tegeƴ ake a ñaameel soo biiñ fee a yereel, nu ndamtin ee: «Fat i ñaamaa, yeraa, yaam o feet i nqon.»

¹⁴ O Yaal oxe Hupna fop a yegnaxam ee tooñ neeke, nu mbaasankaand o ten muk boo yaa nu nqonkaa. Keene o Yaal oxe na refkaa boo faw Hupna fop a layu.

Sebna fa Eliyakim

¹⁵ Keeke o Yaal oxe na refkaa boo faw Hupna fop a layaxam: «Reti soƥik a Sebna fee refna jawdiin fee adooxanna mbind no maad ne too layin ee:

¹⁶ ‹Xar jego mene, ndi xar fogtee meen boo gasnaa mene a mboy of? A mboy of aley gaseel took, woxey sexnaa ngenand mbalakaand of no ɓil le.

¹⁷ O koor oxe, o Yaal oxe xan a deɓong, a niipong,

¹⁸ a ñuuƭe’ong bo ta xen soo a joorong nen o kupe no saax laa yaajna bo. Maaga o xontikkaa, wo fo a sareet a mosu ke wo, woxe na gaci’nooraa mbind no yaal of.

¹⁹ Xam raxong na seek of, sutong me fodoona.

²⁰ A koom, xam xoy a Eliyakim fee o tag es refna o ƥiy Hilkiya,

²¹ rokanin ndobin ne wo, ŋaƭin o qap ole wo soo doxnin sañ-sañ fee wo. Xan a ref faap no we ngenna Yeerusaleem fo no mbind Yudaa.

²² Xam gadnin o jaafu le no mbind Dawid. A wetangaa, o leng wegkiran, too a wegangaa, o leng wetkiran.

²³ Xam geennin jiŋ, ta saƭik koŋ nen o reng o daaƴe no mbiñ o saƭku, too xan a ref uum jegu o ndam no mbaafaap um.› »

²⁴ Mbaafaap um fop fo ne ta fodeena xan a lokoox teen: A naaq a maak ake fo xa yar xa teɓ axe, ƥaxañ ke moƴna o neew, a xotit na tokol ake boo na xa kuta xa maxte ƭok axe.

²⁵ O Yaal oxe Hupna fop kaa tee: «A koom, o reng ole daaƴeena no mbiñ o saƭku xan a fuuroox, a yen, soo ndoq ne lok’eena teen a naag bup, a yaqoox. Keene o mat o Yaal oxe a layu.»