Esayi 21 - NQAARIIT NE ROOG

Njom ne Babilon

¹ Ke layeena na koƥ-a-ƥor ale paam o maag ole: O njakad onqey a garaa, a inoor na koƥ-a-ƥor ale, no saax saɗarnooxu nen a und a maak alaa na xaañaa o ɓemb-roog o ñamaak.

² Laleem mbeeñil mbitnooxu: O koohod oxe a hoda, o yaayaq oxe a ref no yaq. «Nuun Ee-elam we, songyo! Nuun Meemedi we, mbidyo teeru fee o kurul-keƥ. Xam watin xa iin axe fop.»

³ Ten taxu naqad oxe lifaxam, um ɗomeel nen o tew oxaa na gaajooxaa. Ke nanuuma kaa firɓandaam, ke ga’uuma a diidlandaam.

⁴ Yiif es kaa gulmaa, diid a damaam. O yeng ole tayooguuma a refata na mi o yeng o njom’andaan.

⁵ Ñaamel ke a ndiƈe, xa sar axe a ƭaapel, da ñaamaa, a yeraa. Ndak fo ndak, o wuuq a jiba yee: «Xir say we, inooxyo! Ƭuumyo pegoor ke nuun!»

⁶ Keeke refu ke o Yaal oxe a layaxama kat: «Reti, dalin o koohorax, ta yegnit ke ta ga’kaa.

⁷ A ga’angaa a sareet-xire kaa ngumneena pis ƭik mbaat o qod xa paam mbaat o lox keeleemb, fat a naag tek, a horoox a paax.»

⁸ Maaga, o koohorax oxe a falalooxa yee: «O Yaal oxe, ñaal oo ñaal mexey no yetooxand es, too mexey jiŋ meen o yeng oluu refna.

⁹ Goor waa ŋaayna pis oo weene ngaraa fo a sareet-xire kaa ngumneena pis ƭik. A dakooxahina o falaloox ee: ‹Koo a jiƭtooxa, a jiƭtooxa yoo, Babilon a jiƭtooxa! Xa taaƴ axe no roog ke ten fop a nduguñe a lanq.› »

¹⁰ Wo xeet es fee mokandeena nem nen mbep no unand, yegnaam a nuun ke nantuuma no Yaal oxe Hupna fop, a ref Roog fee Isra’el.

Mam o yeng ole a tolooxu

¹¹ Ke layeena na Edoom fee naagna yereŋ: Falaloorteem Seyiir ee: «O yeeyetax oxe, mam o yeng ole a tolooxu? Kaam ee mam o yeng ole a tolooxu?»

¹² O yeeyetax oxe a doona yee: «A feeda de, ndaa no yeng ole i maadu. A soƥangaa yee kaa nu mbug o laamit, laamityo, saktooxyo too ngar.»

We ƈuftiidna Kedaar

¹³ Ke layeena na Arabi: Nuun wiin we Dedaan na mbe’aa kam xa coc axe Arabi,

¹⁴ ci’ikyo foofi we na ngaraa me nuun fo a koɗom. Nuun we ngenna Teema, nqetookyo we na ƈufaa, coox a den kaa da ñaamna,

¹⁵ yaam kaa da ƈufaa laƥ ke, laƥ ne wooseena no xool um fo a qali le ɗaayeena, a ƭom-yedar ake na xire fee daal.

¹⁶ Kene koy refu ke o Yaal oxe a layaxama teen: «Ndeer mene fo o hiid olaa na limkeel nen xa kiid no saadlaand, xan o ndam onqe Kedaar a ñuf ɗuƭ.

¹⁷ O ndik o ndutuuñ soom na yoqkataa no xaaxaƴ a qali we ndefna xir say we Kedaar.» Keene o mat o Yaal oxe Roog fee Isra’el a layu.