Esayi 18 - NQAARIIT NE ROOG

Ke yegniteena na Kuus

¹ Ey! Wo saax le forfor le na nafir ake a fangooxaa, woxe refna kaltaa xa quluɓ axe Kuus,

² kaa o lulaa wiin da ƥeer no maag ole, lafnooraa a den took poofi no fo njuk naa mbi’teena fo yiig. Nuun ñofu we luleena, ndetyo me no cool keene cer den a telelaa, me na xeet feene saɗareena mene fo me goƭna. Ndetyo no saax leene jegna doole, a duutaa fañ um, too xa quluɓ axe a qicran.

³ Nuun fop we ngenna na adna fee, nuun we na ñoowaa took lanq ke, fat nu ƭeetaa, ndax boo a laay a anddiloor ale a sipeel took xa coong axe, nu nga’in, soo nan-gilooxaa, ndax boo a luuƥ ale a jibna, nu nanin.

⁴ Yaam keeke o Yaal oxe a layaxam: «Kaam fod no ngenand es, naag jiŋ o mbiñ o leng, horooxaa ke na xewaa nen ñalal njeeƈ sumu jip mbaat nen a liim alaa fi’na eel kam a sumaan ale na saxad ale.»

⁵ Maaga, boo a ƥoor ale a helko fo fadaa, yaa piɗ ke a ƥoorooxna boo a mbi’at xa tim biiñ axaa nqawinna, kaa godtaa xa par axe laƥ, a fuuɓaa soo a deɓaa a naaq ake.

⁶ Keene fop xan a xaƴanel a tud ake na xa coong axe fo muumeen-a-koƥ ke. A tud ake xan a ndiig took den, soo paafaal ke na koƥ ale fop a ƈiid teen.

⁷ Na jamaane faaga, xan sadax a ƥisiidel o Yaal oxe Hupna fop, a ngat no cool keene, cer den a telelaa, na xeet feene saɗareena mene fo me goƭna, no saax leene jegna doole, a duutaa fañ um fop, too xa quluɓ axe a qicran. Xan a ƥisiid ci’it den took o joong ole Siyoŋ, me gon le no Yaal oxe Hupna fop a genna.