Esayi 16 - NQAARIIT NE ROOG

Mowaab oxe laamtaa a Yeerusaleem o ndimle

¹ «Ƥisiidyo fo mbaal ne me no maad oxe no saax le, nqotit a den Sela, na koƥ-a-ƥor alaa, da ngar no joong ole Siyoŋ o ndoog onqe.»

² Rew we Mowaab owe ngeenooxa paam cootand ke Arnon, nen tiiƭ kaa na ƈufaa, nen giiraand laa pasarooxna, a laamtaa a Yeerusaleem ee:

³ «Cooxi a in o as too heboox, ndax o dimle a in. Yookti a in a saytax of njoloor o mbuc, ne o yeng ole a letnitaa yook um. Ɗasni we laqooxna, too ba o lalit we ƥostooxna.

⁴ Xaƴi we suteena saax le Mowaab, da ngen me wo. Ci’i a den maa da laqooxna o yaayaq oxe boo yaa toroxat ne a watkaa, a ƭom-yedar ake a mbaaf, soo oxe na ruudnaa a sutoox saax le.

⁵ Kam mbind Dawid xan uum-maamaad le a saƭkandtel yirmande, too xan o kaahate xaa a ƭat rek a haalna, soo o cofel soom a felin, a moof teen fo ngor.»

Yeerusaleem waagee o dimle a Mowaab

⁶ I nana a magnandax ale Mowaab, a magnandax alaa o leng a andeerna ne ta fodna, o felnax um fo o nga’atinax um fo fakax kasaara um.

⁷ Ten taxu Moomowaab we owe ƭomatooxaa a ndeer den, den fop owe ƭomatooxaa yaam xa tim biiñ axe Kiir-Hareset a njoytooxaa yaam kam fa mbagu.

⁸ A ƭing taxar biiñ ake Hesebon fo ake Sibma a leeƥa, den we xa tim den a maafnooroogna yaal a saax ake. Kaa nqay’u boo Yaseer, a sax muu refna kam a koƥ-a-ƥor ale, soo a njol o maag ole.

⁹ Ten taxu mexe loolandooraa fa Yaseer fo taxar biiñ ke Sibma. Wo Hesebon fa wo Eleyale, mexe yernitaa a nuun xa kooniit es, yaam xa soroxole nantataand na ƥoor ale nuun fo na saxad ale nuun.

¹⁰ O ɗaay fo o mbelakinax a ñufa na ƭing ake nuun, too a kim fo o mbelakinax nantataand na ƭing taxar biiñ ake nuun. O niinir o leng nootatee xa biiñ axe na xa nirir axe, too xa ƈeel axe a ndiima.

¹¹ Ten taxu kam es a gooy na Mowaab nen o nqilimb, xeeñ es a naqadiloox na Kiir-Heres.

¹² Mowaab oxe kuskusnaa, a ŋaayaa na ñaang a sadaxand ake, a garaa no mbiñ o tedu nqe ndax ta xeɗ, ndaa daawkee dara.

¹³ Keene refu fa lay fee o Yaal oxe a yegnitna yaaga no kaa farna na Mowaab.

¹⁴ Ndiiki koy, o Yaal oxe a ɓaata teen ee: «Ndeer mene fo xa kiid xa tadaq axaa na limkeel nen xa kiid no saadlaand, o ndam onqe Mowaab xan a ñufel boo ɗuƭ. Ke ta mayna may wiin fop oo, yoqatin le ten jaakkatee too maykatee o njiriiñ.»