Esayi 15 - NQAARIIT NE ROOGA coytax yaam Mowaab (O saar 15—16: ɗeeti Yer 48) 1 Ke na dalkaa a Mowaab: Aar kam Mowaab oxe yereŋ, yaam no yeng o leng kut a gefe. Kiir kam Mowaab oxe yereŋ, yaam no yeng o leng kut a gefe. 2 We ngenna Diibon owe ŋaayaa na ñaang a sadaxand ake, ndax da loolit maaga. Mowaab oxe ɗomatooxaa yaam teeru fee Nebo fa fee Medeba. A qoox ake fop a nduuse, xa taatam axe fop a mboyel. 3 Xa saaku soom na nderooxateel no ped ke no teeru ke, fop a ƭomatooxaa took taax ke fo no paayo ke soo a yuurnaa xa kooniit. 4 Hesebon fa Eleyale owe njibnaa xa buuq, o ñuxur den a nannoox boo Yahas. Ten taxu xiixire we Mowaab owe sendaa, xa laaw den a mbiiƭaa. 5 Kam es kaa fag yaam Mowaab. We ƥostooxna no ten a ƈufa boo Sowaar fa Eglat-Selisiya. Kaa da ŋaayaa na teeru faa Luhit, a loolaa, soo na ƭat ale Horonayim da njibnaa xa paɗax. 6 Poofi ke Nimrim owe ŋiisaa, duufe le a weeraa koroŋ, daaƭ le a naag ŋayam, too jegatee teen kaa na xuƥaa. 7 Ten taxu owey ƥisaa kalal leng-leng ke da yoqiɗ’ina fo ke da ngeek’ina kaltaa Xur faa no Qawul kaa. 8 A coytax ale oxey widaa o jegel ole Mowaab o kurul-keƥ, ƭomatax um a nannoox boo Eglayim fo no kas kaa Eliim. 9 Poofi ke Diimon owe yaxga coy fo fo’oy, ndaa xam hebliidahin took Diimon kaa moƴna o ɗom: Xan njogoy a song we ƥostooxna na Mowaab fo we yoqna no saax le. |
Copyright © 2015-2023 by Eglise luthérienne du Sénégal
Eglise luthérienne du Sénégal