Esayi 14 - NQAARIIT NE ROOG

A nomtooxiid ale no we pasaroox’ina

¹ O Yaal oxe xan a yirim a Yakoob. Ii, xan a jilahin a Isra’el soo a dalnatinin no lanq um. Xa kataakoon axe xan a mbokatooriid fa den, too xan a mbogat no mbind Yakoob.

² Xan qeet mayu a ndimle Ii-isra’el we da nomtoox no saax le o Yaal oxe a ci’na a den, too xan qeet keene a njalantaa a den teen nen dag fo jeefeer. Xan Ii-isra’el we a ndam mbaƭ we ndam’ina a den mbaƭ, too xan a kelfa we ñaatlandoogna a den.

Muj fee no maad oxe Babilon

³ Wo Isra’el, a koom alaa o Yaal oxe a dakinkang no yaadax of a cinj coono ke fo ñagadil ke wo fo mbaƭ ƭomu ne damee’oona,

⁴ xan o xaadnoox o maad oxe Babilon, gimanan ee: Nam keene a waagoortu? O ñaañagadil oxe a wata, kañaan um a ñuf!

⁵ O Yaal oxe a yaqa o cap ole no soxodu xe, o samb ole no yaal sañ-sañ oxe,

⁶ o ten oxe xawoogna qeet ke fo fuux maak a taar o marin, a ñotombilaa a saax ake kam fuux um, a ñagadilaa a den, a fañ o waas.

⁷ Jam fo a yaadax a nomtooxiida no lanq ke fop, xa ƈeel a njibneel.

⁸ Pilaawo ke itam owe mbelakinooxaa na muj fee wo, taxar seedar ke Libaŋ a layang ee: «Naa maafee, i ŋaayataand ndax i ngodel.»

⁹ Jaaniif a nootooxa boo no qooƭ ke ten, ndax ta xetooxong na kar ale wo. A yokanaang xon-faaf we ndeeƭna yaal sañ-sañ ke no lanq ke fop fo maad we na saax ake fop, a in a den na uum no maad den.

¹⁰ Fop a kafa fa lay fee, a layong ee: «Wo itam saqatiro o ndoole nen a in. Nandataa fa in.»

¹¹ O mosel of a joore kam ee kam jaaniif, a yoon fo fangax le no fo nqilimb ne wo. O wondooxand of a sii’a, kulooxel of a gusax.

¹² Nam keene a waagoortu? Wo oxeene yentiidaa took-ee-took asamaan, wo o xoor mbuyukuun ole, wo o mbuŋa. Maafee a lanq, wo o maamaaf oxe na saax ake!

¹³ Kaa o layoogu no xeeñ of ee: «Xam ŋaay na asamaan, yoɗ uum-maamaad es, ta garit xa qoor axe Roog took. Xam moof took o joong ole Roog a xetteel, kam ee kam saax laqooxu le.

¹⁴ Xam garit a eel ake took, fodir fo xe Took-ee-took.»

¹⁵ Kaa koy, kaa o joorel kam jaaniif, boo no xooɗ-ee-xooɗ le no lanq ke.

¹⁶ Fop we ƈookoonga o garaa kaa mbadong a kid, a ngaan na wo, a laamtooxaa yee: «Ndax oxeene o koor oxe yo’noogna lanq ke too a sendnooroogu maat ke yoo?

¹⁷ Ndax refee oxe suptoogna adna fee a koƥ-a-ƥor, a gefaa teeru ke soo a fañoogu o xaƴ faɗ um da nqaad?»

¹⁸ Maad we na saax ake fop owe mbondooxa fo o niwel, oxuu refna na mboy um.

¹⁹ Kaa koy, wo o mat, kaa o deɓel maa goƭna a mboy of, ne a naaq a paaxeer a deɓteel. Woxe luuñaa a ndeer no we mbareena, laƥ a fand a den, da njoorel kam gamb laa mayna a ƥil. Kaa o nandtaa o dal o duute.

²⁰ Fokataandee fo maad gend of kam a mboy ale, yaam kaa o gef saax of, saŋik xeet of. Xa taan axe no soxodu we ne’kataand boo muk.

²¹ Njagandooxanyo a bar ale na xa ƥiy axe ten yaam tooñ ke faap den, ndik da inooxahin, a njaɓ lanq ke soo a mayƭand adna fee fo ŋaaloor.

²² «Xam inooxan a Babilon. Keene o Yaal oxe Hupna fop a layu. Xam ñuf gon le fo yoqatin le ten, xa ƥiy um fo xa taan um. Keene o Yaal oxe a layu.

²³ Xam fi’in ngenand a caang, suptin loofatin soo leeltin o leelir o yaayaq ole. Keene o Yaal oxe Hupna fop a layu.»

Muukandoong ne no ñagadil ke fop

²⁴ O Yaal oxe Hupna fop a daaɓooxa yee: «A woora yee ke yuuɓuuma, ten na jegkaa, ke hebooxuuma, xan a fadnoox.

²⁵ Xam yaq katil fee Asuur kam saax es, duutin took xa coong axe mi. Kadoor ke ta ir’ina xeet es xan a ndontel, soo a toq ale ta gadin’ina a den a dontel na kand den.

²⁶ Keene refu ke hebooxanuuma lanq ke fop, too o ɓay es oley yoɗuuma took a saax ake fop.»

²⁷ Ndi o Yaal oxe Hupna fop a hebooxangaa tig, an waagun o yaqan ta fi’in? A yoɗangaa o ɓay um, an waagun o pel?

Ke na dalkaa Fiifilista we

²⁸ O Yaal oxe cooxtu fa lay fa ñexetu feeke no hiid olaa o maad Ahas a xonna:

²⁹ Nuun Fiifilista we fop, ba nu mbelakinoox, yaam ne o cap ole nu nqawtoogeena a yaqeena. Na fangool fa nqonu feene xan sax a sutoor teen, soo Niŋki-naŋka fee na yetaa a sutoor no ɓoof um.

³⁰ We moƴna o torox xan a njeg o suufand, rool we a ñootnooxaa fo o yaadax, ndaa wo o mat, xam warnoor a paƴ of fo nqeex, too onqe na yoqkaa na wo, xan a warel.

³¹ Ndokand ne, ɗomatooxi! Teeru fee, jibni xa buuq! Wo saax le Filista fop, foygooxi yaam fo suun ole na inoortiidaa no ɓemb-roog o janoon, too o leng jaqooxee no qod ole no fañ we.

³² Xar na doonkeel we saax leene a lulna? Fat a ndoonel ee: «O Yaal oxe fa xoox um sinju a Siyoŋ, too teen o mat rool we na xeet um a njegitkaa ndaɗand mbooru.»