Esayi 13 - NQAARIIT NE ROOG

KE YEGNITEENA NA SAAX A CAN AKE ( 13—23 ) Muj fee Babilon

¹ Keeke refu ke o Yaal oxe a feeñilna a Esayi fee o ƥiy Amoc, ta dalkaa a Babilon:

² «Sipyo a laay a anddiloor took o joong o haltooxu le. Mbalalooxyo a den, cax a den fo o ɓay, ndax da ndeefit no ndokand ne no garmi ke.

³ Mi fa xoox es kelfa’u we kesaneema. Kaam xoy a salma-koor ake mi o ndam es a ɗaaynooraa, ndax um feeñil fuux es.»

⁴ Nan-gilooxyo combol le took xa coong axe. O nanangaan ee faan jegu doole. Nan-gilooxyo fangax leene no maat ke fo a saax ake mbokatoorna. O Yaal oxe Hupna fop na horooxaa xiixire we na ñoxorkeel.

⁵ Kaa inoortiid koƭu, no cat asamaan, ndax da yaq lanq ke fop. O Yaal oxe yoo fo we ta jiriiñooraa, ndax ta feeñil fuux um.

⁶ Ƭomatooxyo, yaam ñaal ne no Yaal oxe a matiida. Oxe garaa, a ref yaq faa hatiidna no Cegu katil oxe.

⁷ Ten taxu, xa ƥay axe fop kaa yaar, njambaar ne no wiin we a ɓutaa.

⁸ Kaa da ndiidlandel, ɗom fa naqad a ndal a den, da lañtooxaa nen o tew oxaa na gaajooxaa. Kaa da mbadir a kid fo o njaaxɗataand o maak, mukit den a nandtaa fiɗel.

⁹ Ñaal ne no Yaal oxe ney garaa, a ñak yirmande, a ƴaxooxaa, soo fuux um a raaɓaa. Xan a yaq lanq ke bo da mbes a pec, a saŋik baabakaad we ngenna teen.

¹⁰ Xa qoor axe na asamaan fo xa kulook axe ten meleƈinkatee a qoolaand den. Njeeƈ ne oxaa wataa, a ɓalig ɗok, a qoor ale a niifaar.

¹¹ Mi o Yaal oxe, xam xaw adna fee yaam kañaan um, xaw soxodu we yaam tooñ den. Xam watin a magnandax ale no ga’atinooxu we, maaf o nga’atinax onqe no yaal toole ke.

¹² Xam fi wiin we a moƴ o njafeñ wurus fa nqoolu. Kaam ee xan pindeef ke a moƴ o njafeñ wurus fee Ofiir.»

¹³ Ten taxu, asamaan fee xan a yo’noox, lanq ke a ngiiƈ-ngiiƈin yaam fuux le no Yaal oxe Hupna fop a koom alaa fuux ɗomu le ten a ɓiltooxkaa.

¹⁴ Maaga, oxuu refna xan a nomtoox na xeet um, o kiin oo kiin a ƴufan saax um nen mbat naa na raxeel, nen ged laa jegeerna oxaa koroluuna.

¹⁵ We na nga’keel fop xan a ndibel, oxuu dameena a warel.

¹⁶ Xa qeq axe den xan a mokandel na kid den, pind ke den a mbaltel, soo rew we den a ngignel.

¹⁷ «Xam fuuxɗat Meemedi we took den, den we a ƭat den a yongeerna na xaaliis fa nqoolu, too wurus jemee a den.

¹⁸ A qali ke den xan a luƈit mbes ke. Mbuuskee xa qeq axe too yirimkee xa caaƈ axe.»

¹⁹ Babilon, mosandoor ke no maat ke, kumooxel qaaƴoor ke no Kaakalde we xan a nand nen a Sodoom fa Gomoor Roog a gef’ina tuƈ.

²⁰ Genkataand boo muk, too xan a fes a pec na xa taan boo na xa tanaraat. Molaan we sax sipkatee ƭiif den maaga, too o kaynaak o leng koorinkatee maaga cegel um.

²¹ Paafal ke soom na mbugko korolooxaa teen, a loy ake a may pind ke, a ba ake a ngenin bo ta xet, soo a suk pambe-koƥ ake a mbecaa teen.

²² Xa moon axe xan a ŋuuyraa kam taax-took ke ten, soo xa ƥox-a-koƥ axe a mboxaa kam pind mosu ke ten. Waxtu um a matiida, too a pe um mbaafatinkaand.