Esayi 11 - NQAARIIT NE ROOG

O ndaan onqe Dawid

¹ Xan dugatin a sutoor no fanq le Isay, saqit a hat na paƴ um.

² Xan Yiif le no Yaal oxe a ref took um, a ref yiif o and fo yiif deyu, a ref yiif aa-as fo yiif jegu doole fo yiif andu o Yaal oxe too a saɗarin.

³ O saɗar o Yaal oxe na refkaa o ɗaay um. Hate’itkee ke yulna a ngid, too o leng gapkiran o asaa fa lay um.

⁴ O cofel rek a bugko hate’taa fo mboƭomsogor ne, soo rool we, ta ɓoxot a den wargal den. Fa lay um a faditkaa nen o loq o kiin balu-balu xe, too haaƭ um soom a saŋkitkaa o soxodu xe.

⁵ O cofel na refkaa a maaƭ um, soo ndigil a ref o kumnoor ndet um.

⁶ Maaga, xan a teeteem a yongataa fo o mbaal, o ƴaxal a fog fo o mbambe nqanq. O xeel fo o njogoy o njanglax xan a mbog o suufand, soo o njaaƈ o ngoor a gayaa a den.

⁷ Naak fo ursu ƥasil xan a mbog o suufand itam, xa ƥiy den a mbog o wondooxand o leng, soo njogoy a ñoowtataa boob nen nqoox.

⁸ Bax ne xan a ŋastaa me saamaand a genna, roɓtatin le a ɓekaa o ɓay um na semb ale no sax le.

⁹ Paaxeer mbaat yaq fa leng fi’kataand took o joong o tedu le no Yaal oxe, yaam xan o and o Yaal oxe a mayƭand lanq ke ne poofi ke a mayƭanditna o maag ole.

¹⁰ A koom, xan saqit laa hatna na paƴ Isay a ref o anddiloor no qeet ke fop, a saax ake fop a njagniid me ten, too o ndam onqe xan a meleƈit no ngenand um.

A nomtooxiid ale no we pasaroox’ina

¹¹ A koom, xan o Yaal oxe a letnahin o ɓay um, ndax ta wat yoqatin we na xeet um na muckaa Asuur fa Misira fa Patros fa Kuus fa Elam fa Sine’aar fa Hamat fo na pimb ake no maag ole.

¹² Xan a sipan a saax ake o anddiloor, a fokat kam Isra’el we sutoox’ina saax le soo a korol we pasaroox’ina na Yudaa na xa saax xa nahaq axe na adna fee.

¹³ Maaga, xan ciis ne Efrayim a wat soo o feƭar-fo’oy ole Yudaa a ñuf. Efrayim siiskatee a Yudaa, too Yudaa itam fañirkatee fa Efrayim.

¹⁴ Xan a mbokatoor, a yaadin Fiifilista we farna fo mudand, a njaɓ kalal ke no we ngenna no batand, a ndoon o ɓay na Edoom fa Mowaab soo a ngame Aa-amon we.

¹⁵ O Yaal oxe xan a weerin a kal ale no maag ole Misira, a ñotombil o xuluɓ ole Ofrat fo o ɓay um, a tasin a paas ɓetuu ƭik na pexey a sumaan ale no haaƭ um boo o jaf a waag o xaañin too xuƥkee.

¹⁶ Neene, xan yoqatin we na xeet um na maadkaa o ñoowaa Asuur a njeg a qal, ne Isra’el a jegit’uuna, ye ta sutooxaa Misira.