Esayi 10 - NQAARIIT NE ROOG

We na ngaraa fo fuux le no Yaal oxe

¹ Sabab took no we na ndalnaa bargal kaa njofeerna, a mbindaa kebil kaa na ngartaa o njakad,

² ndax da nqañit fo mboƭomsogor ne nqeloor, rool we na xeet es, da nqañit a den wargal den, a ñoowtaa ke ñaaw we a njegna soo a njaɓaa ke xa baan axe a yaakaarna.

³ Xar nu mbi’kaa na bes faa no nqeloor naa, yaa a und ale a inoortiidkaa koƭu? Maa an nu ƈufkaa, ndax nu njaɓnooxin, too mam nu laqkaa kalal ke nuun?

⁴ O lupandoox fo we ndameena soom nu yoqɗu mbaat nu yen fo we mbareena. Kaa koy, keene fop taxkee fuux le no Yaal oxe a ɓoos, too o ɓay um ole yoɗooxa boo fa ndiik.

A ŋaay ale Asuur a jola a naaq

⁵ Sabab took Asuur refna o cap ole no fuux le mi. O guul ole ta pokooxna refu fuux ɗomu le mi.

⁶ Ɓoxotaanum xeet fa njofaƭaru fee, ɓakandin farna fa xeet feene na fuuxnooraxam, ndax ta jofnoox no yaqin soo a jaɓ paax ke den, a duutin nen lopopooƈ le no ped ke.

⁷ Kaa koy, o ten ga’tiran neene, too yiif um xalaattiran neene. Ke ta yuuɓna no xeeñ um kañ refu yaq soo ñuf qeet mayu.

⁸ Kaa lay ee: «Ndax gelwaar we mi mbodree fo maad?

⁹ Ndax teeru fee Kalne mujit’ee nen a Karkemis, Hamat nen a Arpad, soo Samari nen a Damaas?

¹⁰ Maafaam maat mayu kaa mbaɗooxoogna pangool den, too xa taaƴ den a ngup’u axe Yeerusaleem fa Samari.

¹¹ Ndax kaa waagiim o fesoor boog fa Yeerusaleem fo xa taaƴ axe ten, ne fesoor’uuma fa Samari fo pangool ke ten?»

¹² Kaa koy, mi o Yaal oxe, yaa um ƴutkaa calel es took o joong ole Siyoŋ fo na Yeerusaleem, xam xaw o maad oxe Asuur magnandooxna no xeeñ um, a doon teen a ga’atinoox,

¹³ yaam kaa lay ee: «Ke fi’uuma fop, doole es ci’axam o ten fo o and es, yaam o cegu yiif refum. Sañtaam xa ŋat axe no qeet ke, jaɓ kalal ke da ngeek’ina, too nen sund duutaam we ngen’ina teen.

¹⁴ Ne o ɓay a ɓekteel no ndut, neene jangtum kalal ke no qeet ke. Ne a ƥoof akaa mbodeena a ngisteel, neene seeƭtum lanq ke fop, too a nafir a leng firfirnee, o copir o leng cococee.»

¹⁵ Ndax foogaa moos ee ɓaax a waaga o moƴ o yaal um, ndi a si a naaga o fakooxanaa oxe na jaltan? O cap naagee wulaa oxe na yo’nan, too o guul naagee o yoɗaa oxe na jiriiñooran!

¹⁶ Ten taxu, o Yaal oxe na refkaa boo faw Hupna fop xan a ɓisiid jir laa na ŋeeskaa wiin magnu suquƈ we no saax le Asuur. Keƥandand na ilaa yoora o ndam um ne fiɗel a iltaa.

¹⁷ O Yaal oxe refna a Qoolaand ale Isra’el xan a refat fiɗel, o Tedu xe ten a refat aal laa na doxkaa soo a raaɓ takar-ñiig ke fo tomb ke Asuur no ñaal leng kut.

¹⁸ Xan a yaq pic suungaan niɓu le fo a ƭing ake ten, too saax le xan a nandat fo o baad oxaa na ɓutaa.

¹⁹ Yoqatin le no taxar ke no suungaan niɓu le ten jaakkatee, o njaaƈ sax xan a waagin o lim.

Yoqatin we Isra’el

²⁰ A koom, yoqatin we Isra’el ndefna we mucna no mbind Yakoob sereƥooxkatee no xe ñaatlandoogna a den, ndaa xan a sereƥoox fo a koolax a teyu sik no Yaal oxe refna o Tedu xe Isra’el.

²¹ Yoqatin we xan a nomtooxiid. Kaam ee yoqatin we Yakoob xan a saktooxiid me na Roog o Cegu doole xe.

²² Maaga koy wo Isra’el, a soƥangaa sax ee wiin of kaa mayit’u nen pep lanq ke na ƥeeraamb ale no maag ole, o yoqatin o ndutuuñ soom na nomtooxiidkaa. Fa yaq fee a fosooxe, o cofel ole a dalnel.

²³ Kaam ee o Yaal oxe na refkaa boo faw Hupna fop, xan a fadin fa yaq fee ta fosooxna took lanq ke fop.

Ba nu saɗar a Asuur

²⁴ Ten taxu, keeke o Yaal na refkaa boo faw Hupna fop a layu: «Wo xeet es fee genna Siyoŋ, ba o saɗar a Asuur fee na xawtang o cap, a yoɗanong o guul um ne Miimisira we a mbi’tooguuna yaaga.

²⁵ Ba o diid, yaam ndeer mene fo a pe a miñeer xan fuux maak le fuuxanoonga a ɓoos soo a biltooxan fañ of, ndax ta saŋik a den.»

²⁶ O Yaal oxe Hupna fop a ɗaayana a Asuur o qiir um, ndax ta xawin ne ta xawit’ina Maamajan we no ɓil laa Oreb. Ne ta fi’it’uuna a koom alaa ta yoɗna o loq um took o maag olaa no saax laa Misira, neene deŋ a fi’itkan.

²⁷ A koom, a toq um xan a fudnel a kand of, soo kadoor um a dontel no cok of. O maad o qas xan a ɓol kadoor ke.

O pañ oxe a faambnooxiida a Yeerusaleem

²⁸ O pañ oxe xan a fadiid Ayat, a xaƴ njogol um Mikmas a cinj ye ta reefna Migron.

²⁹ Cinj kaaga, xan a xaañ a qufid ale, a lay ee: «Fat i ndal Geba.» Rama xe sendaa, soo Gibe’a fee Sawul a god o joor.

³⁰ «Teeru fee Galim, jibni o wuuq, Laysa, fogooxi, wo Anatot fa toroxu fee.»

³¹ Madmena xan a god o joor, soo we ngenna Gebim a mbaaƭaa ndaɗand.

³² No ñaal leng kut naaga, xan o pañ oxe a geenoox Noob, a ɗaayan o joong ole Siyoŋ o ndoog onqe o kurpeeñ. Kaam ee xan a ɗaayanin ƴoong le Yeerusaleem.

³³ O Yaal oxe na refkaa boo faw Hupna fop xan a fasit fa doole a naaq ake, a ɗeg xa cul taxar axe moƴna o njigid soo a luƈtaa we magnandooxna.

³⁴ Suungaan niɓu le xan a yen yaam kot ke na ƥaax ake, soo o Cegu doole xe a maaf a Libaŋ junjang.