Efees 6 - NQAARIIT NE ROOG

Xa caaƈ axe fo we ndimna a den

¹ Nuun mboƥ ne, wargal nuun mbaambir no Yaal oxe refu yee nu nanan we ndimna a nuun, yaam keene a jofa.

² «Niwi a faap of fa ya of», refu kebil eetaand ne yoonandteena a tegit:

³ «Ndax o ɗaay too xuuɗ.»

⁴ Nuun paap ke itam, ba nu njumband kam na xa ƥiy nuun, ndaa yaryo a den, njangnaa a den, too maƭooxaa a den no Yaal oxe.

Faɗ we fo yaal pind den

⁵ Nuun faɗ we, nananyo yaal pind nuun na adna fee no kuu refna. Saɗaryo a den, too niw a den fo xeeñ galagee dara, nen Kiristaa nu mbi’anan.

⁶ Keene koy, baa ref soom na kid den nen waa na mbaaƭaa kaa felna wiin we, ndaa nen faɗ Kiristaa waa na mbi’aa o bug ole Roog fo xeeñ letu.

⁷ Ndagooxyo a den fo xeeñ letu, nen o Yaal oxe nu ndagooxaa, too refee wiin we soom.

⁸ Fat nu and ee: Oxuu refna xan a daawit no Yaal oxe paax ke ta fi’aa, ta ref o paɗ mbaat oxaa jegna a xoox um.

⁹ Nuun yaal pind ke, ñaaƴnityo neene a ndeer nuun fo faɗ nuun. Mbootooxyo o mbi a den ƭomu. Fat nu yeg fo and ee nuun mbogu o Yaal o leng kut oxe refna na asamaan, too no ten jegee camtirand leng.

Ƥonax ke Roog

¹⁰ Ndiiki koy, ne nu mbogna no Yaal oxe, mbaaƭityo no ten doole nuun, too ndokoox katil magnu ne ten.

¹¹ Nqotyo ƥonax ke Roog fop ndax nu mbaag o nqox pexey ke no ƈiƴ oxe.

¹² Yaam i mbaree o maafir fo wiin we, ndaa fo kelfa ke fo sañ-sañ ke fo aa-adax we na yiif ake ndefna no niɓaan ole fo katil ke na yiif a paaxeer ake ndefna ndeer asamaan fa lanq.

¹³ Ten taxu nqotyo ndiiki ƥonax ke Roog fop. Neene, boo andoona yee ñaal mbaaxeer ne a gara, xan nu mbaag o nqox oxe fodna a nuun mbaambir, too saƭik a cinj yaa nu maafna fop.

¹⁴ Mbogooxyo boog! Fat ndigil ne Roog a ref o kumnoor ndet nuun, o cofel um a ref ndoki njelem no kang nuun.

¹⁵ Fat o bug o yegnitik Yegil mbaax ne na ci’taa jam a ref xa ñaaƭ nuun.

¹⁶ No kuu ta waagna waag o ref, fat o ngim onqe a ref na nuun nen pegoor naa nu pokooxna, ndax nu mbaag o ngarin a kas fiɗel ake o paaxeer oxe a xaƴaa a nuun.

¹⁷ Njaɓyo a muc ale Roog, ta ref o maxanda xire nuun. Njaɓyo itam fa lay fee Roog, refna laƥ ne no Yiif le ten.

¹⁸ Mbi’yo keene fop, yoonandtin a qeƭ, nqeɗaa o ndimle Roog na pexey Yiif le. Saƭikyo no keene boog, ngen teen, too nqeɗanaa tedu we fop.

¹⁹ Nqeɗanaamoo itam, ndax a mbanuu haƥatuuma bug o lay, um jeg kaa layuuma, boo waag o andnoor kunpa ke no Yegil mbaax ne fo njambaar.

²⁰ Kaam ref oxaa Roog a lulna, ndax um yegnitaa Yegil mbaax neene, taxna um jengel ndiiki. Nqeɗyo boog, ndax Roog a ci’aam njambaar naa um layantan ne waranuuma o layit.

Simin palakaand ke

²¹ Mexe luliidaa a Tisik fee o pog in no ngim onqe me nuun. Fexaanum no xeeñ es, too kaa ref o caajal o kore’u no calel ke no Yaal oxe. Xan a yegin a nuun fop ke jofna na mi fo ke um fi’aa.

²² Mi fa xoox es luliidun me nuun, ndax nu and ke i ndefitna, a qeeñ nuun a mbaag o yaaloox.

²³ Yaasam Roog Faap fee fo o Yaal oxe Yeesu Kiristaa a ci o fog ole fop jam fo o mbeq fo o ngim.

²⁴ Yaasam yirmande fee Roog a ref fo fop we mbexna o Yaal in Yeesu Kiristaa o mbeq o saƭku.