Efees 4 - NQAARIIT NE ROOG

O leng i ndefu no ngim onqe

¹ Mi fee dameena kaso yaam Kiristaa, mexe maƭooxaa a nuun boog, ndax nu ñoowit ne Roog a bugtuuna no xoy o jegu njiriiñ ole ta xoyna a nuun.

² Neewandooxyo, ƥuuɓ, njeg o muñ, kaam ee ngatliryo fo o mbeq.

³ Ngoorgoorlooxyo, ndax nu mbaag o ngay o fog ole Yiif le Roog a cooxtaa, yaa ta hiɓrandtaa a nuun jam fee.

⁴ Njer leng kut jegu fo Yiif Tedu leng kut. Neene nu nqoyte no yaakaar leng kut itam na pexey o xoy ole nuun.

⁵ O Yaal o leng soom jegu fo o ngim o leng kut fa batiise fa leng.

⁶ Roog fa leng kut jegu, a ref Faap no fop, a maadooxaa took fop, a laltinooxaa no fop, soo a gen no fop.

⁷ Kaa koy, oxuu refna na in a daawa a las um na yirmande fee, ne Kiristaa a xaajrandit’uuna.

⁸ Ten taxu a Pind a Tedu ke a lay ee: «Ye ta ŋaayaa took-ee-took a ɓislooxa we ndameena, soo a coox wiin we ci’it.»

⁹ A ŋaaya, xar a tektu? Keene kaa tekit ee: Kaa eet o fudoox no qooƭ ke no lanq ke.

¹⁰ Oxe fudooxna refu ref oxe ŋaayna took-ee-took asamaan, ndax ta mayƭand ke sakeena fop.

¹¹ O ten cooxu wiin we ci’it pogreer ke. Kaa ci leng we, da ndef apootar, wene, ta ci a den, da njo’tanan, waana waawaare Yegil mbaax ne mbaat gaynaak no gimu we mbaat jaajangin.

¹² Kaa fi’it neene, ndax ta jagand we mbogna na xeet fee Roog, da mbadin calel ke gimu we a ndoxondeena, a njokaa cer ke Kiristaa kam o ngim onqe.

¹³ A reftangaa neene, xan i ndet, in fop, boo mbogat o ngim o leng kut onqe, mbogat itam o and o leng no Ƥeenqe Roog. Yaaga, xan i ndefat maak waa, o maakel den a nandkaa fo ole Kiristaa.

¹⁴ Yaaga i ndefkatee xa teɓandoong axaa a yag-ee-yag ake a ƥisaa, soo a cangin a andand ake wiin naanax a ndalinna a ndiñaa a den mene fo maana. Wiin weene kaa mo’nooraa lakas we na pexey o ƴiƴ ole da nqalaatanna a qoox den.

¹⁵ Kaa koy, boo i layaa ndigil ne fo o mbeq, xan i maak no kuu ta refna ref farna fa Kiristaa refna xoox le.

¹⁶ O ten fi’u boo a seek a pogreer ake no cer ke a mbaag o mbokatoor, soo cer ke fop a kiɓ a mbokat a den. Neene, boo a seek aluu refna a fi’na ke waruuna, xan cer ke a njokoox, soo a maak kam o mbeq.

O ñoow o xas ole na Kiristaa

¹⁷ Keeke um layaa a nuun boog, soo yegnan a nuun no gon le no Yaal oxe: Ba nu ñaaƴtat nen gimaƭaru we, na ndeefaa a qalaat ake den naangeerna o ƥisaa den sen.

¹⁸ O jeg-yiif den kaa niɓaan tit. Njegee a las a leng no ñoow ole Roog a ci’taa, yaam kaa da ñak-o-and, soo a saƭik a qeeñ lool.

¹⁹ Naangee o sedaa dara, a ngen no combol-combol, ndax da mbi qoolaƭaru kuu ndefna, too mbaagee o ndeyƭoox.

²⁰ Nuun koy, refee yee neene nu njangtu, ndax nu and a Kiristaa.

²¹ A wooraxam ee nu nana Yeesu a layteel, too nu njangne ndigil ne refna no ten, nu ndefangaa kerceen kañ.

²² Neene boog, nu mbara o mboloox qac no ngiin ngiid ne nuun riñoogna a nuun no ne nu ñaaƴtoogna yaaga. A yaaw a naanax ake no ngiin ngiid neene, na saŋkax soom a ƥisaa.

²³ Nu mbara o ndakoox qas tigi no xeeñ nuun fo no yiif nuun.

²⁴ Ndokooxyo ngiin nqas ne sakeena a nand fa Roog, soo a feeñ kam o ñoow o jofu le saqna ndigil ne, too a ted.

²⁵ Ten taxu, ngoƭatiryo fo o maaɓ. Fat oxuu refna a layaa o kend um ke refna ndigil, yaam in fop, in mbokatooru, mbog njer leng kut ne, oxuu refna a ref a seek no njer ne.

²⁶ Boo nu mbuuxna, fat nu mbootoox, yaam ndik nu yen na bakaad. Baa njeeƈ ne a mudit fuux nuun muk.

²⁷ Ba nu ci o ƈiƴ oxe o gom olaa ta gartitna a nuun took.

²⁸ Fat oxe guuɗoogna a fañat o guuɗ. Fat a jalik, ndax ta jegan a xoox um o ñoow um no tig lewetu. Neene, xan a jeg kaa ta dimle’taa we neewna doole.

²⁹ Ba nu lay ɗelem faaxeer leng! Layyo soom a ƭelem a cegu o njiriiñ akaa na ndimle’aa lakas we, da njof mbaambir no ngim onqe. A ƭelem a nandu neene kaa ƭaxaa soxla, too a mbi’anaa paax we na nan-gilooxaa a den.

³⁰ Ba nu ngooyand Yiif Tedu le Roog. Mee ndax Yiif le refu o ñaas ole Roog lalteena took nuun! O ten na woornaa yee xan a jeg bes faa Roog a watkaa a nuun tigi no paaxeer boo faw.

³¹ Ba nu saqan o leng o njaaku kam mbaat nu mat xeeñ, too ba nu mbuux. Ƈufyo coow fo a ben! Baa coxod leng a ref fa nuun!

³² Fat o paaxel fo o laabiir a may a ndeer nuun, nu mbaasanraa ne Roog a waasanitna a nuun na Kiristaa.