Efees 3 - NQAARIIT NE ROOG

Calel ke Pool ndeer no we ndefeerna Yaawuur

¹ Ten taxu, mi Pool fee Kiristaa a taxna um wegel kaso yaam nuun, kaam gen no xeɗanaa a nuun a Roog, nuun we ndefeerna Yaawuur.

² Andaam ee nu nana yirmande fee Roog a ci’axama, ndax um daawin a nuun yuuƥ ke ten.

³ Roog kaa feeñlaam o ten, ndax ta andnooraam kunpa fee ten. Bindaam took fee xa ƭelem xa leng-leng no kaa farna no keene.

⁴ Boo nu njangaa a den, xan nu mbaag o ngoroox o and ole jeguuma na kunpa fee Kiristaa.

⁵ Kunpa feene andnoor’aand wiin we no camaane ke mbaafna. Ndiiki koy, Roog, na pexey Yiif le ten, a feeñlaan apootar tedu we ten fo duleer we ten.

⁶ Keeke refu kunpa feene: Na pexey Yegil mbaax ne, we ndefeerna Yaawuur a njega a las fo Yaawuur we no ke Roog a geekanna xeet um. A ndefata njer leng kut, soo a mbog, den itam na tegit a leng kut ale Roog a regitna na Kiristaa Yeesu.

⁷ Kaam refat o caajal no Yegil mbaax ne yaam ci’it ne Roog a cooxaxama kam yirmande um na pexey doole fee na katil um.

⁸ Mi refu oxe moƴna o neew no we mbogna na xeet fee Roog fop. Yaqanee toox de, Roog a cooxaam ci’it neene, ndax um yegin we ndefeerna Yaawuur Yegil mbaax ne na layaa kaa jofna na halal fa mbagkatar fee Kiristaa.

⁹ A ci’axam itam, ndax um xoolandan wiin we fop, da and ne kunpa fee Roog a wareena o feeñlit. Roog oxe sakna fop, kaa bug’u o ɗasin yuuƥ neene, yaaga boo fa ndiik.

¹⁰ Kaa koy, ndiiki, na pexey o fog ole no gimu we, kelfa ke fo sañ-sañ ke ndeer asamaan fa lanq a mbaaga o and o jeg-yiif ole Roog.

¹¹ Neene yuuƥ ne Roog a xalaat’ina yaaga, yaa fo mberaand naa, a fadnoor’u na Kiristaa Yeesu o Yaal in.

¹² Yaam ne i mbogna na Kiristaa, i njega njambaar naa i ngeenooritna mbaambir Roog. I mbaagaan o mbi fo a koolax a teyu sik, yaa i ngimna no ten.

¹³ Neene boog, mexe xeɗaa a nuun nu mbañ o ndeɓ njambaar ne nu njegna, yaam coono ke um gomanaa a nuun. Coono keene na ndimaa o ndam nuun.

O mbeq onqe Kiristaa

¹⁴ Ten taxu mexe gooknooxaa mbaambir Roog Faap fee.

¹⁵ No ten ke sakeena fop a inooru, ta ref na asamaan mbaat took lanq ke.

¹⁶ Kaam xeɗan, ta ci a nuun, nu saƭik fa doole na pexey Yiif le ten no ngiin kam ne nuun, ndax nu ndaawtin na halal fee no ndam onqe ten.

¹⁷ Kaam xeɗaa, ndax Kiristaa a gen kam a qeeñ nuun na pexey o ngim nuun. Kaam xeɗaa itam nu sax no mbeq onqe, ndamoox, saƭik teen.

¹⁸ Yaasam nu mbaag o and, nuun fo we mbogna na xeet fee Roog fop, ne o mbeq onqe Kiristaa a yaajitna soo a jigdit neen, a goƭ took soo a xooɗ.

¹⁹ Ii, yaasam nu mbaag o and o mbeq onqe Kiristaa, ke o leng a moseeruuna mos o waag o and fop oo, ndax nu mayƭandel fo o yaajel ole Roog fop.

²⁰ Na pexey katil ne na jalaa na in, Roog a jega sañ-sañ faa ta fi’taa kili kupu ke i nqeɗaa mbaat i nqalaatan sax.

²¹ O ndam a hela a Roog no fog ole no gimu we fo na Kiristaa Yeesu, bo na moos boo moos! Amiini.