Efees 2 - NQAARIIT NE ROOG

A muc na pexey yirmande

¹ Yaaga, kaa nu nqon’u mbaambir Roog yaam tooñ nuun fo pakaad nuun.

² Kaa nu ndeefanoogu boog o ñoowooƭ ole na adna fene, nananaa oxe kelfa’na cini ke ndefna ndeer asamaan fa lanq. Ndiiki, yiif faaxeer leene kaa jalaa no wiin we nananeerna a Roog.

³ In fop itam, nen a den i nand’u. Yaaga, kaa i ñoowoogu kam a yuxum ake no cer in, too mbi’aa ke cer in fo a yiif in a mbug’ina. Yaam ke i ndeeƭna yaaga, a qaw ale Roog a war’a o dal took in, ne ta dalitna took no lakas we itam.

⁴ Kaa koy, o paaxel ole Roog fo o mbeq onqe ta jegna na in kaa magin lool.

⁵ A taxa boo i ñoowatin fa Kiristaa, in we ndeeƭna waa nqonna mbaambir um yaam tooñ in. Neene boog, na yirmande Roog nu muctu.

⁶ Roog a nomtiida a in no ñoow ole kam mbokatoor in fa Kiristaa Yeesu, ndax i maadoox fo ten kam asamaan.

⁷ Kaa fi keene, ndax ta lalit no camaane ke na ngaraa fop halal fa njegee hap fee na yirmande um. Roog kaa laltin, ye ta feeñlaa a in, in we ngimna, o paaxel um na Kiristaa Yeesu.

⁸ Neene boog, na yirmande Roog nu muctu na pexey o ngim onqe. A muc aleene koy hatee na nuun, ci’it Roog oo.

⁹ A koorgoorlax nuun taxiran, yaam ndik o leng a fakoox.

¹⁰ Yaam Roog saku a in, a fokat a in na Kiristaa Yeesu, ndax i ngen na pi a paax akaa Roog a jagandanna a in yaaga.

Ndef o leng na Yeesu Kiristaa

¹¹ Nuun we ndefeerna Yaawuur, nuun o mat we Yaawuur we a nqoyaa xa kaat, soo koy a ne’ooxaa we nqucooxna yaam Roog – keene koy no cer rek a ndayu, a ref o ñaas, o ɓay no kiin a fi’in – nuun boog, fat nu mbetandoox ke nu ndeeƭna yaaga.

¹² No camaane kaaga, kaa nu ngoƭatir’u fa Kiristaa, ndef genar. Nu mbog’ee na xeet fee Roog a jilna. Nu mbog’ee itam no kiɓoor ke ndalin’eena took a tegit ale Roog a fi’anna xeet um. Kaa nu ñoowoogu na adna fee, ñak yaakaar soo ñak a Roog.

¹³ Kaa koy, ndiiki, yaam ne nu mbogatna fa Kiristaa Yeesu, nuun we andoona yee yaaga kaa nu ngoƭ’u, nu matiidata na pexey fo’oy le Kiristaa.

¹⁴ Yaam Kiristaa fa xoox um refu jam in. A fi’a boo Yaawuur we fo we ndefeerna Yaawuur a ndefat xeet fa leng kut. A jofooranda a den, a watin mbañir ne reeƭna a ndeer den, ye ta ɓoxotna cer um.

¹⁵ A laafa kebil ke no Yaawuur we fo bargal ke den na pexey fa nqon um, ndax ta fi xa kurcala xa ƭaq axeene, da ndefat xeet fa leng kut fa nqas, yaa da mbogna fo ten. Neene o mat a dalnitu jam fee.

¹⁶ Na pexey fa nqon um took a kurwaa le, Kiristaa a ñufa mbuuxoor ƭomu neene. Na pexey a kurwaa le ten a fokata xa kurcala xa ƭaq axeene, da ndefat njer leng kut, soo a jofooratin a den fa Roog.

¹⁷ Neene, Kiristaa kaa gar, a yegnitiid Yegil mbaax ne na ɓisiidaa jam. Kaa yegnin a nuun, nuun we ndefeerna Yaawuur, too ngoƭ’u a Roog, a fi’anin Yaawuur we mat’uuna itam.

¹⁸ Yaaga boog, na pexey Kiristaa, in fop, o Yaawuur fo o tefee o Yaawuur, i mbaaga o ngeenoox mbaambir Roog Faap fee na pexey Yiif leng kut le.

¹⁹ Neene boog, nuun we ndefeerna Yaawuur, nu ndefatee genar mbaat xa kataakoon, ndaa waa mbogna na xeet fee Roog nu ndefatu, too no ƥasil ne ten nu mbogu.

²⁰ Kaa nu maxel no tabax ne apootar we fo duleer we a mberna, too Kiristaa Yeesu fa xoox um a ref ɓil fer le.

²¹ Ten saƭkinu tabax ne boo ta waag o geenoox, ndax ta refat Mbind Roog tedu no Yaal oxe.

²² No ten, nu mboga nuun itam, no we tabaxeena, ndax nu ndefat ngenand Roog na pexey Yiif le ten.