Dañel 9 - NQAARIIT NE ROOG

A qeƭ ale Dañel

¹ Keeke xe jopir’a o hiid o feraand ole no maat Daryus fee o ƥiy Asuwerus fee fog’ina no Meemedi we, reeƭatna o maad oxe Babilon.

² Mi Dañel, ɓaaloogaam a safe ke no duleer we boo ga ee o Yaal oxe a yegin’a o tuleer Yeremi yee xan Yeerusaleem a fes a pec boo xa kiid qarɓeen ɓetuu ƭik.

³ Maaga, xeɗaam o Yaal oxe Roog es, ƴufginooxin, yoonandtin koor, deroox o saaku, yipoox ndaw.

⁴ Xeɗaam o Yaal oxe Roog es soo weejlin pakaad es ee: «Wo o Yaal oxe, Roog fa maak fa saɗarnooxu fee, wo fee na gayaa ngiɓoor of fo ngor of no we mbexoonga too a ngayaa kebil of,

⁵ i mbakaada, tooñ, soxod, siiknoor fa wo soo mbes a cinj kebil of fo bargal of.

⁶ I nan-gilooxee duleer we dag of layanoogoonga fo maad we in fo kelfa ke in fo daan we in fa xeet fa muum fee no saax le.

⁷ Wo o Yaal oxe, kaa o jof. In o mat, seeƈaar in a jaga fa in, in goor we Yudaa, we ngenna Yeerusaleem fo Ii-isra’el lakas we fop, matu yoo goƭu yoo kam a saax ake rax’oona a in fop yaam ngore’aƭar in na wo.

⁸ O Yaal oxe, seeƈaar in a jaga fa in, in fo maad we in fo kelfa ke in fo daan we in, yaam kaa i tooñong.

⁹ Kaa koy, wo o Yaal oxe Roog in, kam yirmande of kaa o waasanaa in, ke i siiknoorna fa wo fop oo.

¹⁰ I nan-gilooxee o ñuxur of, wo o Yaal oxe Roog in, too i ndeefee kebil ke daawnoona a in na pexey duleer we dag of.

¹¹ Ii-isra’el we fop ne da mbodeena a ƭapa kebil of, a nduux a koƥ, a mbañ o nan-giloox o ñuxur of. Kaa i tooñong boo a tax a salax ake mbindeena no kebil ke Moyiis fee o tag of a yen took in.

¹² Fadnaa ke yegnit’oona took in fo took kelfa ke ƭoxoogna a in, ɓisiid a in taamaala fa maak kam Yeerusaleem, too fa nandu neene mosee jeg sen took lanq ke.

¹³ Ne keene a bindteena no kebil ke Moyiis, taamaala keene fop a ndala a in, ndaa taxee i njeem o mandaxin xeeñ of, wo o Yaal oxe Roog in, mbañatong o tooñ soo ndeef o bug of.

¹⁴ Ten taxu, wo o Yaal oxe, fexeyaa boo taamaala keene a ndal a in, yaam wo o Yaal oxe Roog in, a pi of fop kaa njof, ndaa taxee i nan-giloox o ñuxur of.

¹⁵ Ndiiki koy, wo o Yaal oxe Roog in, wo fee sutitna xeet of no saax laa Misira fo o ɓay o mayu katil ole wo boo a tax gon of a layteel boo xaye, i mbakaada, tooñong.

¹⁶ O Yaal oxe, naa moofo a pi of kaa njof. Ngela ɓoosdandi fuux of fo ngañak of, mandaxin xeeñ of na Yeerusaleem fee teeru of, o joong o tedu le wo, yaam pakaad in fo tooñ ke no daan in taxu boo we mbidna a in fop a nqeef a Yeerusaleem fa xeet fee wo.

¹⁷ Ndiiki koy, wo Roog in, nan-gilooxi a qeƭ es fo a ƈufginax es, mi fee o tag of, ɗeet fa yirmande o mbiñ o tedu nqe wo gefeena, ndax gon of a niwel, wo o Yaal oxe.

¹⁸ Roog es, rungi nof of, nan-giloox! Kaam ee weti a kid of too ɗeet njom ne in fo ne teeru fee jegoodoona a gefteena! Refee yee o ngooloox a pi a cofu in taxu i nqeɗooxang, ndaa yirmande fa maak of soom taxun.

¹⁹ O Yaal oxe, nan-gilooxi a in! O Yaal oxe, waasani a in! O Yaal oxe, rungi nof of! Wo Roog es, ñofi ƴufig teeru fee fa xeet fee jegoodoona, ndax gon of a niwel!»

Xa kiid ɓetaa taq axe boo a caf qarɓeen ɓetuu ƭik

²⁰ «Maad’aam o xeɗaa, weejlaa pakaad es fo ke na Isra’el fee xeet es soo diisaa o Yaal oxe Roog es kaa farna no joong o tedu le ten.

²¹ Na waxtu fee sadax kirand a ɓoxoteel, a soƥ um maad o xeɗaa, Gaburi’el fee nandtoogna o koor, too um ga’’un no mbeeñil ne adooxna, a ñofa yetiid boo paam es.

²² A jangnaxam a layaam ee: ‹Dañel, kaam gar ndax um andnoorong.

²³ Ye feroona xeɗaa a Roog, a jaaɓaang, too kaam gar ndax um yegnong o ten, yaam a fexaang. Ndiiki koy, dami fa lay fee, and mbeeñil ne.

²⁴ Xa kiid ɓetaa ƭaq boo a caf qarɓeen ɓetuu ƭik a ndalnane xeet of fa teeru fa tedu fee wo, ndax njofaƭar a xon, bakaad fee a naag faq, tooñ ne a waasantel, soo o cofel ole na refkaa boo faw a dalnel, ndax mbeeñil ne fo ke o tuleer oxe a layna a mbadnoox, soo Oxe moƴna ted a ɗuumel.

²⁵ Andi kene boog: Ke xotitna no ke layeena yee xan Yeerusaleem a nomtel ne ta reeƭna, a maxatinel boo na kar ale na Kelfa fee na ɗuumkeel, xa kiid ɓetaa ƭaq boo a caf ɓetuu ƭik a refkaa. Cinj kaaga, teeru fee fo saŋe ke ten xan a maxatineel xa kiid ɓetaa ƭaq boo a caf qarɓeen ɓetuu fa leng fo a caf a ƭak, ndaa a pe a ƭomu a jopirkaa.

²⁶ A cinj xa kiid ɓetaa ƭaq axeene boo a caf qarɓeen ɓetuu fa leng fo a caf a ƭak, Kelfa fee ta soƥkaa ta ɗuumel xan a saŋkel, too jegkee oxaa rondanduuna. Cinj kaaga, xan kelfa a gar fo a yaj no xiixire um, a yaq teeru fee fo o mbiñ o tedu nqe, ndaa xan muukandoong um a fadtiid nen o jaɓ. Yaq fee xan a ret boo maa xire fee a fagitkaa. Roog o mat heblitun.

²⁷ Na xa kiid ɓetaa ƭaq xa palakaand axe, xan a gadin wiin mayu cerit ƭomu. Xa kiid axeene a ndokangaa a ndeer koy, xan a xañit sadax muumeen ke fo sadax tuufe-duufe ke sax. Cakalaaru ke sibdeena xan a sipel me moƴna goƭ took no Mbind Roog ne, boo yaa o yaayaq oxe sipuuna maaga a gefkeel tuƈ, ne Roog a dalnit’uuna no ten.› »