Dañel 4 - NQAARIIT NE ROOG

¹ «Mi Nebukadnesaar, kaam yaadoox’u, ɗaay bo no mbind no maad es.

² Bes, a jopir tige a yeng, wondooxaam no njong es too ɗaaɗaam kaa jaaxɗandaxama, feeñlel kaa wegna xoox es.

³ Maaga, heblitaam o xoyaniidel yaal-o-and we kam Babilon fop, ndax da tektaam o ƭaaɗ oleene.

⁴ Yaa maɗag we fo ɗeet we fo fan we fo saltiki ke a mbadiidna, wetandooxaam a den o ƭaaɗ ole, ndaa mbaag’iraam o lay ke ta tekitna.

⁵ Paktaand ke, Dañel fee ne’it’ateena a Beltasaar fee roog es too a may fo yiif le na Roog fa tedu fee a gara mbaambir es. Wetandooxaanum o ƭaaɗ ole mi ee:

⁶ Wo Beltasaar fee kelfa’na maɗag we, andaam ee mayaa fo yiif le na Roog fa tedu fee too kunpa fa leng laqooxirang. Layaam boog ke o ƭaaɗ es oleeke a tekitna:

⁷ Ye wondooxuuma no njong es, ga’aam ndaxar naa naagna lawlaw ndeer ee ndeer lanq ke.

⁸ Ndaxar neene koy, kaa moƴoogu moƴ o maakaa too a magnaa rek, boo o jul ole a duqataa a asamaan fee. Muu fodoona na adna fee, o ga’an.

⁹ Saqit le ten kaa neep’u bo, xa tim um a naang gañ, fop a ñoowaa teen. Muumeen ke na koƥ ale kaa yookooxoogu teen, tiiƭ ke a ndutaa na naaq um, mbindel nuu refna a xottaa no ten ñoowir um.

¹⁰ Ye maaduuma o wondooxaa no njong ne mi, ga’ahinaam malaaka fa tedu a fudoortiidaa na asamaan.

¹¹ A falalooxa fa doole yee: ‹Mbuuɓyo ndaxar ne, ngod a naaq ake, ƥoor saqit le, mboq xa tim axe, pasar a den! Fat muumeen ke yookooxna teen a ƈuf, tiiƭ ke a yetit na naaq um!

¹² Kaa koy, nqaƴyo fanq le fo a paƴ um a lanq, ndeer daaƭ le na xa ñar axe, morgin ceen njelem fo ceen xanjar. Fat a liim ale a yenaa took um, daaƭ le a ref a las um nen muumeen ke!

¹³ Baa yiif um a refat yiif no kiin, ndaa fat a saq sagu muumeen, ta refit keene boo xa kiid ɓetaa ƭaq!

¹⁴ Malaaka tedu ke ndalnu keene, ndax fop we na ñoowaa a and ee Roog fee Took-ee-took kelfa’u maat ke no wiin we, a ci’an oxuu feluuna too a waaga coox maat oxe moƴna hees no wiin we sax.›

¹⁵ Keene refu ke ɗaaɗuuma, mi o maad Nebukadnesaar. Yaaga boog, wo Beltasaar, tektaam o ƭaaɗ oleene, yaam o leng no yaal-o-and we no maat ne mi waagiraam o tekit o ten, ndaa wo o mat, waagaano, yaam yiif le na Roog fa tedu fee oxe fa wo.»

Dañel a tekta o ƭaaɗ ole no maad oxe

¹⁶ Dañel fee xoyoogeena Beltasaar a jaaxiɗ’a boo andatee kaa ta layna, xalaat um a diidlandin. O maad oxe a layaan ee: «Beltasaar, baa o ƭaaɗ ole fo ke ta tekitna a ndiidlandong.» Beltasaar a doonaan ee: «Daali maad, yaasam o ƭaaɗ ole fo a tekit um a dal took no fañ of!

¹⁷ Ndaxar ne ga’oona, too o jul ole ten a duqaa asamaan fee, boo muu fodoona na adna fee, o ga’an,

¹⁸ saqit le ten a neep bo, xa tim um a naang gañ, a ñoownaa fop, muumeen-a-koƥ ke a yookooxaa teen, tiiƭ ke a ndutaa na naaq um,

¹⁹ wo o mat oo, wo daali maad fee refatna o maad o maak o cegu doole, o magnel of a lawna boo a cuqaa asamaan, ngelfa of a xay boo no cat adna.

²⁰ Daali maad, ga’ahinaa malaaka fa tedu faa fudoortiidna na asamaan a heblit ee: ‹Mbuuɓyo ndaxar ne, yaqin pic! Kaa koy, nqaƴyo fanq le fo a paƴ ake a lanq ndeer daaƭ le na xa ñar axe, nu morgin ceen njelem fo ceen xanjar! Fat liim le a yenaa took um, daaƭ le a ref a las um nen muumeen-a-koƥ ke boo xa kiid ɓetaa ƭaq!

²¹ Daali maad, keeke refu ke ta tekitna, a ref ke Roog fee Took-ee-took a fosooxanoonga, wo daali maad o yaal es:

²² Xan o raxtel a ndeer no wiin we, genik fo muumeen-a-koƥ ke, ñoowtaa daaƭ nen qoox ke, soo liim le a yenaa took of. Xan a refit neene boo xa kiid ɓetaa ƭaq boo yaa o andkaa yee Roog fee Took-ee-took kelfa’u maat ke no wiin we soo a ci’an oxuu feluuna.

²³ Ke hebliteena koy ee fanq le fo a paƴ um a nqaƴel keeke a tektu: Xan o daawatin maat of, yaa o andkaa yee Roog fee na asamaan hame’u fop.

²⁴ Ten taxu, wo daali maad, xaƴi yiif of no keeke um asang: Waasi pakaad ke o fi’aa, jofnoox na pi a paax, fes tooñ of a cinj, yirim we toroxna. O fi’angaa keene, xeƈa xan o yaadax of a miñ fa wo.»

O ƭaad ole a fadnooxa

²⁵ Keene fop yegnit’eena a dala took o maad Nebukadnesaar.

²⁶ Yaa da moofna boo a njeg o hiid, o maad oxe a daaparooga no dung-took ole no mbind no maad ne ten kam Babilon

²⁷ too a laya yee: «Ndax meeke refee Babilon fa maak fee maxtuuma doole es, ta ref teeru no maad fee mi, a laltaa o niwel es fo o ndam es?»

²⁸ Ye o maad oxe a maadna o layaa, o ñuxur a nannoorta na asamaan ee: «Wo o maad Nebukadnesaar, koo fudnee no maat of.

²⁹ Xan o raxtel a ndeer no wiin we, genik fo muumeen-a-koƥ ke soo ñoowtaa daaƭ nen qoox ke. Xan a refit neene boo xa kiid ɓetaa ƭaq boo yaa o andkaa yee Roog fee Took-ee-took kelfa’u maat ke no wiin we soo a ci’an oxuu feluuna.»

³⁰ Ndak fo ndak, fa lay faaga a fadnooxa. Nebukadnesaar a raxte a ndeer no wiin we, a ñoowtataa daaƭ nen qoox ke, soo liim le a yenaa took um. Wiil um kaa jigid’atu boo nen a naf a canjiik, soo paambaañ um a njigdit nen paambaañ ndiiƭ.

Nebukadnesaar a woda

³¹ «Yaa xa kiid ɓetaa ƭaq axaa a mbaafna, mi Nebukadnesaar, yoɗaam a kid es farna fa asamaan too yegaam ee sagu es a nomtooxiida na mi. Dalfooxaam o ref no gidmaa oxe Took-ee-took, simataa soo ɓoxotaa o ndam Oxe na ñoowaa boo faw, maat um a refna bo na moos boo moos, ta maadooxaa no suk boo no suk!

³² Wiin we na adna fee fop ndefee tus mbaambir um. Kaa fesooraa fo xuu refna ne feltuuna, ta ref no malaaka ke mbaat no wiin we, too o leng waagee o xox katil um, mbaat ta soqin no ke ta fi’aa.

³³ Na waxtu faaga, sagu es a nomtooxiida na mi, um daawatin maat es fo ngiin maak es, maadooxataa fo o ndam. Aa-as we mi fo wiin maak we mi a nqotniidaxam, um dalnatinel no maat es, too o ndam es kaa moƴ’atu o magnaa.

³⁴ Ndiiki koy, mi Nebukadnesaar, kaam simataa, tagasaa soo ɓoxotaa o ndam o Maad oxe na asamaan. Ke ta fi’aa fop kaa xot a ƭat, a pi um a njof, too a waaga neewand we na ñoowaa na magnandax.»