Dañel 2 - NQAARIIT NE ROOG

O ƭaaɗ o eetaand ole Nebukadnesaar

¹ No hiid o ɗikandeer ole no maat um, Nebukadnesaar a ɗaaɗa, a jaaxiɗ teen boo ta yaqanin o ɗaan.

² A xoyna maɗag we, ɗeet we, ñaañango we fo fan we, ndax da layin ke ta ɗaaɗna. Yaa waaga a mbadiidna boo a ngeenoox mbaambir um,

³ a laya a den ee: «Kaam ɗaaɗ kaa jaaxlandaxama, too bugaam nu layaam o ten.»

⁴ A ndoona o maad oxe no ɗelem araam ee: «Daali maad, yaasam o xuuɗ! Layi a in, in we dag of, ke ɗaaɗoona, too yaaga xan i tektanong o ten.»

⁵ O maad oxaa doona a den ee: «Keeke refu ke hebooxuuma too watkee: Nu layangiraam ke ɗaaɗuuma fo ke ta tekitna, xan nu ƭegel teɓ-reɓ soo pind nuun a ndefik juum kefatin.

⁶ Kaa koy, nu layangaam o ƭaaɗ ole fo ke ta tekitna, xam saɗig a nuun, fi’an a nuun ɗang maak soo niwnoor a nuun. Yaaga boog, layaamoo o ƭaaɗ ole too tektaam o ten.»

⁷ A ndoonahina o maad oxe yee: «Daali maad, layi a in, in we dag of, ke ɗaaɗoona, too yaaga xan i tektanong o ten.»

⁸ Kaa koy, o maad oxe a laya a den ee: «Kaa nu miñandaa tige rek, yaam nu anda yee ke hebooxuuma watkee.

⁹ Nu layangiraam ke ɗaaɗuuma, xan o loq o leng ole a xaw a nuun. Kaa nu nga’ir a ndeer nuun, ndax nu layaam xa maaƥ xa ƥor fo xa peƭeñeŋke, cungaa tige a suptoox. Ndiiki koy, kaam bug nu layaam o ƭaaɗ ole, too yaaga xam and ee nu mbaagaan o tekit.»

¹⁰ A ndoona o maad oxe yee: «Daali maad, jegee o leng took lanq ke oxaa waagna o fi ke o simtaa, too kaa refeerna keene sax jegee o maad o leng, ta magin mbaat ta jeg katil, oxaa mosna o laamit nandu neene o maɗag mbaat o ƭeet mbaat o pan!

¹¹ Ke o simtaa kaa ɗom boo o leng waagirang o lay o ten, a refangee roog ke soom, too sax ngenee fo wiin we.»

¹² Maaga, o maad oxe a fuuxa boo a buɓaa too a heblita yee fat yaal-o-and we Babilon fop a mbarel.

¹³ Ye kebil neene a yegniteena, ndax yaal-o-and we a mbarel, Dañel fo yoon um itam a nqotke, ndax da mbarel.

Roog a feeñla a Dañel o ƭaaɗ ole no maad oxe fo ke ta tekitna

¹⁴ Dañel a laya fo o jeg-yiif fo o ƴiƴ fa Aryok fee kelfa’’ina yeeyetax we no maad oxe, sutoox’ina ndax ta war yaal-o-and we Babilon.

¹⁵ A laamtaan ee: «Xar taxu o maad oxe a cooxit kebil ñexettu neene?» Aryok a feedna a Dañel tigaa.

¹⁶ Maaga, Dañel a reta maa no maad oxaa soo a xeɗin ta ci’in a pe a leng-leng, ndax ta waagin o tekit o ƭaaɗ ole.

¹⁷ Yaa Dañel a xaadna, a laya a Hananiya fa Misa’el fa Asariya we yoon um ke tige a reeƭna,

¹⁸ a sim a den da ƈufginoox a Roog fee na asamaan, ta feeñil a den kunpa feene, ndax ten oo yoon um oo mbokatkaand fo yaal-o-and lakas we Babilon, a mbarel.

¹⁹ Maaga, kunpa fee a feeñle a Dañel kam o yeng ole, too a refa no simataa a Roog fee na asamaan

²⁰ ee: «Gon le Roog a hela simatel bo na moos boo moos, ten fee yaal o jeg-yiif fa katil!

²¹ Ten hame’u camaane ke fo baxtu ke, a maafaa maad we, a inaa a den. Oxuu jegna yiif, ten ci’ong o ten, oxuu jegna o and itam, no ten a hatu.

²² Ten na feeñlaa ke moƴna o ɗas, a and ke laqooxna no niɓaan ole, yaam a qoolaand ale kaa gen fo ten.

²³ Wo Roog fee no daan es, mexe gidmang, simatang, yaam ci’axamo o jeg-yiif fa doole, feeñlaam ke i nqeɗoogoonga, andnoor a in ke jaaxlandna o maad oxe.»

²⁴ Cinj kaaga, Dañel a reta maa Aryok fee o maad oxe a hebil’ina ta war yaal-o-and we Babilon, a layin ee: «Ba o warnoor yaal-o-and we Babilon! Ɓisaam maa no maad oxe, too xam tektanin ke ta ɗaaɗna.»

²⁵ Aryok a ñofa ɓis a Dañel maa no maad oxaa soo a layin ee: «Daali maad, a ndeer no we ɓistiidoona Yudaa, ga’aam teen o koor oxaa waagoonga o tektan o ƭaaɗ ole wo.»

Nitaal maak ne a caf um a yooɓna ngef

²⁶ O maad oxe a laamta a Dañel fee xoyoogateena Beltasaar ee: «Ndax waagaxamo lay o ƭaaɗ ole mi soo tektanaam o ten?»

²⁷ Dañel a doona o maad oxe yee: «Daali maad, kunpa fee o laamtaa, yaal-o-and we mbaat ɗeet we mbaat ñaañango we mbaat saltiki ke mbaagirang o mbeedin o ten.

²⁸ Kaa koy, a jega na asamaan Roog faa na feeñlaa kunpa ke. Ten na andnooriidang, wo o maad Nebukadnesaar, ke na xewkaa taa mbaambir. Keeke refu ke ɗaaɗoona ye ɗaanoona:

²⁹ Daali maad, ye wondooxoona kaa o ɗaaɗoogu ke na xewkaa taa mbaambir, too oxe na feeñlaa kunpa ke a lalaang ke na garaa.

³⁰ Mi koy, o ga’angaa um feeñlel kunpa fene, refee yee kaam moƴ o jeg yiif we na ñoowaa fop, ndaa kaa ref ndax o daawnel a tekit ale, wo o maad oxe, soo andat ke jaaxlandoonga.

³¹ Daali maad, keeke refu ke ɗaaɗoona: Ga’aa mbaambir of nitaal maak ngoƭu took naa o mosel um a jegeerna sen too a saɗarnoox bo.

³² Xoox le no nitaal neene wurus fa nqoolu a reeƭu, ngang um fo a naax um a ndef xaaliis, o fud um fo a ñaal um a ndef xanjar,

³³ a caf um a ndef njelem, soo takir um a ndef kene njelem, kene ƭok.

³⁴ Ɗeetoogaa nitaal neene boo neen ɓil a waaslooru no joong ole, too o ɓay no kiin duqiran, a dal no takir ke no nitaal ne, ndeeƭna njelem fo ƭok, soo a duguñ a den.

³⁵ Ndak fo ndak, njelem ne fo ɗok le fa xanjar fee fa xaaliis fee fa wurus fee a moxoñooxa, nqeñ ne a yetin a den nen ñaax laa na feeseel yaa fo ƈiid, boo tus teen ga’ataand. Ɓil le dal’uuna koy, a refata o joong o maak, a mayƭand lanq ke fop.

³⁶ Keene refu o ƭaad ole wo. Ndiiki koy, keeke refu ke ta tekitna:

³⁷ Daali maad, wo refu o maad oxe hupna no maad we fop. Roog fee na asamaan a ci’aang maat fa katil fa doole fo o ndam.

³⁸ A ɓoxota na xa ƥay of wiin we fo muumeen ke fo tiiƭ ke soo a ci’ong o maadoox took den fop fo muu da mbaagna o ndef. Wo refu boog xoox wurus le.

³⁹ Maat lakas naa moƴna o neew doole ne wo xan a yoɗoox a cinj of, soo a cinj neene maat ndadkandeer naa na refkaa xanjar fee a yoɗoox, a maadoox took lanq ke fop.

⁴⁰ Maat nahkandeer naa saƭikna nen njelem xan a doonoox. Ne njelem a duguñtaa soo a gefaa fop, neene maat neene a duguñitkaa soo a gef maat lakas ke fop.

⁴¹ Takir ke fo qol ke no nitaal neene ga’oona da ndef ƭok fo njelem, kaa tekit ee maat neene yoonkee a ndeer den. Kaa koy, xan a jeg no ten kaa saƭikna nen njelem, ne ga’toona njelem ne a jaxasoor fo ƭok ke.

⁴² Qol ke andoona yee njelem fo ƭok kaa njaxasoor’u teen kaa laltaa yee a seek a leng ale no maat neene xan a saƭik soo a seek a lakas ale a yooɓ o feñexu.

⁴³ Njelem ne ga’oona ta jaxasoor fo ƭok ke kaa tekit itam ee aa-adax we no maat neene xan a ngiɓoorit ndolnir, ndaa kiɓoor keene saƭikkee ne njelem ne fo ƭok ke a mbaageerna o ndamrit.

⁴⁴ No camaane ke no maad weene, Roog fee na asamaan xan a dalin maat naa gefkaandeena boo muk, too ɓoxotkaand na xa ƥay no qeet lakas ke. Maat neene xan a duguñ maat keene fop, too xan a ref bo na moos boo moos,

⁴⁵ ne ga’toona ɓil a waasloortiid no joong ole, too o ɓay no kiin duqiran, soo a duguñ njelem ne fa xanjar fee fo ƭok ke fa xaaliis fee fa wurus fee. Daali maad, Roog fa maak fee a andnooraang ke na xewkaa taa mbaambir. Keene deŋ ɗaaɗo, too a tekit ale layoonga a jare o ɓekit yiif.»

⁴⁶ Maaga, o maad Nebukadnesaar a deɓooxa na caf Dañel, a gung mbaambir um soo a simit ta ɓoxotel sadax fo qeeñe-xeeñe.

⁴⁷ Cinj kaaga, a laya a Dañel ee: «No ndigil Roog fee nuun hupu roog ke fop too ten kelfa’u maad we fop. Andaam ee ten soom na feeñlaa kunpa ke, feek tektanaxamo kunpa fene.»

⁴⁸ Cinj kaaga, o maad oxe a fi’a a Dañel a kag a maak, soo a cooxin ci’it mayu cegu o njiriiñ. A dodaan jaraaf fee no jegel ole Babilon fo kelfa no yaal-o-and we Babilon fop.

⁴⁹ Dañel a xeɗa o maad oxe ta ɓoxot a Sadrak fa Mesak fa Abed-Nego da ngadoox a ñaaƈnooƭ ale no jegel ole Babilon. Ten o mat a yoqa no mbind ne no maad oxe.