Dañel 12 - NQAARIIT NE ROOG

Jamaane naqad fo a qontax

¹ Malaaka fee a layahinaxam ee: «Na jamaane faaga, xan Mika’el fee refna kelfa fee no malaaka ke a feeñ, ten fee na saytooxaa xeet of. A koom xan a jeg coono fa maak faa moseerna o jeg naa xeet a sosooxu boo ndiik. Maaga, fop we mbogna na xeet of, too a kon den a mbindel no safe le no ñoow ole, xan a muc.

² Mayu no we na ƭaanaa kam lanq ke xan a yokoox, leng we a ndet no ñoow o fagkeer olaa, lakas we a ndet na gaci faa, a sibdel boo faw.

³ We njegna o and xan a meleƈ nen meleƈ le na asamaan, we aqatinna wiin mayu o cofel xan a miric-miricin nen xa qoor axe na asamaan, bo na moos boo moos.

⁴ Wo Dañel, ɗasni yegnit neene, too wegit safe lene o ñaasir boo yaa jamaane fee no muukandoong ne a fadiidna. A koom, xan wiin mayu a njangin, too xan o and den a ɓaatoox.»

Malaaka ƭik na ƥeeraamb ale no xuluɓ ole

⁵ «Mi Dañel, ye maaduuma o ɗeetaa, ga’aam no xuluɓ ole wiin ɗik lakas waa, o leng oxe a geenooxna na ƥeeraamb ale farna fa mi, o lakas oxe a fod kaltaa.

⁶ O leng na den a laamta o koor oxaa rokooxna ndoki njoor, a yooroox foofi le no xuluɓ ole yee: ‹Mban com’andtu kene a muukooxkaa?›

⁷ Maaga, o koor oxe rokooxna ndoki njoor, a yooroox foofi le no xuluɓ ole, a yoɗa o ɓay um o janoon farna fa asamaan, too nanaanum ta daaɓoortaa Oxe na ñoowaa boo faw ee: ‹Keene xan a xewaa boo xa kiid xa tadaq fa genwal, too yaa doole fee na xeet fa tedu fee a fagkaa, xan muukandoong ne no keene fop a gar.›

⁸ Nanaam fa lay feene, ndaa andinum. Ten taxu laamtaanum ee: ‹O yaal es, nam keene fop a muukoorkaa?›

⁹ A doonaxam ee: ‹Wo Dañel, reti na jam, yaam fa lay feene xan a ɗasnel, a ref kunpa boo na jamaane faa no muukandoong naa.

¹⁰ Xan wiin mayu a nqoolandel, a ndan-ginel soo a ƥogdel. Kaa koy, faaxaƭaru we xan a mbi’aa paaxeer too o leng na den andkee keene, ndaa we njegna a yiif xan a andin.

¹¹ No ke xotina a koom alaa sadax ke na ƥoxoteel a Roog bes fuu refna a ñufkeel, soo Cakalaaru ke sibdeena a sipel, xan ñaal juni fo ñaal teemeed ƭik fo ñaal qarɓeen ɓetuu nahik a mbaaf.

¹² Oxe na saƭikkaa no cungaa boo ñaal juni fo ñaal teemeed tadik fo ñaal qarɓeen tadik fo ñaal ƥetik a ɗaaya.

¹³ Ndiiki koy, wo Dañel, reti na jam boo yaa muukandoong ne a garkaa. Xan o ñootnoox too xan o inoox, jang a las of no muukandoong adna.› »