Dañel 1 - NQAARIIT NE ROOG

DAÑEL FO QAARIIT KE TEN ( 1:1—6:29 ) Xa pes axe kam mbind no maad ne Babilon

¹ No hiid o dadkandeer olaa no maat Yoyakim fee o maad Yudaa, Nebukadnesaar fee o maad Babilon a garana a Yeerusaleem, a widin o kurul-keƥ.

² O Yaal oxe a ɓoxota a Yoyakim fee o maad Yudaa na xa ƥay um, soo a xaƴin ta jang na xa ƥaxañ axe no Mbind Roog ne. Nebukadnesaar a ɓisa a Yoyakim fo wiin um Sine’aar took o hup doole, soo xa ƥaxañ axe, ta ɓek a den kam mbind ne no roog ke ten, a diƈ a den na kamba le.

³ Nebukadnesaar a hebla a Aspenaas fee kelfa’’ina cawdiin ke ten, ta jil a ndeer no Ii-isra’el we mbes leng-leng kaa mbogna no ƥasil no maad ne mbaat da ndef xa ƥiy karmi.

⁴ Mbes keene koy, sik fa leng war’ee ref no cer den, da mos, a njeg yiif, a ƈiƴ, a mbel a qoox, a mbaag o njal no mbind no maad ne, soo da njangnikel lak fee fo a pindooƭ ale no Kaakalde we.

⁵ O maad oxe a heblita da cooxeel no ñaamel leng kut ke ta ñaamaa fo a yer a leng kut ale ta yeraa, a njangneel boo xa kiid xa tadaq, soo a sogkan o njalan.

⁶ A ndeer no we njil’eena a jeg’a xa pes xa nahaq axaa mbog’ina na carind ale Yudaa, da ndef: Dañel fa Hananiya fa Misa’el fa Asariya.

⁷ Oxe kelfa’’ina cawdiin ke a ne’a a den a kon a kaakalde. A ferana a Dañel Beltasaar, Hananiya ta feranin Sadrak, Misa’el ta feranin Mesak, soo Asariya ta feranin Abed-Nego.

⁸ Dañel o mat kaa fosoox’u tigi yee roɗganditkee a xoox um ñaamel ke fa biiñ fee no maad oxe. A xeɗooxa boog oxe kelfa’’ina cawdiin ke, ndax serkaand o roɗgandit a xoox um ñaamel keene.

⁹ Roog a fi’’a boo oxe kelfa’’ina cawdiin ke a jeg o liir na Dañel,

¹⁰ ndaa a layaan ee: «O maad oxe fa xoox um o mat heblitu ke nu mbarna ñaamaa fo ke nu mbarna yeraa. Kaam diidaa rek ta ga xa ƭek axe wo a ƥomb, too axe no gend of ƥombee, too keene a waaga tax xoox es a ɗegel.»

¹¹ Maaga, Dañel a laya oxe Aspenaas a gadin’ina ta gaynaakan, ten fa Hananiya fa Misa’el fa Asariya yee:

¹² «Ngela jeemi topatoox a in, in we dag of, boo ñaal xarɓaxay kaa o cooxaa a in tuufe-duufe kaa i ñaamaa fo foofi laa i yeraa soom boo ga.

¹³ Cinj kaaga, fat o dendand a in fo mbes ke na ñaamaa no ke o maad oxe a ñaamaa boo ga ndax xan a jeg njektir, soo o sogkaa o fi na in, in we dag of, ke jofooxoonga.»

¹⁴ O koor oxaa a jaɓa kaaga, too a jeema fa Dañel fo yoon um boo ñaal xarɓaxay.

¹⁵ Cinj ñaal xarɓaxay keene den moƴ’atu soox soo a moƴ o njeg cer mbes ke ñaamoogna no ke o maad oxe a ñaamaa.

¹⁶ Neene, oxe gaynaakoogna a den a suura no cooxaa a den tuufe-duufe ke soom, a xaƴ ñaamel ke fa biiñ fee o maad oxe a heblit’ina da cooxel.

¹⁷ Roog a ci’a xa pes xa nahaq axeene a kortax fo o and o maak no kaa farna na pind ake fo o jeg-yiif. Dañel a doon’a teen a waag o tekit mbeeñil nuu refna fo o ɗaaɗ oluu refna.

¹⁸ Yaa xa kiid xa tadaq axe o maad Nebukadnesaar a dalin’ina yee ta ɓisiidel teen xa pes axe njil’eena fop a mbadna, oxe kelfa’’ina cawdiin ke a ɓisiidaan a den.

¹⁹ O maad oxe a laya fa den, den fop, ndaa jeg’ee na den oxaa ƴiƴit’ina nen a Dañel fa Hananiya fa Misa’el fa Asariya. Ten taxu o maad oxe a xota a den, da njalanan.

²⁰ A mbanuu o maad oxe a laamit’ina a den no kuu ta waagna waag o ref, too ta laamit o and fo o jeg-yiif, ke da ndoonoogna a gartooga took boo a caf xarɓaxay xa toonanqol axe no maɗag we fo ɗeet we no maat um fop.

²¹ Dañel a maad’a jalaa kam mbind no maad ne boo neen Kiirus fee o maad Persi a jaɓu a Babilon.