A ƭomatax ake 5 - NQAARIIT NE ROOG

A qeƭ ale na xeet fee kam naqad fee

¹ O Yaal oxe, wetandooxi ke dalna a in! Ɗeeti too ga ne i ngaci’noorteena!

² Mbaaxaan in a ƥoxote wiin jan, pind in a cooxel waa i andeerna.

³ Xa baan axaa njegateerna faap i ndefu, ya ke in a ndefat ñaaw.

⁴ Kuu i yerna rek, xaaliis a jaru, xa cuuƭ axe in, i njikaa a den.

⁵ Kaa i ngen no ñagadileel, too i nqijangaa sax oo, taxkee i nqaƴel ñootnoox.

⁶ I letna xa ƥay farna fa Misira fa Asuur, ndax i njeg ñaamel.

⁷ Daan in mbakaadu, ndaa maadatee, soo i ngomaa coono ke no njofaƭar den.

⁸ Faɗ na maadooxaa took in, too i njegee oxaa mucilna a in na xa ƥay den.

⁹ Kaa i suƭaa xa ñis in na baaƭ ñaamel, yaa i mboñaa laƥ ne kam a koƥ-a-ƥor ale.

¹⁰ Ƭool in kaa ilaa nen kaa ɓekeena no ndoxand yaam nqeex ƭomu ne.

¹¹ Rew we a ngigne kam Siyoŋ fo mboƥ ndoog ne andafuleerna adna kam teeru ke Yudaa.

¹² A ndoka kelfa ke o ƥaak no cok, too nogoy we ci’aand cer.

¹³ Mbes ke kaa serel o mbirlaa a ƥil a unir ake, soo xa koor axe a tolofaa yaam toq ke na xa cuuƭ axe.

¹⁴ Nogoy we nga’ataand no qel ke, o nqilimb onqe no mbes ke nanataand.

¹⁵ O ɗaay a ñufa na qeeñ in, o mbec in a suptoox ñaawax.

¹⁶ O ndip onqe no xoox in a yena! Sabab took in, yaam i mbakaada!

¹⁷ O ga’angaa i njeg ɗom na qeeñ in, a kid in a niifaarat,

¹⁸ ne o joong ole Siyoŋ a fesna a pec taxun, boo xa ƥox-a-koƥ axe a njoqooyooxataa teen.

¹⁹ Wo o Yaal oxe, kaa o maadooxaa boo kili, uum-maamaad of a ref no suk boo no suk.

²⁰ Xar na taxkaa o weec a in boo faw, waas a in pelek?

²¹ Wo o Yaal oxe, nomtiidi a in me wo, too xan i nomtooxiid! Ci’ahini a in a pe nen ake yaaga!

²² Ndi toox kaa o deɓkaa a in boo xoo, fuuxan a in boo ta hup?