A sutax ale 5 - NQAARIIT NE ROOG

Moyiis fa Aaroon mbaambir no maad oxe Misira

¹ Cinj kaaga, Moyiis fa Aaroon a ndalfooxa o ndet paam Firawon fee, a layin ee: «O Yaal oxe Roog fee Isra’el kaa tee: ‹Xaƴi xeet es da ndet, a ndoofandankaam xew na koƥ-a-ƥor alaa.› »

² Firawon fee a doona a den ee: «An refu o Yaal oxe boo um war o nanan o ñuxur um, xaƴaa xeet fee Isra’el da ndet? Andiim o Yaal oxe too xaƴkiim a den da ndet.»

³ A laya yee: «Roog fee in, in Hebre we, a feeñooxa a in. Xaƴi a in i ñaaƴ boo ñaal tadik kam a koƥ-a-ƥor alaa, ndax i ƥoxotin sadax, ten fee refna o Yaal oxe Roog, ndax xawitkee a in piste mbaat xire.»

⁴ Maaga, o maad oxe Misira a laya a den ee: «Wo Moyiis fa Aaroon, xar taxu nu yaqanaa xeet fee calel? Nuun itam, aca, ndetyo mbi’ik calel nuun!»

⁵ A doona teen ee: «Wiin weene a saqtata kam saax le, soo nu mbug o ngeenin calel den!»

Firawon fee a ɓaata calel ke na xeet fee Isra’el

⁶ No ñaal naaga sax Firawon fee a hebla yeeyetax Miimisira we fo Ii-isra’el we adooxanoogna xeet fee no calel ke yee:

⁷ «Ba nu cooxat xeet fee a soɓoñ a soƈe kaa da mbi’itna a muul nen mberaand naa. Fat a ngeewanik a qoox den.

⁸ Fat nu ser a den ngap a muul a podne da mbi’oogna. Ba nu mbañ teen dara, yaam feeñaak a ndefu. Ten taxu da makaa, a layaa yee: ‹Fat i ƥoxotik a Roog in sadax!›

⁹ Fat wiin weene a serel calel. Fat a njal, a mbootoox o nan-giloox xa ƈaq.»

¹⁰ Yeeyetax we fo we adooxanoogna calel ke a ngara, a lay xeet fee yee: «Keeke Firawon fee a layu: ‹Cooxkatiim a nuun a soɓoñ a soƈe.

¹¹ Ndetyo ngeewanik a qoox nuun muu nu mbaagna o njegit, ndaa o leng wañkee tig no calel nuun.› »

¹² Xeet fee a pictooxa kam saax le Misira fop, a ngisaa a soɓoñ ake, a mbañ o mbaaƭ a soɓoñ a soƈe.

¹³ Yeeyetax we a ŋalooga a den, a layaa yee: «Ñaal nuu refna fat nu mbagɗaa calel nuun ne nu mbi’tooguuna, ye nu ndaawaa a soɓoñ a soƈe.»

¹⁴ Kaa nqawoogu sax we da ndod’ina da adooxan calel ke no Ii-isra’el we. Kaa da layoogel ee: «Yaam fa xar nu mbi’ee a muul a podne nu mbar’ina o mbi faak fa xaye ne nu mbi’tooguuna yaaga?»

¹⁵ We adooxanoogna calel ke no Ii-isra’el we a ndeta, a loolik maa Firawon fee too a layin ee: «Xar taxu o ñagadiltaa a in neene, in we faɗ of?

¹⁶ I cooxataand a soɓoñ a soƈe too i layel ee: ‹Mbi’yo a muul!› Ga’i koy, ne i nqawteel bo, too xeet of gartun!»

¹⁷ Firawon fee a doona yee: «Feeñaak nu ndefu ndef rek, ten taxu nu layaa yee: ‹Fat i ƥoxotik o Yaal oxe sadax!›

¹⁸ Ndiiki koy, ndetyo njalik. Nu cooxkataand a soɓoñ a soƈe, too xan nu mbi a muul a podne nu mbi’oogna.»

¹⁹ We adooxanoogna calel ke no Ii-isra’el we a nga’a yee kaa toroxandoogel, a layeel ee: «Nu mbañkee dara na muul ake nuun. Ñaal oo ñaal fo calel um oo.»

²⁰ Ye da sutooxna maa Firawon fee, a ndigana a Moyiis fa Aaroon we cungoogna a den.

²¹ A laya a den ee: «Yaasam o Yaal oxe a doon a ngid um took nuun too a hate a nuun, yaam kaa nu ngoƥat a in fa Firawon fee fo dag we ten, coox a den laƥ na xa ƥay den, ndax da saŋik a in.»

²² Maaga, Moyiis a nomtooxa maa no Yaal oxe, a layin ee: «O Yaal oxe, xar taxu o fi paaxeer na xeet feeke? Xar taxu o lulaam?

²³ Naa retum maa Firawon fee, ndax um layit gon of, kaa fi’aa xeet fene paaxeer rek, too watiidiro a den.»