A pi ake 9 - NQAARIIT NE ROOG

Sool a gimata na Yeesu

¹ Na pe akaaga koy, Sool a maad’a diirooxanaa daalbe we no Yaal oxe, ndax ta war a den. A soƥka o saasadax o maak oxaa,

² too a laacin xa leetar, ndax ta lalit a den no pind a qeƭ kaa na teeru faa Damaas. Ke ta bug’ina koy refu yee a soƥangaa maaga waa na ndeefaa a ƭat ale no Yaal oxe, ta ref o koor mbaat o tew, ta jeng a den, a ɓis a den Yeerusaleem.

³ Ne ta maad’ina o refaa na ƭat, too a matiidaa a Damaas, ndak fo ndak a qoolaand a inoortiida na asamaan, a meleƈaa paam um.

⁴ A yena a lanq, too a nana o ñuxur olaa layooguuna yee: «Sool, Sool xar taxu o ñagadilaxam?»

⁵ A laamta yee: «Wo an oo, o Yaal oxe?» Maaga, o ñuxur ole a doonaan ee: «Mi yoo, mi Yeesu fee o ñagadilaa.

⁶ Inooxi rok kam teeru fee! Xan o layel ke waroona o fi.»

⁷ Wiin we yoon’ina fo ten kaa ngeenoox’u, a ndam xa ton. A nanooga fangax, ndaa nga’ee o leng.

⁸ Sool a inooxa, ndaa ke ta ɗeetoogna fop oo, ga’oogee tus. A dame no ɓay, a ɓisel Damaas.

⁹ A jega maaga ñaal tadik kaa andoona yee ga’ee, too ñaamee yeree.

¹⁰ Kam Damaas koy a jeg’a o taalbe xaa ne’eena Anañaas. O Yaal oxe a layaan no ƭaaɗ ee: «Anañaas!» A doona yee: «Mexey, o Yaal oxe.»

¹¹ Maaga, o Yaal oxe a layaan ee: «Inooxi ret na ƭat ale ne’eena a Ƭat a cagu le. Ɗeeti kam mbind Yudaa o koor oxaa ne’eena Sool, a rimel kam teeru faa Tars. Oxaa maaga, a xeɗaa.

¹² Kaa ga no mbeeñil o koor oxaa ne’eena Anañaas a rokiid, a doonin o ɓay, ndax ta ga’atin.»

¹³ Anañaas a doona yee: «O Yaal oxe, nantaam no wiin mayu, da layaa paaxeer ke o koor oxeene a fi’na we mbogna na wo Yeerusaleem.

¹⁴ Meeke sax, a jega sañ-sañ kaa ngatiidna no saasadax maak we, ndax oxuu na ƴufginoortaa gon of a jengel.»

¹⁵ Kaa koy, o Yaal oxe a layaan ee: «Inooxi rek! Yaam kaam jil o koor oxeene, too xam jiriiñoorin, ndax ta ɓis gon es mbaambir no qeet ke fo mbaambir no maad den fo mbaambir xeet fee Isra’el.

¹⁶ Xam lalin ke ta warna o torox fop yaam gon es.»

¹⁷ Anañaas a inooxa, too ye ta fadiidna no mbind ne, a doona xa ƥay um took Sool, a layin ee: «O pog es Sool, o Yaal oxe Yeesu Kiristaa, feeñoox’oonga na ƭat ale ye o garaa, luliidaxam ndax o ga’atin, too may fo Yiif Tedu le.»

¹⁸ Na waxtu faaga sax, kaa nandna nen xa ñaƥ axaa na miric-miricnaa a yenta na kid um, too a ga’atina. A inooxa, a batiise’el.

¹⁹ Cinj kaaga, a ñaama, soo a jegatin doole. Sool a yoqa fo daalbe we ndeeƭna Damaas a pe a leng-leng.

Waare fee Sool kam Damaas

²⁰ Ndak fo ndak, a waare’ooga kam pind a qeƭ kaa yee Yeesu refu o Ƥeenqe Roog.

²¹ Waa nan’uuna fop kaa njaaxiɗ’u, too a layaa yee: «Mee ndax oxeeke ñagadiloogu we ƈufginooroogna gon leene kam Yeerusaleem? Mee ndax ten gar’u meeke ndax ta jengnoor a den, a ɓis a den mbaambir no saasadax maak waa?»

²² Sool koy, a moƴ’a o saƭkaa, too a jaaxɗand’a Yaawuur we ngenna Damaas, yaa ta lalaa a den ee Yeesu refu Kiristaa fee, o Muumucil oxe regteena.

²³ A cinj a pe a leng-leng, Yaawuur waa a mbaaja ndax da mbarnoor a Sool,

²⁴ ndaa Sool a yega yuuƥ ne den. Kaa yetooxoogu xa ton-maax axe na teeru fee, ndax da nquuf ñoot o ñis um.

²⁵ Maaga, daalbe we a njangaan o yeng, a ƥekin na cenjel, soo a njolnin no saax o lakas ole no saŋe naa.

Sool a fadiida Yeerusaleem

²⁶ Ye Sool a fadiidna Yeerusaleem, a jeemooga o hiɓoor fo daalbe we, ndaa fop kaa saɗar’u, yaam ngim’ee a paax ee Sool o taalbe a reeƭatu.

²⁷ Maaga, Barnabaas a jangaan, a ɓisin no apootar waa. A wetandooxa a den ne Sool a ga’it’ina o Yaal oxe na ƭat ale fo ne ta layit’ina fo ten. Barnabaas a wetandooxa a den itam ne Sool a waare’toogna fo njambaar no gon le Yeesu kam Damaas.

²⁸ A koom o mat a refu fa den, a rokaa a sutooxaa fa den kam Yeerusaleem, a waare’aa fo njambaar no gon le no Yaal oxe.

²⁹ Kaa layoogu itam, too a ñimatiraa fo Yaawuur we na layaa a gerek, ndaa weene kaa mbaaƭoogu maa da nquufitna ñoot o ñis um.

³⁰ Yaa fog gimu waa a yeguuna, a ƥisaan Kesare, soo a ngeblin ta ret Tars.

³¹ O fog ole no gimu we a ref’ata na jam kam xa cegel axene fop: Yudee fa Galile fa Samari. Kaa jokooxoogu, a ñoowaa no saɗar o Yaal oxe, soo a xayaa no pexey o ndimle nqe no Yiif Tedu le.

Enee a wodande

³² Piyeer a widooga saax laa fop. Neene itam, a reta bes farna fo gimu we ngen’ina Lid.

³³ A soƥa maaga o ƥoof o ne’e Enee a wondoox took njong boo xa kiid ɓetaa tadaq.

³⁴ Piyeer a layaan ee: «Enee, Yeesu Kiristaa a wodandaang. Inooxi doran a xoox of njong of!» Ndak fo ndak, a inooxa.

³⁵ Waa ngen’ina Lid fo kam xa saawit axe Saron fop a nga’aan, too a ngim’ata no Yaal oxe.

Tabita a xontooxnoore

³⁶ Kam teeru faa Yope, a jega ndeer no daalbe waa o tew oxaa ne’eena Tabita (kaa layeel Dorkas no ɗelem gerek, ta tekit «mbat ne»). Oxeene kaa fi’oogu a pi a paax a mayu, a sadaxtaa.

³⁷ Na pe akaaga, o tew oxeene a yena jir boo a xon. Ye da ƥoguuna, a ndoonaan na ndok-took alaa.

³⁸ Daalbe we ndeeƭna Yope a nana yee Piyeer oxaa Lid, paam Yope. Naaga, a lula wiin ɗik maa Piyeer, ndax da layin ee ta ñof o jaaɓiid a den.

³⁹ Piyeer a naaga daket a inoox, a yoon fa den. Ye da mbadiidna, a ƥisaan na ndok-took alaa. Ñaaw we fop kaa mbid’un o kurul-keƥ, a ndef na xa lool, a lalan sabadoor ke fo xa porok axe Dorkas a ɗiisoogna ye ta refaa fa den.

⁴⁰ Piyeer a suta wiin waa fop tafil. Maaga, a gooknooxa, a xeɗ. Cinj kaaga, a faambra fo o dal ole, too a layin ee: «Tabita, inooxi!» O tew oxe a weta a kid um, too ye ta ga’na a Piyeer, a inooxa, a moof.

⁴¹ Piyeer a cooxaan o ɓay, soo a geennin. Cinj kaaga, a xoya gimu we fo ñaaw we itam, soo a lal a den o tew oxe na ñoowatinaa.

⁴² Kaaga a nannooxa kam Yope fop, too mayu a ngim’ata no Yaal oxe.

⁴³ Piyeer a moof’a Yope no mbind no koohoora o ne’e Simoŋ boo a miñ.