A pi ake 8 - NQAARIIT NE ROOG

¹ Sool a yoon’a na bar ale Eceen. No ñaal naaga ñagadil maak a rope took o fog ole no gimu we ndefna Yeerusaleem. Gimu waa fop bo ta yoqaa apootar waa, a pictoox’a kam o jegel olaa Yudee fo saax laa Samari.

Sool a ñagadila gimu we

² Leng-leng waa ngimna na Roog a njanga a Eceen a ngaskin, a nqaaraandin o xaaraand o maak.

³ Kaa koy, Sool o mat, kaa firɓandoogu o fog ole no gimu we, a rokaa kam pind ke, a damaa gimu we, goor fo rew, a wegnooraa a den kaso.

Filip kam Samari

⁴ We pictoox’ina koy a mbidooga saax laa fop ndeer o mbiñ fo mbiñ, a yegnitaa Yegil mbaax ne.

⁵ Filip a reta na teeru fa maak faa Samari, a waare’aa maaga kaa jofna na Kiristaa fee, o Muumucil oxe regteena.

⁶ Faan laa fop a naag’a tek, a nan-gilooxaa a Filip ta waare’aa, ye da nanna fa lay um, a nga xa anddiloor axe ta fi’na.

⁷ Cini ke kaa sutooroogu no waa njir’ina, a mbuuqaa a maak, too mayu no waa ƥoofna fo no waa lafañna a mbod’a.

⁸ O ɗaay o maak a jeg’a na teeru faaga.

⁹ A jeg’a o koor oxaa miñ’ina kam teeru faaga koy, too a ne’el Simoŋ. O ñaañango a reeƭu, too a jom’and’a wiin waa Samari lool. Kaa fi’ooxoogu o kiin o maak.

¹⁰ No ke xotitna no mboƥ ne boo no maak we, kaa mbuudoogun, a layaa yee: «Oxeeke refu katil fee Roog na xoyeel Katil fa Maak.»

¹¹ Kaa mbuudoogun, yaam kaa miñ’u o jaaxɗand a den na ñango fee ta fi’oogna.

¹² Kaa koy, ye da ngimna Yegil mbaax ne Filip a waare’oogna a den no kaa farna no Maat ne Roog fo no gon le Yeesu Kiristaa, goor fo rew a mbatiise’e.

¹³ Simoŋ fa xoox um sax a gima, too a batiise’e itam. No kaa xotitna no kaaga, goƭoogatee a Filip, too a jaaxiɗ’a ye ta ga’na xa anddiloor xa maak axe fo a pi katil ake njegoogna.

¹⁴ Yaa apootar waa ndeeƭna Yeerusaleem a nanna yee Saasamari waa a ndaawa fa lay fee Roog, a lula maaga a Piyeer fa Saŋ.

¹⁵ Waaga a mbadiida maa no Saasamari waa, too a nqeɗana a den, ndax da ndaaw Yiif Tedu le,

¹⁶ yaam fudoox’afulee no leng na den. Kaa mbatiise’el soom no gon le no Yaal oxe Yeesu.

¹⁷ Maaga, Piyeer fa Saŋ a ndoona a den xa ƥay, too a ndaawa Yiif Tedu le.

¹⁸ Ye Simoŋ a ga’na yee gimu we a ndaawa Yiif Tedu le ye apootar we a ndoonna xa ƥay took den, a neexliida a Piyeer fa Saŋ xaaliis,

¹⁹ too a lay ee: «Mi itam, ci’aam sañ-sañ feene, ndax oxuu doonuuma o ɓay, ta daaw Yiif Tedu le.»

²⁰ Kaa koy, Piyeer a doonaan ee: «Yaasam o saŋkoox fa xaaliis of, yaam kaa o foog ee ci’it ne Roog boo o daawan, o jiktin xaaliis!

²¹ Jegiro a las mbaat cer no keene, yaam xeeñ of kaa jofaƭar mbaambir Roog.

²² Ricooxi paaxeer of keene, too xeɗ o Yaal oxe, ta waasanong o nqalaat of onqeene, a waagooxangaa,

²³ yaam ga’aam ee kaa o xaaɗ xut, soo ref o paɗ bakaad.»

²⁴ Maaga, Simoŋ a doona a Piyeer fa Saŋ ee: «Nuun itam, nqeɗanaamoo o Yaal oxe, ndax dara no ke nu layna daawkiraam.»

²⁵ A cinj ye Piyeer fa Saŋ a seede’na, too a mbaare fa lay fee no Yaal oxe boo a ƈut, a nomtooxa Yeerusaleem. Ye da ndefna na ƭat, a mbaare’ooga Yegil mbaax ne kam caate mayu no saax laa Samari.

Filip fo o koor oxe genna Ecopi

²⁶ Malaaka no Yaal oxe a laya a Filip ee: «Inooxi ret farna fo o ɓemb-roog o ñamaak. Reti na ƭat a bootu laa inoorna Yeerusaleem na teeru faa Gaasa.»

²⁷ Filip a inooxa, a ret, too a jopra maaga fo o koor o ken’u no saax laa Ecopi. O koor oxaaga koy kaa yoomnoor’el, a ref jawdiin Kandaak fee tekitna o maad o tew oxe Ecopi, too a geekoogu a kamba le ten. Kaa faɗook’u a Roog Yeerusaleem,

²⁸ boo a xaadaa. A moofa na sareet um, soo a jangaa a maak safe le no tuleer Esayi.

²⁹ Yiif Tedu le a laya a Filip ee: «Siipi, too matik a sareet alaaga!»

³⁰ Filip a ƴufiida, too a nana jawdiin faa a jangaa safe le no tuleer Esayi. A laamtaan ee: «Ndax andaa ke o jangaa?»

³¹ A doona a Filip ee: «Nam um waagkaa o andit ke keene a tekitna, um jegangee oxaa tektanaxama o ten?» Cinj kaaga, a xaƴa a Filip ta ŋaay took a sareet ale, a moof paam um.

³² Keeke refu fa lay fee na Pind a Tedu ke ta jangoogna: «Kaa nand fo mbaal naa na ɓiseel no warand, nen o mbaal onqaa muumna mbaambir no xe na ruusan, too yaƥatee o don um sax.

³³ Kaa neewand’el, too cooxaand ɓur leng. An na waagkaa o lay kaa farna no kurcala um, yaam o ñoow um a xuufe no lanq ke?»

³⁴ Jawdiin faa a laamta a Filip ee: «Mexe xeɗang o layaam oxe o tuleer oxe a laytaa neeke. Ndax xoox um a ne’aa ndi o lakas?»

³⁵ Maaga Filip a dalfooxa o kaf fa lay faaga na Esayi, a ref no tektan Yegil mbaax ne no kaa farna na Yeesu.

³⁶ Ye da maadna o ndetaa koy, a ndaawa o mbiñ onqaa jegna foofi, too jawdiin faa a layaan ee: «Mee ndax keeke foofi yoo, xar yaqanu o batiise’aam?» [

³⁷ Filip a layaan ee: «Boo gimoona no xeeñ of fop, a waagooxa.» Jawdiin faa a doonaan ee: «Gimaam ee Yeesu Kiristaa refu o Ƥeenqe Roog.»]

³⁸ A cinj kaaga, a geenna a sareet ale. Filip fa jawdiin faa a mbudooxa kam foofi le den ɗik fop, too Filip a batiise’aan.

³⁹ Ye da sutooxna foofi laa, Yiif Tedu le a gifa a Filip. Jawdiin faa ga’atiran, ndaa a xota a ƭat um, a ɗaay bo.

⁴⁰ Filip koy oxaa reeƭa Asdod, a inoor maaga, a waare’aa Yegil mbaax ne kam teeru ke fop boo neen a fadiidu Kesare.