A pi ake 6 - NQAARIIT NE ROOG

Diidimle we njileena

¹ Na jamaane faaga, a soƥ daalbe we a ƥaatoox, we layoogna a gerek na den a ñuxmatilooxooga no we layoogna a hebre. Kaa layoogu yee ñaaw we den kaa mbeecoogel no ñoow ole da nqaajroogna mbeet oo mbeet.

² Maaga, apootar xarɓaxay fo apootar ɗik waa a mbokata daalbe waa, a lay a den ee: «Jofkee tus, yaa i nqaƴna fa lay fee Roog i mbaare’aa, soo ndam no lasraa ñoowir.

³ Ten taxu fog we, njilyo a ndeer nuun goor ɓetuu ɗik waa andteena paax, too a may fo Yiif Tedu le fo o and, i ndoxin a den calel keene.

⁴ Neene itam, in fa qoox in, xan i mbaag o ndam no nqeɗaa, too ndef no calel ke na waare fee.»

⁵ Kaa lay’eena a fel’a mbokatax naa fop, too a njila a Eceen, o koor o mayu o ngim fo Yiif Tedu le, fa Filip fa Porokoor fa Nikanoor fa Timon fa Parmenaas fa Nikolaa fee rimeena na teeru faa Ancook, too a tuub’u na ƭat ale no Yaawuur we.

⁶ Cinj kaaga, a lala a den apootar waa. A nqeɗana a den, a ndoon xa ƥay took den.

⁷ Fa lay fee Roog a moƴ’a joot, daalbe we a moƴ o may kam Yeerusaleem, too mayu no saasadax we a ngima na Yeesu.

Eceen a dame

⁸ Yirmande fee Roog a mayƭanda a Eceen fa katil, ta fi’aa comlaand fo xa anddiloor xa maak ndeer xeet faa.

⁹ Goor leng-leng a mbañrooga fo ten: Den ndeeƭu we mbog’ina no mbind a qeƭ naa xoyoogeena «Mbind ne no Faɗ wate we», weeke Yaawuur we Kireen fo we Aleksandiri, lakas we a ndef Yaawuur we Silisi fo we Asi. Wiin weene fop kaa ñimatiroogu fa Eceen,

¹⁰ ndaa mbaag’iran o ƥur, yaam kaa laytoogu o and ole Yiif Tedu le a ci’taa.

¹¹ Maaga, a neexla wiin, ndax da lay ee: «I nana ta wenaa a Moyiis fa Roog.»

¹² Keene a taxa boo xeet faa fo maak waa fo jaajangin waa no kebil kaa Moyiis a mbuuxan a Eceen. A yena took um, a ndamin, too a ƥisin no Mal maak naa.

¹³ A ƥisiida itam seede maamaaɓ waa layna yee: «O kiin oxene koy, waaskee o wenaa Mbind Roog ne fo kebil ke Moyiis muk!

¹⁴ Yaam i nana ta layaa yee Yeesu o Naanasaret oxe xan a gef o mbiñ onqene, a supit o mbaax onqe Moyiis a waasanna a in.»

¹⁵ Waa ndeeƭna no moofand olaa no Mal maak naa fop kaa naang’u a Eceen jak a kid, too a nga’a mukit um a nand nen mukit malaaka.