A pi ake 5 - NQAARIIT NE ROOG

Anañaas fa Safira a maaɓa Yiif Tedu le

¹ Kaa koy, bes, o koor o ne’e Anañaas fo o teem Safira a njofoora, ndax da njikoox o qol den olaa da mbog’ina.

² Ye da njikooxna boo a ƈut, o koor oxe a ɗasna a seek a leng na xaaliis fee da njegna, soo a ɓis ke yoqna, a doonin na xa ƥay no apootar we. O teem koy a and’a kaaga fop.

³ Maaga, Piyeer a laamta a Anañaas ee: «Ndi xar taxu Saytaane a mayƭand xeeñ of boo o maaɓaa Yiif Tedu le? Xar taxu o ɗasin a seek a leng ale na xaaliis fee o qol ole a watna?

⁴ Mee ndax wo jeg’un ye ta jarafuleerna? Andiro yee xaaliis fee, xaaliis of a reeƭu itam? Xar taxu o ɓalginaa o laaw of? Naxiro wiin we toox de, Roog o mat naxo!»

⁵ Yaa Anañaas a nanna fa lay faaga, a yena, too a ɓut. Waa nan-gilooxoogna fop a ndiida diid maak.

⁶ Leng-leng no mboƥ ngoor naa a ngara, a ñirin, soo a ngaskin.

⁷ Cinj ngap baxtu tadik, o tew Anañaas a fadiida, too yegee tus no ke xew’ina.

⁸ Piyeer a laamtaan ee: «Layangaam koy ndax ke nu ƥisiid’ina rek o qol ole a jaru.» O tew oxe a doonaan ee: «Ii, keene a jaru de!»

⁹ Piyeer a doonaan ee: «Xar taxu boog nu ngiɓ o ngir, ndax nu nax Yiif le no Yaal oxe? Ga’i, we ngasik’ina o kor of owaay na carind ale, too xan a ƥisong itam.»

¹⁰ Na waxtu faaga sax, o tew oxe a yena na caf Piyeer, a ɓut naaga. Yaa mboƥ ngoor naa a ndokiidna, a soƥaan ta xon, too a ƥisaan, a ngeekin paam o kor um.

¹¹ Maaga, diid maak a dama mbokatax ne no gimu we fo fop we andoona yee a yeg’a ke xew’ina.

Comlaand mayu a mbi’e kam Yeerusaleem

¹² Xa anddiloor xa mayu fo comlaand mayu a mbi’ooge kam xeet faa na pexey apootar we. Gimu waa fop kaa mbokatooroogu ɗuga jibir fee ne’eena Jibir Salomo.

¹³ O leng no lakas waa koy saɗ’ee o matiid a den, ndaa xeet faa kaa simatoogu a den a maak.

¹⁴ Mayu a ngimoogata no Yaal oxe, goor fo rew, a ƥaatooxaa no gimu waa.

¹⁵ We njirna kaa ƥisiidoogel kam ped ke, a mbondneel took cong fo na xa sar, ndax Piyeer a jooniidangaa, mbelyook um a waag o rok wiin leng-leng na den boog.

¹⁶ Faan no wiin kaa inoortiidoogu no teeru kentand kaa mbidna a Yeerusaleem itam, a ƥisiidaa jiru fo waa cini a ndamna, too a mbodooga den fop.

Apootar waa a ndame

¹⁷ Maaga, o saasadax o maak oxaa fo we ndeeƭna fo ten fop, ndefna ndef we mbog’ina na qaaj ale no Sadusiya we, a inooxana apootar we, a ƈaxooxaa fo ciis.

¹⁸ Naaga, a mbaara a caf o mbap den na den, soo a ƥek a den na kaso faa na teeru faa.

¹⁹ Kaa koy, o yeng o njeek, malaaka no Yaal oxe a weta begax kaa na kaso faa, a sut a den, soo a lay a den ee:

²⁰ «Ndetyo moof no Mbind Roog naa, yegin xeet fee fa lay fuu jofna no ñoowooƭ olene.»

²¹ Apootar waa a nanana, too nqes teelu, a ndeta no Mbind Roog naa, a njangnaa maaga. O saasadax o maak oxaa fo we yoon’ina fo ten a nqoyna maak waa na xeet fee Isra’el fop, ndax da mbokat Mal maak ne. Cinj kaaga, a lulta apootar waa na kaso faa.

²² Yaa waa luleena a mbadna, soƥee apootar waa na kaso faa. A nomtooxa maa no Mal maak naa, a mbetandoox a den ee:

²³ «Kaa i soƥ kaso faa a wegel boo a xen, soo waa yetooxoogna a ngeenoox paam begax kaa, ndaa yaa i mbetna, i soƥee o leng kam faa.»

²⁴ Yaa oxe adooxan’ina yeeyetax we no Mbind Roog naa fo saasadax maak waa a nanna fa lay faaga, a ndefa no nqalaataa no ne apootar waa a mo’itna. Kaa cungoogu ke na doonooxkaa no kaaga.

²⁵ Maaga, o qoy o leng a gara, a lay a den ee: «Ngarangyo nga! Wiin we nu ƥek’ina kaso, owaay kam Mbind Roog naa, a njangnaa xeet faa.»

²⁶ Maaga, oxe adooxan’ina yeeyetax waa a yoona fo waa lul’eena, ndaa kaa saɗaroogu xeet faa a mbarit a den a kac. Ten taxu da ƥisiid apootar waa no njek.

²⁷ Yaa da ƥisiidna a den mbaambir Mal maak naa, o saasadax o maak oxaa a laamtooga a den.

²⁸ A laya a den ee: «I mbañta a nuun boo nqij ee ba nu mbaare’tat gon leene. Nu nga’aan! Nu nqaɓa a Yeerusaleem na waare fee nuun, soo mbug o mbudin took in fo’oy le no koor oxeene!»

²⁹ Piyeer fo apootar waa a ndoona a den ee: «Ndax Roog i mbaru o nanan ndi wiin we?

³⁰ Roog fee daan we in a mbaɗooxoogna, o ten o mat xontooxnooru a Yeesu fee nu mbarnoorna, ye nu ndenguuna na teex.

³¹ Roog fa xoox um yoɗun itam, ta moofik na ñamaak um, a dodin o Maad fo o Muumucil, ndax ta ci xeet fee Isra’el da mbes pakaad den a cinj, too a ndaaw a baasan ale.

³² In sax seede’u keene, in fo Yiif Tedu le Roog a ci’na we nananuuna.»

³³ Yaa waa mbog’ina no Mal maak ne a nanna kaaga, a mbuux’a fuux maak, too a mbug’a o mbarnoor apootar waa.

³⁴ Kaa koy, a jega a ndeer den o Farisiya xaa ne’eena Gamaliyel. Xeet fee fop kaa niw’un. O caajangin no kebil ke Moyiis a reeƭu. Naaga a inooxa, a geenoox a ndeer no Mal maak naa, a hebil ee fat apootar we a sutel o ndik rek.

³⁵ Cinj kaaga, a laya a den ee: «Nuun wiin we Isra’el, mbootooxyo ke nu mbugna o mbi wiin weeke.

³⁶ No miñeer ke rek Tudaas a inooxu, a fi’ooxaa o kiin o maak, boo kaa fadna wiin teemeed nahik a ndabiidin. Kaa koy, yaa ta wareena, we ndeefooguuna fop a pictoora nen xa ƥiy tol, too layit’ataand.

³⁷ A cinj um, Yudaa o Kaagalile xe a inooxa na jamaane faa na pindax alaa, a kooc wiin boo da ndeefin.

³⁸ Nu anda koy ke um laykaa a nuun ndiiki: Ba a ƭat nuun a yongat no wiin weene, nqaƴyo a den da ndet. Yaam a soƥangaa yee pexey neene mbaat a pi akeene no kiin a ngatu, xan a sañtoox,

³⁹ ta soƥ koy ee na Roog a ngatu, nu mbaagee o sañit a den. Mbootooxyo boog o ñoxor fa Roog!» Mal maak ne a njaɓa yiif laaga na Gamaliyel.

⁴⁰ A nqoyahina apootar waa, a nqaw a den xa cap, a mbañit a den da layit gon le Yeesu. Cinj kaaga, a mbokta a den da ndet.

⁴¹ Naaga, apootar waa a ndiƈatooxa Mal maak naa. Den fop a ƭaaya yaam tedaanga fee Roog a ci’’ina a den, da toroxandeel yaam gon le Yeesu.

⁴² Ñaal nuu refna, kaa maad’u o mbokatooraa kam Mbind Roog naa fo kam pind ke, a njangnaa, a yegnitaa Yegil mbaax ne yee Yeesu refu o Muumucil oxe regteena.