A pi ake 28 - NQAARIIT NE ROOG

Pool no fimb laa Malt

¹ Ye i mucna boo ndef na jam, i sogu o and ee fimb le i ndefna Malt a ne’e.

² Waa ngen’ina maaga, a njeg’a na in o laabiir o maak. A ngeƥandan’a a in ngañ maak maa i mbaagna o ndaƭoor in fop, yaam tige kaa deɓoogu, soo a yoonit a cogoñ a maak.

³ Naaga, Pool a reta a daxanik xa cuuƭ. Ye ta garna, a yipa a den no ngañ naa. Ne tige a sum’ina boo jip, sax a sutoorta teen, soo a morgoox a Pool no ɓay.

⁴ Yaa waa ngenna no fimb laa a nga’na ƥood ne a saayooxaa no ɓay ole Pool, a layrooga yee: «A woora o mat ee oxene o baawar oo. Ke ta mucna muc no maag ole fop oo, o cofel ole Roog ci’iran ta ñoow.»

⁵ Kaa koy, Pool a wiisa fangool faa kam fiɗel laa, too yegee a ƭomaand a leng no cer um.

⁶ Lakas we kaa cungoogu o nga cer ke Pool a nqimiƈ mbaat ta yen, a xon ndak fo ndak. Ye da cungna boo tige a miñ koy, too dara ɗomee a Pool, a supta a qalaat, too a layaa yee: «Oxeeke kat, roog oo de!»

⁷ Paam o mbiñ onqaaga, lanq ke no yaal fimb laa a ndeeƭu. O yaal fimb laa koy, Pubiliyus a ne’’e. Pubiliyus feene a genar’a a in a paax, too a dalin a in boo ñaal tadik.

⁸ Faap Pubiliyus koy kaa wondoox’u yaam cer um kaa sum’u, soo o fud um a niqiilel. Pool a reta a ɗeetkin. Ye ta fadna, a xeɗa a Roog, a doon xa ƥay took um, soo a wodandin.

⁹ A cinj kaaga, lakas waa njirna no fimb laa fop a ngara me Pool, too den itam a mboda.

¹⁰ A ci’a a in cer boo ta hup, too ye i mbaajaa o ndet, a coox’a a in fop ke jegna o njiriiñ na ñaaƈ ale in.

Pool a fadiida na teeru faa Rom

¹¹ Ye i ndefna Malt boo njeg a qool a tadak, i ndoka na kaal alaa inoor’ina na teeru faa Aleksandiri, too a riig’u no fimb laa. A kaal ale koy Roog siid ke a xoyooge, yaam a saq’u nitaal kaa na nandtaa siid.

¹² Yaa i mbadna na teeru faa Sirakiis, i teera maaga, boo njeg ñaal tadik.

¹³ I inoora maaga, ndeefan tambando fee, boo neene i ndaawu teeru faa Regiyo. No feet olaa, yilmaan fee a yeniida. No ñaal ƭikandeer naa i mbad’u na teeru faa Pusol.

¹⁴ I soƥa maaga fog gimu, too a nqeɗa a in, i moof fa den boo bes fa ndakooxiidu. Neene deŋ i ndettu na teeru faa Rom.

¹⁵ Yaa fog gimu waa ndefna Rom a nanna i layteel, a ngara boo no jikoorand olaa ne’it’eena a Apiyus fo o mbiñ onqaa na xa Ñaamand xa tadaq axaa, a nqetooxiid a in. Ye Pool a ga’na a den, a gidma a Roog, too a saƭakinoox.

¹⁶ Ye i mbadiidna Rom, Pool a ci’’e o fe ten doŋ, ndaa a yoonandte fo o qiixire xaa na yetooxan.

Pool a waare’a kam Rom

¹⁷ A cinj a pe a tadak, Pool a xura maak waa no Yaawuur waa Rom fop. Ye da mbokatoorna, a laya a den ee: «Fog es, ke ɗapeeruuma xeet es a ƭat fop oo, o mbaax onqe no daan we in ne’aand, yaqanee kaam dam’el na teeru faa Yeerusaleem, soo ɓoxotel na xa ƥay axe no Roorom we.

¹⁸ Kaa koy, ye da laamtaxama, a mbug’axam o mbaas, yaam nga’ee na mi kaa da mbartaxama.

¹⁹ Kaa koy, Yaawuur we a mbañaan. Maaga, kaam bug’atu Kesaar fee a hate’aam. No keene fop koy, bugiim o ɓanj xeet es.

²⁰ Ten taxu um xeɗ, ndax um ga a nuun boo lay fa nuun, yaam oxe xeet fee Isra’el a yaakaarna taxu um kepel a cengir akeeke.»

²¹ A ndoonaan ee: «I ndaawee o leetar o leng olaa inoorna Yudee no kaa farna na wo, too o leng no fog in inooree maaga a helkaa o wetandoox mbaat ta lay a in paaxeer na wo.

²² Kaa koy, i mbugaang o nan-giloox a paax, o lay ke o xalaataa, yaam i anda yee a ƭat aleene fogoona kaa fañel muu refna.»

²³ A ndama bes, too yaa bes faaga a fadna, mayu a soƥiida a Pool me ta dal’ina. No kaa xotitna no nqes naa boo no yaar olaa, Pool a yegnooga a den Maat ne Roog, soo a jeemaa o gimnoor a den no kaa farna na Yeesu, ye ta tektaa a den ke bindeena kam kebil ke Moyiis fo kam a safe ke no duleer we.

²⁴ Leng we a ngima ke ta layoogna, ndaa lakas we o mat a mbaña o ngim.

²⁵ Den fop koy a asoora yaam ne da njofoor’eerna. Naaga, Pool a doona teen keeke: «Yiif Tedu le a laya ndigil kak, ye ta layna fo daan we nuun, a reefandin no tuleer Esayi.

²⁶ Kaa lay’u yee: ‹Reti o lay xeet feene yee: Nu mbug oo nanit nof nuun, ndaa nu andkee tus, ƭeetit a kid nuun, ndaa nu nga’kee dara.

²⁷ Xeet feene kaa ŋajaa. Kaa sux nof den, a mup a kid den, yaam ndik da nga’it a kid den, a nanit nof den, a andit a qeeñ den, soo da saktooxiid me mi, um wodand a den.› »

²⁸ Pool a ɓaata teen ee: «Andyo boog ee we ndefeerna Yaawuur a mboga no we taxna waare feeke na muc ale Roog a lultel. Xan da nan-gilooxin!» [

²⁹ Ye Pool a layna a ƭelem akaaga boo a ƴut, Yaawuur we a ndeta, too a ñimatiraa tigi a ndeer den.]

³⁰ Pool a gen’a xa kiid xa ƭaq xa muum na ndok ale ta jang’ina, too maaga a dalnoogu we ngaroogna me ten fop.

³¹ Kaa waare’oogu kaa farna no Maat ne Roog, a jangnaa kaa farna no Yaal oxe Yeesu Kiristaa, a yoonandtin njambaar maak fo o yaadax.