A pi ake 27 - NQAARIIT NE ROOG

Pool a ɓise na teeru faa Rom

¹ Ye i mbosooxna o ndok a kaal koy, ndax i ndet no saax laa Itali, Pool fo leng-leng waa ndam’eena a ƥoxote o aa-adax no xiixire teemeed oxaa ne’’eena Yuliyus, too a fog’u na qaaj no xiixire le no maad o maak oxe.

² I ndoka na kaal alaa inoorna na saate faa Adaramit, too a war’u o reef farna fo baax kaa no jegel olaa Asi. Cinj kaaga, i ndeta. Aristark o Maamakedoni xe gen’ina na teeru faa Tesalonik a yoona fa in.

³ No feet olaa, i mbadiida na teeru faa Sidoŋ. Yuliyus fee andoona koy ee kaa faax’u na Pool bo, a ci’a a Pool ta ret maa no qaariit um, ndax da topatooxin.

⁴ Yaa i inoorna maaga, i ndeefana tambando fee no maag ole garitna fimb laa Sipere took, yaam nqeñ ne kaa gartoogu a in mbaambir.

⁵ Ye i nqaañna o maag olaa paam xa cegel axaa Silisi fa Pamfili koy, i mbadiida na teeru faa Mire no jegel olaa Lisi.

⁶ Maaga, o aa-adax oxaa a ga’a a kaal alaa inoorna Aleksandiri, a retaa Itali, too a fexeya boo i ndok taaga.

⁷ I njeg’a a pe a mayu kaa andoona yee kaa i ƥeroogu o ndang, too i njeg’a coono fa maak, ye i mbadiidkaa no mbaambrand naa na teeru faa Kanidos. Ne nqeñ ne a yaqanoogna a in i mbaanit maaga koy, i ndeefa no ƥol naa Salmone garitna fimb laa Keret took.

⁸ I lernooxa tambando faa fa coono fa ƭomu, soo mbadiidkaa no mbiñ onqaa xoyoogeena Baax paax ke dendna fa teeru faa Laasa.

⁹ I miñ’a na ƭat lool, too xaañat no maag ole woor’atee, yaam bes fee Yaawuur we a ngooroogna no ndiig kaa faaf’atu. Ten taxu Pool a maƭoox’u a den ee:

¹⁰ «Qaariit es, ga’aam ee a ñaaƈ in aleeke felkatee de, too xan i njeg teen taamaala fa maak. Refkee a kaal ale fo ke ta yipna soom, ndaa fa nqon in sax a xeƈa teen.»

¹¹ Kaa koy, o aa-adax oxaa no xiixire teemeed waa, oxaa adooxan’ina a kaal ale fo xe saq’uuna a moƴ’atu o nan-gilooxaa ee Pool.

¹² Ne waax faaga a faax’eerna, ndax a kaal ale a serel maaga yaa fo a pe a moseer, moƴ-o-jaak olaa no wiin waa yoon’ina fop a mbuga a kaal ale a suur no maag, a waaƭik a Foynik saq’ina waax fa ndeɓ no fimb laa Keret. Waax feene koy, farna fo mudand no ɓemb-roog o ñamaak fo no ɓemb-roog o janoon a faambir’u.

Nqeñ maak ne

¹³ Kaa koy, miñee dara, yilmaan faa inoorna no ɓemb-roog o ñamaak a wuuɗiida. A saf’a a den ee xan pexey ne den a faax. A qica o iloor ole, soo a lernoox tambando fee no fimb laa Keret.

¹⁴ Ɓaatnee dara, nqeñ maak a wuuɗiida, a inoor farna fo fimb laa. Nqeñ maak neene koy Saalanq a xoyeel.

¹⁵ Kaa maƥ’atu a kaal ale, too o leng waag’atiran o harin yaam nqeñ maak ne. Kaa i ƭeetoogu soom, tiimaa.

¹⁶ Maaga, i sara farna fo ɓemb-roog o ñamaak no mbimb onqaa ne’eena Kawda, too a sing’a a in o ndik. Ye i qickaa o njuk onqe hiɓ’eena a cinj ale na kaal ale boo ƥekin kam fee, i njeg’a coono lool. O njuk onqeene koy i njaɓnooroogu yaa tig a xewna no maag ole.

¹⁷ Ye maamaag we a ŋaayatinna koy, a nguma xa ƥaak xa ƈufginoor da sangaaloox a kaal ale. Ne da saɗaroogna o ndeɓoox no loofiind olaa Sirte paam a ƥeeraamb alaa Libi, a ndeɓa o booy. Naaga, a nqaƴa nqeñ ne ta ɓisataa a in.

¹⁸ Ne nqeñ ne a moƴ’ina o gal’andaa a in koy, no feet olaa maamaag we a njoora kam o maag olaa ke a kaal ale a yip’ina.

¹⁹ No ñaal naa doonooxna took um, a njooroogata fo xa ƥay den tig lakas mayu ke fog’ina na kaal ale sax sax.

²⁰ I njeg’a ñaal mayu kaa andoona yee i nga’ee njeeƈ ne, xa qoor axe ne’aand, too nqeñ ne mat kaa moƴ’u moƴ o ɗomaa rek. Palakaand ke sax i yaakaar’atee yee xan i muc.

²¹ Waa ndeeƭna kam a kaal ale a miñ’a lool too ñaamee. Maaga, Pool a geenooxa a ndeer den, too a lay ee: «Goye, nu nan-giloox’angaam koy, nu inooxkoogee Keret, too i njegkoogee taamaala keeke fo yaqooɗ keeke.

²² Kaa koy, ndiiki, kaam xeɗaa a nuun nu saq njambaar, yaam o leng na nuun ñakkee o ñis um. A kaal ale rek na refkaa kasaara.

²³ O xoo sax, Roog fee fogtuuma, too um faɗooxan a feeñlaxam malaaka um, ta layaam ee:

²⁴ ‹Pool, ba o saɗar! Xan o geenoox mbaambir Kesaar fee. Roog kam o paaxel um a ci’aang o ñoow, wo fo fop we yoontoona na kaal ale.›

²⁵ Ten taxu nuun qaariit es, saƭakinooxyo, yaam jegaam yaakaar na Roog ee xan a jegit ne layteema o ten.

²⁶ Kaa koy, xan nqeñ a ɗeb a in na ƥeeraamb fimb.»

²⁷ Kene koy, oxe xewa no yeng xarɓaxay fo nahkandeer olaa. Nqeñ ne kaa moƴ’u o ɓisaa a in kam o Maag olaa Mediterane. Farna fo o yeng o njeek, maamaag we a yeg’a yee tambando a matiidaa.

²⁸ Maaga, a ndeɓa o ƥaak olaa andoona yee a poox hum’e taaga, too a nga’a yee o qooɗel ole na foofi le a fi’a ngap meetar qarɓeen tadik fo meetar ɓetaa ƭaq. A ndeta boo a ngoƭik, too a ndeɓahina o ƥaak ole. A nga’a yee o qooɗel ole a refa ngap meetar qarɓeen ƭik fo meetar ɓetaa tadaq.

²⁹ Kaa ndiidoogu a kaal ale a buƥ ɓil. Ten tax’u da ndeɓ xa iloor xa nahaq, a cungaa mbeet ne a leel.

³⁰ Maamaag we kaa mbaaƭoogatu maa da ndaɗitna na kaal ale. A mbudna o njuk onqe da njaɓnooroogna, a mbi nen waa mbugna o ndeɓ xa iloor no xoox le na kaal ale.

³¹ Kaa koy, Pool a laya o aa-adax oxaa fo xiixire waa yee: «Boo wiin weeke a yoqeerna kam a kaal ale, yaaga nu mbaagkee o muc.»

³² Maaga, xiixire waa a ƭega xa ƥaak axaa no njuk onqaa, soo a nqaƴin, ta ray.

³³ Ye a kid a ngelko fo nqoolaa, Pool a xura a den den fop da ñaam, too a lay a den ee: «Ñaal xarɓaxay fo ñaal nahik key kaa andoona yee kaa nu cungaa too nu ñaamee tus.

³⁴ Ngaryo boog too ñaam, yaam nu soxla’a o ñaam ndax nu muc. O biil ole moƴna o yooɓ sax watkee no xoox no kiin na nuun.»

³⁵ Yaa Pool a layna kaaga boo a ƴut, a janga mbuuru, a gidim a Roog mbaambir no fop. Cinj kaaga, a xustaan, soo a ñaam.

³⁶ Maaga, fop a saqatina njambaar, soo a ñaam itam.

³⁷ In we ndeeƭna na kaal ale fop, i ndeeƭa wiin teemeed ƭik fo wiin qarɓeen ɓetuu ƭik fo wiin ɓetuu fa leng.

³⁸ Ye da ñaamna den fop boo a ngiñ, a ƥaxa bele fee kam o maag ole, ndax a kaal ale a yelef.

A kaal ale a suuxa

³⁹ Yaa mbeet naa a leelna, maamaag waa mbaag’ee o andid tambando fee. Kaa koy, a nga’a maaga a kal alaa jegna a ƥeeraam, too a mbug’a o serin a kaal ale maaga, yaa da mbaaguuna.

⁴⁰ A mbokta xa iloor axaa, soo a nqaƴ a den kam o maag ole. Ndak fo ndak, a yandna xa ƥaak axe na teex ale da mbi’’ina o feɗir. Cinj kaaga, a ndorta mbaƴ ne na maaw ale no mbaambir ne na kaal ale, ndax nqeñ ne a dif’an. Maaga, a mbaaƭwanka farna fo a ƥeeraamb alaa.

⁴¹ Kaa koy, a mbadiida maa na loofaa, soo poofi ke a nqawraa. Maaga, a kaal ale a gido’a. Xoox le na kaal ale kaa mud’u kam ɗok le, too waag’atee o ret sen. A cinj ale koy, kaa gefiidoogu yaam ne a yag-ee-yag ake a moƴ’ina o njumb.

⁴² Xiixire we kaa mbug’u o mbar waa ndam’eena. Kaa mbañoogu leng-leng na den a mbeƴ, boo a ndaɗ.

⁴³ Kaa koy, o aa-adax oxaa no xiixire teemeed waa a bug’a o mucil a Pool, too a fañta a den da mbi pexey naaga. Cinj kaaga, a hebla we mbaagna a beƈ da eet o mbool no foofi le, ndax da ndaaw tambando fee.

⁴⁴ A layahina waa yoq’ina da ndeefan a den. A qanq ake fo ƥolooxatin ke na kaal ale ndeeƭu caɓnoor den. Neene, fop a ndaawtu jeeri fee. O leng na den kasaara’ooxee, too tus ŋoloƴ’ee teen o leng.