A pi ake 26 - NQAARIIT NE ROOG

Pool oxe xoxtaa a xoox um mbaambir Agiripa

¹ Cinj kaaga, Agiripa a laya a Pool ee: «I ci’aang o lay ndax o xoxit a xoox of.» Maaga, Pool a letna o ɓay um, too a lay ee:

² «Daali maad es Agiripa, xaye jegaam o ɗaay o maak olaa geenooruuma mbaambir of, xoxtaa a xoox es, layaa no fop ke taxna Yaawuur we a njambaxam.

³ Moƴaam o jeg teen o ɗaay sax, yaam andaa o mbaax onqe no Yaawuur we fo ñimatir pagkatar ke den. Mexe xeɗang o muñanaam boog, too nan-gilooxaam!

⁴ Yaawuur we fop a anda o ñoow es no kaa xotitna no ndeƥandoong es. A anda itam ne ñoowtooguuma no mberaandoong naa ndeer no xeet es, cinj kaaga kam Yeerusaleem.

⁵ A miñaxam o and, too a mbugangaa, a mbaaga o lay ee ndeer a qaaj ale moƴna o ɗom tig na ƭat in ñoowoogum, ta ref ale no Farisiya we.

⁶ Ndiiki koy, mexe hate’eel yaam ne yaakaaruuma ke Roog a regna daan we in.

⁷ A carind xarɓaxay fo a carind a ƭak ake na xeet fee in a yaakaara o nga a tegit aleene a fadnoox, yaa da mbaɗooxaa a Roog fa doole, ñaal oo yeng oo. O maad Agiripa, yaakaar neene koy taxu Yaawuur we a njambaxam.

⁸ Nuun Yaawuur we, xar taxu nu nqalaataa yee Roog waagee o xontooxnoor xon we?

⁹ Mi fa xoox es sax, kaam xalaatoogu yee wareem o gomir no kuu refna, ndax um ñuf gon le Yeesu o Naanasaret oxe.

¹⁰ Keene sax fi’aanum Yeerusaleem. Daawit’aam sañ-sañ no saasadax maak we, too wegnooraam gimu mayu kam kaso. Yoon’aam itam na bar ale da mbaroogeena.

¹¹ Leek-leek kaam xawnooroogu a den kam pind a qeƭ ke, too jeemaa o ser a den da mbaas o ngim onqe da njeg’ina. Um fuux’angaa boo buɓaa yaam a ƭat ale den, kaam ñagadiloogu wiin weene boo suur no teeru can.»

Pool a wetandooxa ne ta gimitna

¹² «Neene rettum na teeru faa Damaas, na sañ-sañ fee saasadax maak we a ci’axama, ndax um ñaaƴin ke da simaxama.

¹³ O maad Agiripa, no njoloor o mbuc koy, a jopir um ref na ƭat, ga’aam a qoolaand alaa inoortiidna na asamaan. A qoolaand alaaga koy, meleƈ um hup’u meleƈ ne no njeeƈ ne. Kaa miric-miricnoogu paam es fo paam we yoonit’uuma na ñaaƈ ale.

¹⁴ Ndak fo ndak, in fop i yena a lanq, too nanaam o ñuxur olaa na layaa na lak hebre yee: ‹Sool! Sool! Xar taxu o ñagadilaxam? O and’angaa ke na ɓeedang, o waas ke o ɓeedaa.›

¹⁵ Laamtaanum ee: ‹Wo oo an, o Yaal oxe?› Maaga, o Yaal oxe a doonaxam ee: ‹Mi yoo, mi Yeesu fee o ñagadilaa.

¹⁶ Inooxi too geenoox! Kaam feeñooxong, ndax um fi’ong o tag es. Xan o ref o seede es, layaa lakas we ne ga’taxamoona xaye, ndax o yegnaa a den ke um lalkahinang.

¹⁷ Xam muclong na xa ƥay axe na xeet fee no Yaawuur we fo na xa ƥay axe no qeet lakas ke um lulkang.

¹⁸ Xam lulong ndax o wet a kid den, sutit a den no niɓaan ole, ɓisiid a den na qoolaand ale, sutit a den na sañ-sañ fee Saytaane, da ngar me Roog. Neene, a ngimangaa na mi, xan a ndaaw a baasan ale no pakaad ke den, a ndaaw a las ale we mbogna na mi a njegna.› »

Pool oxe laytaa kaa farna no calel um

¹⁹ «Ten taxu o maad Agiripa, fañiim mbeeñil ne daawtuuma na asamaan.

²⁰ Kaa koy, kaam eet o waare we ngenna Damaas fo we Yeerusaleem. Cinj kaaga, waare’aam we ngenna no jegel olaa Yudee fop fo we mbogna no qeet lakas ke. Xeɗaam a den da supit o ñoowooƭ, a nomtoox farna fa Roog, too a mbi’aa a pi akaa lalitna yee a suptooxa tigi.

²¹ Keene o mat taxu koy Yaawuur we a ngiftaam maaga, ye refuuma no Mbind Roog ne. Kaa njeemoogu maa da mbartaxama.

²² Kaa koy, Roog a saytooxaxam boo no ñaal ne xaye, too mexey meen ndax um seede’aa fop, wiin maak we fo we neewna doole. Laytiim lakas koy, a refangee ke duleer we fa Moyiis a layna, too ta war o xew, ta ref ee:

²³ Xan o Muumucil oxe regteena a coono, a ref oxe eetna o xontoox a ndeer no xon we, too xan a yegnaa xeet in fo qeet lakas ke a qoolaand ale.»

Pool oxe xoyaa a Agiripa ndax ta gim

²⁴ Ne Pool a xoxtoogna a xoox um koy, Festus a ɗegooxaan, a layin a maak ee: «Koo qoyni Pool! Kaa o ɗofaa! A cang ake wo sax kaa ƥekatong no ƭof.»

²⁵ Pool a doonaan ee: «Koor oxe, yaag oo ɗofiim de! Fa lay no ƈiƴ tigi um layaa.

²⁶ O maad Agiripa a anda ke um layaa, too saɗaam o geenoox mbaambir um layin. A wooraxam itam ee dara teen kunpa’iran, yaam dara teen fi’aand na pet.

²⁷ O maad Agiripa, ndax gimaa ke duleer we a layna? Andaam ee gimaano!»

²⁸ Maaga, o maad Agiripa a laya a Pool ee: «Ndiiki koy, kaa o bugaam o gimnoor ndak fo ndak, um refat kerceen?»

²⁹ Pool a doonaan ee: «A waaga o ref ndiiki de, a waaga o ref taa mbaambir itam. Kaa koy, kaam xeɗaa a Roog, boo refkee wo soom, ndaa weeke na nan-gilooxaxam xaye, nuun fop, nu ndefat ke refuuma, bo ta yoqaa a cengir akeeke.»

³⁰ Maaga, o maad oxe fo gofornoor fee fa Berenis fo fop we ndeeƭna fa den, a inooxa.

³¹ Ye da ndiƈatooxna, a layra a ndeer den ee: «O koor oxeeke fi’ee tus kaa waagna tax ta warel mbaat ta ɓekel kaso.»

³² Maaga, Agiripa a laya a Festus ee: «O kiin oxeeke a hel’e o wokit sax, a reeƭangee ke ta layna yee Kesaar fee na hate’kan.»