A pi ake 21 - NQAARIIT NE ROOG

Pool na teeru faa Tiir fo faa Kesare

¹ A cinj ye i asoorna fa den boo ƈut, i ndoka a kaal mbaaƭik fimb laa Kos. No feet olaa i mbadu no fimb laa Rood, inoor maaga, ndet Patara.

² I soƥa maaga a kaal alaa jootnoogna farna fo saax laa Fenisi, too i ndoka teen, ndet kam o maag olaa.

³ Ye i ƈookna fimb laa Sipere, i ndeefa farna fo ɓemb-roog o ñamaak, suur boo no saax laa Siri. Yaa i mbadna, i ndangna na teeru faa Tiir, yaam maaga a kaal ale a war’u o fudin ke ta suf’ina.

⁴ I soƥa maaga gimu waa, too i moofa fa den boo ñaal ɓetuu ƭik. Yiif Tedu le a yegna gimu waa ke na xewkaa, too weene a laya a Pool ee baa fad Yeerusaleem.

⁵ Kaa koy, yaa bes faa a nomtooxiidna, i suura na ñaaƈ in. Gimu waa fop, goor fo rew fo xa ƥiy den a yoona a in boo i sutoox teeru faa. Maaga, i ndalfooxa o ngooknoox na tambando faa no maag olaa, soo ndef no nqeɗaa a Roog.

⁶ A cinj ye i asoorna boo ƈut koy, i ndoka na kaal ale, too den oo a nomtooxa no pind den.

⁷ Ke i mbar’ina o ñaaƴ no maag olaa fop oxe faga ye i inoorna na teeru faa Tiir boo mbadiid na teeru faa Potolemayis. Maaga, i simna fog gimu waa fop, soo moof fa den ñaal leng.

⁸ No feet olaa i inoora maaga, ngar na teeru faa Kesare, soo ndok no mbind Filip, ndal maa ten. Filip feene koy, o baawaare Yegil mbaax ne a reeƭu, a ref o leng no goor ɓetuu ɗik waa njilit’eena Yeerusaleem.

⁹ O koor oxeene a jeg’a xa ƥiy xa tew xa nahaq xa tolooxafuleer. Roog weene a njo’tanooga a Roog.

¹⁰ I njeg’a maaga ñaal mayu, too o tuleer Roog oxaa ne’’eena Agabus, a inoora Yudee,

¹¹ a gar maa in. A janga o kumnoor ole Pool, a hum xa ƥay axe fo a caf ake Pool, too a lay ee: «Keeke Yiif Tedu le a layu: Oxe jegna o kumnoor oleeke, neeke mat Yaawuur we a ngumitkan Yeerusaleem, soo a ƥoxotin na xa ƥay no we ndefeerna Yaawuur.»

¹² Ye i nanna kaaga, in fo we ndeeƭna maaga, i nqeɗa a Pool ta fañ o fad Yeerusaleem,

¹³ ndaa Pool a doona yee: «Xar taxu nu loolaa, yaqaa xeeñ es? Ndax nu andee yee fañiim o humel soom, ndaa jaɓaam o warel Yeerusaleem sax yaam gon le no Yaal oxe Yeesu.»

¹⁴ Ne ta fañ’ina o nanan a in, i tiima, too i laya yee: «Yaasam ke Roog a bugna a jeg!»

¹⁵ A cinj a pe akaaga, i ngebooxa soo ndet Yeerusaleem.

¹⁶ Leng-leng no daalbe we ngenna Kesare itam a yoon’a fa in. A ƥisa a in no mbind no koor oxaa war’ina o dalin a in. O koor oxaaga koy, Manason a ne’’e, a gen no fimb laa Sipere. A miña o ref o kimu lool.

Pool a ɗeetiida a Saak kam Yeerusaleem

¹⁷ Ye i mbadiidna Yeerusaleem, fog gimu we a ndalna a in fo o ɗaay.

¹⁸ No feet olaa, Pool a yoona fa in, a ɗeetik a Saak, too maak we no mbokatax ne no gimu we fop a mbokatoora me ten.

¹⁹ Maaga, Pool a simnira fa den, a wetandoox a den ke Roog a fi’’ina no we ndefeerna Yaawuur fop a reefandin no calel ke ten.

²⁰ Ye da nanna kaaga, a simata a Roog. Cinj kaaga, a laya a Pool ee: «O pog in, ga’aa gimu cuni-cuni we inoorna na ƭat ale no Yaawuur we. Boo xaye kaa njaflax den fop no kebil ke Moyiis.

²¹ Weene kaa nan ee kaa o jangnaa Yaawuur we ngenna a ndeer no we ndefeerna Yaawuur, da mbes kebil ke Moyiis a cinj, doon teen layaa yee: Ba nu nquc xa ƥiy nuun, too ba nu ndeef o mbaax onqe nuun!

²² Xar i mbi’kaa boog? No ndigil, xan da and ee garaa.

²³ Ten taxu fi’i ke i laykang: A jega a ndeer in goor nahuk waa ndegoorna fa Roog.

²⁴ Ɓisi a den, nu yoon ƥogdinoox ne Yaawuur we a mbi’tan. Gadooxi ndabid den itam, ndax oxuu refna a ruusin xoox um. Neene, xan wiin we a and ee ke layoogeena na wo fop xa maaƥ oo, yaam a nga ee kaa o reefaa kebil ke Moyiis, too gayaa a den.

²⁵ We ndefeerna Yaawuur, too a ngimat koy, i mbind’a a den ke i ndalin’ina. Ten refu yee da mbootoox o ñaam a tegeƴ akaa sadaxeena ke refeerna Roog, a mbañ o ñaam fo’oy mbaat med, a mbañ o seeqaa itam.»

²⁶ No feet olaa, Pool a ɓisa goor waa, too den fop a ƥogdinooxa. Cinj kaaga, a roka fa den kam Mbind Roog naa, ndax ta lay a mbane pes ke no ƥogdinax ne den a mbagkaa. Maaga, xan oxuu refna na den a waagel o ɓoxotan sadax.

Pool a dame

²⁷ Yaa ñaal ɓetuu ƭik kaa a mbagiidaa, Yaawuur inooru no jegel olaa Asi a nga’a a Pool kam Mbind Roog naa, a yo’in faan laa, soo a ndam a Pool.

²⁸ Kaa mbuuqoogu yee: «Nuun Ii-isra’el we, ngela ƈufgiidyo a in! O kiin oxe na waare’aa muu refna oxey. Kaa maafaa xeet fee Isra’el fo kebil ke Moyiis fo o mbiñ onqeeke. A fi’aan boo a rokin waa ndefeerna Yaawuur kam Mbind Roog ne, a maasandaa o mbiñ o tedu nqene.»

²⁹ Kaa layoogu keene, yaam ne da nga’’ina a Torofim fee genna Efees ta yoon fa Pool kam teeru fee, too a mboog’a yee Pool kaa ɓek’un kam Mbind Roog ne.

³⁰ Teeru faa fop naa ta fodeena a yo’noox’a. Mbokatax naa a ƈuftiida muu refna, a mbokatoor, a ndam a Pool, a ndeƈ-ndeƈnin tafil Mbind Roog ne, soo a ñof o mbeg begax ke.

³¹ Ye da mbaaƭaa maa da mbaritna a Pool, o aa-adax no xiixire teemeed oxaa a yegniide yee Yeerusaleem fop a yo’nooxa.

³² Ndak fo ndak, kelfa faa a yoonnooxa xiixire fo aa-aadax no xiixire teemeed. Naaga, a ƈufa farna fo mbokatax naa. Ye wiin waa a nga’na kelfa fee fo xiixire we, a mbaasa a Pool, too nqaw’atiran.

³³ Maaga, kelfa faa a matiida a Pool, a damin, soo a hebil ta humel fo ceen ƭik. A cinj kaaga, a laamta oxe refna Pool fo ke ta fi’na.

³⁴ Kaa koy, kam mbokatax naa, wene kaa mbuuqtoogu nene, waana a mbuuqtaa naana. Kelfa faa waag’ee o dam teen tus, yaam coow le kaa naag’u kur. Kaaga a tax’a ta hebil Pool a ɓisel kam saŋe naa no xiixire waa.

³⁵ Ye da mbadiidna fa Pool paam o ŋaayand ole no ndokand ne, xiixire we a meeɓaan, yaam mbokatax ne kaa moƴ’u o yo’noox.

³⁶ Fop kaa ndeefoogu a Pool, soo a mbuuqaa yee: «Fat a xon de!»

Pool oxe layooraa fo waa Yeerusaleem

³⁷ Yaa da mbugna o ndokin a Pool no saŋe naa, Pool a laya a kelfa faa yee: «Ndax waagaaxoong o laamit tig?» Kelfa faa a doonaan ee: «Ndax nanaa a gerek?

³⁸ Xeƈa refiro o Miimisira xe falakna o yo’naa wiin we na pe akene rek, ɓis’ina kam a koƥ-a-ƥor alaa goor cuni nahik waa mbaajoogna o ngef saax le?»

³⁹ Pool a doonaan ee: «Mi, o Yaawuur refum, rimel na teeru faa Tars, refna o yaal gon no jegel olaa Silisi. Ci’aam um lay fo mbokatax ne kañ!»

⁴⁰ Kelfa faa a ci’aan o ten. Maaga, Pool a inooxa, a geenoox no ŋaayand ole no ndokand ne, a cax mbokatax ne fo o ɓay um, ndax da tiim. Yaa da naangna yereŋ, Pool a laya fa den na hebre yee: