A pi ake 19 - NQAARIIT NE ROOG

Pool kam teeru faa Efees

¹ Ye Apolos a refna na teeru faa Korint, Pool a xaañooga o jegel olaa na xa coong axe too a fudoortiida Efees. A soƥa maaga daalbe leng-leng,

² too a laamit a den ee: «Ndax nu ndaawa Yiif Tedu le ye nu ngimatna?» A ndoonaan ee: «I mosee o nan sax ee Yiif Tedu a jega.»

³ Maaga, Pool a laamtahina a den ee: «Batiise fum nu ndaawu boog?» A ndoonaan ee: «Batiise fee Saŋ.»

⁴ Pool a laya a den ee: «We njaɓ’ina o mbes pakaad den a cinj, Saŋ a batiise’oogu. Kaa layoogu xeet fee da ngim no xe na reefankan, ta ref Yeesu.»

⁵ Ye gimu waa a nanna a ƭelem akaaga, a mbatiise’e no gon no Yaal oxe Yeesu.

⁶ Pool a doona xa ƥay um took den, too a ndaawa Yiif Tedu le. Kaa layoogatu lak pogreer, a njo’tanaa a Roog itam.

⁷ Goor waaga fop a ndeeƭa ngap xarɓaxay fo ɗik.

⁸ Pool a roka no mbind a qeƭ naa no Yaawuur waa. Maaga, a waare’ooga fo njambaar boo a qool a tadak, a jeetaayaa fa den kaa farna no Maat ne Roog, too a waaƭaa maa ta gimnooritna a den.

⁹ Kaa koy, leng-leng a saƭkina a qeeñ den, too a ngimaƭar. Kaa mbenoogu a ƭat ale no Yaal oxe mbaambir no wiin waa. Maaga, Pool a riƈatooxa a den, a xaaj daalbe waa fa den, soo a jeetaayaa fo daalbe we ñaal oo ñaal no jangand olaa Tiranus a jeg’ina.

¹⁰ O jaf olaaga na Pool a miñ’a boo xa kiid xa ƭaq, boo Yaawuur we fo we ndefeerna Yaawuur ngen’ina no jegel olaa Asi a nan fa lay fee no Yaal oxe.

Njomlaand maak kam teeru faa Efees

¹¹ Roog a fi’ooga a pi katil a com’andtu a reefandin na Pool.

¹² Neene koy, jiru we a ƥisiidooge xa seegit fo a naf akaa nduq’ina cer ke Pool. Maaga, a mbodooga na cir ake da ndefit’ina, too cini ke a sutooxooga na den.

¹³ Fan Yaawuur waa ndaxoogna cini, a mbidaa o mbiñ fo mbiñ, a njeemooga o nqeɗan no gon Yeesu we cini a ndam’ina itam. Kaa layoogu cini kaa yee: «No gon Yeesu fee Pool a yegnitaa, mexe heblaa a nuun nu sutoox.»

¹⁴ Waa mbi’oogna kaaga ndeeƭu xa ƥiy ɓetaa ƭaq axe no saasadax o maak oxaa no Yaawuur waa, ne’’eena Sewa.

¹⁵ Kaa koy, jini faa a doona a den ee: «Andaam a Yeesu, too andaam a Pool itam, ndaa nuun o mat, aniin nu ndefu?»

¹⁶ Maaga, o koor oxaa jini faa a dam’ina a songa a den, a maaf a den den fop. Kaa ñagadiloogu a den fo coxod, boo da ngaañoox. Naaga, ngoor kaa a ngoda xa coor, a nqaad fo cer ƥor.

¹⁷ Kaaga a nannooxa no Yaawuur waa fo no waa ndefeerna Yaawuur fop, too a ngen Efees. Diid maak a dama den, too gon le no Yaal oxe Yeesu a simat’e.

¹⁸ Mayu no waa ngim’ina a mbeejliidooga mbaambir no fop paaxeer ke da mbi’’ina.

¹⁹ Mayu no ñaañango waa a ƥisiida a safe ñango’ir ake den, a ndox a den mbaambir no fop. Ke a safe ke a mbaag’ina o njar a xaymi’’e, too a fi’a xa qanjar cuni qarɓeen ƥetik na xaaliis fa nqoolu.

²⁰ Neene o mat fa lay fee no Yaal oxe a nannoortu fa katil, a lalit doole um tigi.

Yo’nax kam teeru faa Efees

²¹ Yaa kaaga a faafna, Pool a xalaat’a no yiif um ee a wara o ret Yeerusaleem, a xaañ Makedoni fa Akayi. Kaa lay’u yee: «Boo retuuma maaga, waraam o and teeru faa Rom itam.»

²² Maaga, a lula a Timote fa Eraste, ndeeƭna ɗik no diidimle we ten, da ndet no jegel olaa Makedoni. Ten fa xoox um o mat, no jegel olaa Asi a yoq’u a pe a leng-leng.

²³ Na jamaane faaga koy, a jeg’a yo’in maak na teeru faa Efees yaam a ƭat ale no Yaal oxe.

²⁴ O qaaxaw xaaliis oxaa ne’’eena Demetiryus a xawnoorooga xa taaƴ xaaliis axaa nandna fo mbind-sadaxand ne Artemis fee da mbi’’ina roog fa ndew den. Kaa sakanoogu teen jaajal we ten halal fa maak.

²⁵ A fokata a den den fop fo we da mbogit’ina calel leng kut ke, too a lay a den ee: «Wiin es, nu anda yee o njiriiñ in in fop, oxe no calel kene.

²⁶ Kaa nu nga’ee, ndi kaa nu nanee ke o koor oxene, tee Pool oo, a fi’na? Kaa lambnaa yee ‹Nitaal ke nu mbi’na roog ndefee Roog.› Ndiiki koy, oxe gimnooraa wiin mayu, refee kam Efees soom, ndaa boo no moƴ-o-jaak olaa no jegel olaa Asi sax a ngima.

²⁷ Keene koy, xeefnoorkee calel ke in soom. Kaa koy, xan a maaf o magnel ole no mbind-sadaxand ne Artemis fee refna roog fa ndew fa maak fee. Roog feene wiin we no jegel ole Asi a mbaɗooxaa, too adna fee fop na mbaɗooxan sax.»

²⁸ Ye da nanna kaaga, a mbuux’a fuux maak, a mbuuq ee: «O koo, Artemis fee no Ee-efees we magnu!»

²⁹ Teeru faa fop a yo’nooxa. Wiin waa a ndeta, a ndam a Gayus fa Aristark ndeeƭna Maamakedoni we yoon’ina fa Pool, a ndeƈ-ndeƈin a den fop boo no mbuud naa.

³⁰ Pool a bug’a o rok kam xeet faa, ndaa gimu waa ci’’iran o ten.

³¹ Leng-leng no kelfa kaa no jegel olaa Asi ndeeƭna qaariit um a lulit’aan, too a layin ee ta fañ o jikook o ñis um no mbuud naa.

³² Na waxtu faaga mbokatax naa kaa ndeeƭu no njuumoor. Wene kaa mbuuqtoogu nene, wene a mbuuqtaa naana, too moƴ-o-jaak olaa na den fop and’ee ke tax’ina o xet oleene.

³³ Maaga, leng-leng no wiin waa a suta a Aleksaandar fee Yaawuur we a ndiñoogna mbaambir. Naaga, Aleksaandar a caxa a den fo o ɓay um, yaam kaa bug’u harin xeet faa.

³⁴ Kaa koy, ye da andna yee Aleksaandar o Yaawuur oo, den fop a mboga o ñuxur o leng, a mbuuqaa boo kaa fadna baxtu ƭik, a layaa yee: «O koo, Artemis fee no Ee-efees we magnu!»

³⁵ Palakaand ke koy, o piibind oxaa na teeru faa a harna mbokatax naa, a lay ee: «Nuun Ee-efees we! Mee ndax teeru fee Efees na yetooxaa mbind-sadaxand ne Artemis fee roog fa ndew fee, a yetooxaa itam nitaal um ne yentiidna na asamaan. An andeeru keene?

³⁶ Ye nu andna yee o leng waagee o xañ keene, nu mbar’a o naag tek, mbañ o ndokin a qoox nuun.

³⁷ Yaam kaa nu ƥisiid wiin weeke nguuɗeerna tig kam pind-sadaxand ke, too maasandee a roog fa ndew fee in.

³⁸ Boo Demetiryus fo jaajal um a njegna kaa da nqeloorna fo leng na den koy, a jega pes qeloor fo wiin no maad. Fat da nqoy o kiin oo kiin, a ngate’in.

³⁹ A soƥangaa koy ee kaa nu njeg lakas kaa nu mbarna o nqeloor, mal ne na teeru fee na ngate’kan.

⁴⁰ Yaam o mat, muu i ndefatna, i mbaage o njamb ee in yo’nu mbokatax ne no ke xewna xaye. I mbaagee o ƥur a den, yaam i njegee kaa i mbaagna o lay boo sutoox teen.» Yaa o piibind oxe a layna xa ƭelem axaaga boo a ƴut, a nomta mbokatax naa.