A pi ake 17 - NQAARIIT NE ROOG

Pool fa Silaas kam teeru faa Tesalonik

¹ Pool fa Silaas a ndeefa Amfipolis fa Apoloni, a ngar Tesalonik maa Yaawuur waa a njeg’ina mbind a qeƭ.

² Pool a roka kam mbind a qeƭ naa ne ta mer’ina o fi’aa. Pes tadik a ñootnax a soƥ’aan maaga. Kaa jeetaayoogu fo we ndeeƭna maaga no kaa farna no ke a Pind a Tedu ke a layna.

³ Kaa tektoogu a den a Pind a Tedu ke, too a lalaa a den teen ee Kiristaa fee, o Muumucil oxe regteena a war’a o coono, soo a xontoox a ndeer no xon we. Kaa layoogu a den ee: «Yeesu fee um yegnaa a nuun, refu Kiristaa fee, o Muumucil oxeene.»

⁴ Leng-leng a ngimata, a yoon fa Pool fa Silaas. A ndeer den a jeg’a Geegeres mayu waa mbug’ina o ndeef a Roog fo rew maak mayu.

⁵ Kaa koy, Yaawuur we a may’a fo ciis. A ndalfooxa o mbokat a laƭti ke ndeeƭna no ped ke, a yo’in faan laa soo a inooxan teeru faa. A yena no mbind Yaason, too a mbaaƭooga maa da ƥisitna a Pool fa Silaas mbaambir xeet fee.

⁶ Kaa koy, ye da nga’eerna a den, a ndeƈ-ndeƈna a Yaason fo leng-leng no fog gimu waa boo mbaambir no aa-adax waa na teeru faa, soo a mbuuqaa yee: «Wiin weeke kaa njaxas adna fee fop, soo ndiiki da ngar meeke itam.

⁷ Yaason a dalna a den, too den fop naangee o ndeefaa ke kebil ke Kesaar fee a simitna. Kaa layaa yee a jega o maad o lakas o ne’e Yeesu.»

⁸ Fa lay faaga a yo’na faan laa fo aa-adax waa lool ye da nanuuna.

⁹ Neene, Yaason fo lakas we ndam’eena a coox’a aa-adax waa su’nit, soo a sogkaa o sutoox.

Pool fa Silaas kam teeru faa Beere

¹⁰ No yeng olaa, fog gimu we a suurna a Pool fa Silaas, da ndet Beere. Yaa da mbadna, a ndoka kam mbind a qeƭ naa no Yaawuur waa.

¹¹ Yaawuur waaga moƴ’u o ngore we Tesalonik, yaam a njaɓa fa lay fee Roog fo o ɗaay. Bes fuu refna kaa ƥaaloogu a Pind a Tedu ke, yaam a mbug o nga ndax ke Pool a layoogna teen ndigil oo.

¹² Wiin mayu no Yaawuur we a ngim’ata. A ndeer no Geegeres waa itam rew maak mayu fo goor mayu a ngima.

¹³ Kaa koy, yaa Yaawuur waa Tesalonik a nanna yee Pool oxe yegnitaa fa lay fee Roog na teeru faa Beere itam, a ngara a yo’in maaga, soo a njaxas faan laa.

¹⁴ Maaga, fog gimu waa a ñofa o ƥis a Pool na ƭat alaa no maag olaa, ndaa Silaas fa Timote o mat, Beere a yoq’u.

¹⁵ Waa yoon’ina a Pool a mbeltaan boo Aten, soo a nomtooxiid Beere. Ye da mbadiidna, a laya ƥisnit neeke na Pool: «Fat Silaas fa Timote a soƥiidaam no kaa moƴna o ñof.»

Pool kam teeru faa Aten

¹⁶ Ye Pool a cungaa a Timote fa Silaas Aten, xeeñ um a feƭar’a lool, yaam ne ta ga’’ina teeru faa a may fo nitaal kaa da mbi’na Roog.

¹⁷ Kam mbind a qeƭ naa, Pool a jeetaayooga fo Yaawuur we fo we ndefeerna Yaawuur too a saɗar’u a Roog. Bes fuu refna a jeetaayooga itam fo we ta xettoogna no nqel maak naa.

¹⁸ Yaal-o-and waa mbog’ina na cang a ƭak a maak ake ne’eena Epikuriya fa Estoysan a njeetaayooga fo ten. Leng we kaa laamtoogu yee: «Ndi xar o wayoom olene a bugu lay?» Lakas we koy, a laya yee: «Kaa nandtaa oxaa na waare’aa roog kaa i andeerna.» Kaa layoogu keene, yaam kaa nanoogu Pool a waare’aa Yegil mbaax ne no kaa farna na Yeesu fo na qontax ale.

¹⁹ Maaga, a nqoyaan ta yoon fa den maa no mal naa den mbokatoor’ina no mbiñ onqaa ne’eena Ariyopaas. A layaan ee: «Ndax i mbaaga o and a cangin a qas ale o laytaa?

²⁰ Yaam kaa o nannooraa a in kaa i andeerna. Ndiiki koy, i mbuga o and ke keene a tekitna.»

²¹ Yaam Aa-aten we fop fo xa kataakoon axe ndeeƭna maaga, muu da moof’ina, tig qas rek a laytoogu, too a nan-gilooxan.

²² Pool a inooxa, a geenoox a ndeer mal naa Ariyopaas, a lay ee: «Nuun Aa-aten we, ga’aam no fop ee reereef a ƭat nu ndefu.

²³ Yaam ye xaañuuma kam teeru nuun, horooxaam xa paɗoorand axe nuun, too ga’aam teen o faɗoorand olaa bindeena yee: ‹Roog fee i andeerna jegun.› Ke nu mbaɗooxaa, too nu andiran koy, um yegnaa a nuun.

²⁴ Roog fee sakna adna fee fo fop ke refna teen, refu o Yaal asamaan fo lanq. Roog feene koy naagee o genaa no mbind-sadaxand naa o ɓay no kiin a jalna.

²⁵ Soxla’ee itam o ndimle nqaa inoorna no kiin no kuu ta waagna waag o ref, yaam ten na cooxaa wiin we fop o ñoow fo haaƭ fo kuu refna.

²⁶ No kiin o leng a saktu qeet ke fop, a dalin a den na adna fee fop. Xeet fuu refna, ta hapanin camaane, a ɗeganin me ta warna o gen.

²⁷ Roog kaa fi keene, ndax da mbaaƭin, a naƥnaa, ndax da njeem o nqet fo ten. Yaag oo toox de, Roog goƭee o leng na in.

²⁸ Yaam no ten i njegtu o ñoow, yo’nooraa no ten, ndefit no ten itam. ‹In o mat oo, na xeet um i mbogu.› Keene o mat, leng-leng no jeejeek we nuun a layu.

²⁹ Ten taxu in itam, ne i mbogna na xeet fee Roog, i mbaree o nandandit a Roog nitaal wurus mbaat xaaliis mbaat ɓil ndefna kaa o kiin o baane’u a fi’na.

³⁰ Roog ɗeetatee camaane ke wiin we a ndeeƭna no ñak-o-and. Ndiiki koy, oxe xoyaa wiin we na adna fee fop, da mbes pakaad den a cinj,

³¹ yaam a dama bes fee ta hate’kaa adna fee fo o cofel, na pexey o kiin oxe ta jooxna. A lala wiin we yee keene booru yoo, ye ta xontooxnoorna o kiin oxeene a ndeer no xon we.»

³² Ye da nanna Pool a layaa kaa farna na qontax ale no xon we, leng-leng kaa nqaadnooxoogun, soo lakas we a layaa yee: «Jaf lakas, xan i nan-gilooxong no kaa farna no keene.»

³³ Naaga, Pool a sutooxa a ndeer den.

³⁴ Kaa koy, leng-leng a ndeefanaan, too a ngimata. A ndeer den, a jeg’a Denis fee fog’ina no mal ne Ariyopaas fo o tew oxaa ne’eena Damaris fo wiin lakas itam.