A pi ake 15 - NQAARIIT NE ROOG

O xet ole Yeerusaleem

¹ A jeg’a wiin leng-leng waa inoor’ina Yudee, a njangnaa o fog ole yee: «Nu nqucooxangee ne kebil ke Moyiis a simtituuna, nu mbaagkee muc.»

² Pool fa Barnabaas a ñimatir’a fa den ñimatir ƭomu no kaaga. Maaga, Pool fa Barnabaas fo leng-leng no fog ole Ancook a ngeble a ndet Yeerusaleem maa no apootar waa fo maak waa, ndax da njokit kaa farna na fa lay feene.

³ Mbokatax ne no gimu we a cooxa a den fop ke da soxla’na na ñaaƈ den. Cinj kaaga, a nqota a ƭat, a nqaañ Fenisi fa Samari, a mbetandooxaa o ngim onqe no we ndefeerna Yaawuur. Kaaga a reeƭa o ɗaay o maak no fog gimu we fop.

⁴ Yaa da mbadiidna Yeerusaleem, mbokatax ne no gimu we fo maak waa fo apootar waa a ndalna a den, too Pooliin a mbetandooxa a den ke Roog a fi’’ina fa den fop.

⁵ Maaga, leng-leng no gimu we inoor’ina na qaaj ale no Farisiya waa a inooxa, soo a lay ee: «Gimu we ndefeerna Yaawuur kaa mbar o nqucel, too a ngeblel a ndeef kebil ke Moyiis.»

⁶ Apootar we fo maak we a mbokatoora, ndax da ngoroox tige.

⁷ Yaa da ñimatirna boo ta sum, Piyeer a inooxa, a lay ee: «Fog we, nu anda yee Roog a miñaxam o jilit a ndeer nuun, ndax na pexey o don es, we ndefeerna Yaawuur a nan fa lay fee no Yegil mbaax ne, too a ngim.

⁸ Yaam Roog fee andna a qeeñ ake no wiin we a seede’ana a den no Yiif Tedu le ta ci’na a den ne ta ci’tuuna a in.

⁹ Roog koy, fi’ee njektir leng a ndeer in fa den, yaam o ngim a xoolandtu a qeeñ den.

¹⁰ Ndiiki koy, xar taxu nu mbogaa a Roog, soo ngadnaa daalbe we a toq akaa i ngatleerna, daan in sax ngatliran, ne’katiim in fa qoox in.

¹¹ Yaag oo toox de, ne i ngimitna yee na yirmande fee no Yaal oxe Yeesu i muctu, neene a muctu den itam.»

¹² Maaga, moofand naa fop a naaga cel a nan-gilooxaa a Barnabaas fa Pool, da mbetandooxaa xa anddiloor axe fo comlaand ke Roog a fi’nooroogna a den a ndeer no we ndefeerna Yaawuur.

¹³ Ye da ƈutna fa lay, Saak a doona yee: «Fog we, nan-gilooxaamoo!

¹⁴ Simoŋ a wetandooxa ne Roog a ɗeetit’ina no mberaand naa kam no we ndefeerna Yaawuur, ndax ta jilit a ndeer den xeet faa refanuuna.

¹⁵ Ke duleer we a layna a yoona fo keene, yaam a Pind a Tedu ke kaa dee:

¹⁶ ‹O Yaal oxe a laya yee: Cinj kaaga, xam nomtooxiid, too a koom um difi o ɗaakaand ole Dawid, yoɗin, ke gefna teen, um xendandin, boo ta dakoox naa ta reeƭna,

¹⁷ ndax ke yoqna no wiin we a mbaaƭaam, mi o Yaal oxe, qeet ke fop xoyuuma ndax um jeg a den.

¹⁸ Keene mat o Yaal oxe a layu, too ten andnoorun no mberaand naa.› »

¹⁹ Cinj kaaga, Saak a doona yee: «Xalaataam ee i mbaree o njom’and we ndefeerna Yaawuur, too a mbug o ngim na Roog.

²⁰ Kaa koy, fat i mbind a den, da mbootoox ñaamel qoolaƭaru ke sadaxeena ke refeerna Roog, a mbaas ceeq, a mbootoox o ñaam med fo fo’oy itam.

²¹ Keene kaa war, yaam kam teeru fuu refna a miña o jeg waa na mbaare’aa kebil ke Moyiis, too kaa njangeel itam na bes a ñootnax aluu refna kam pind a qeƭ ke den.»

O leetar ole bindeena we ndefeerna Yaawuur

²² Maaga, apootar waa fo maak waa fo mbokatax ne no gimu we fop a ngebooxa yee xan a njil wiin a ndeer den, a lul a den Ancook, da yoon fa Pool fa Barnabaas. A njila a Yudaa fee na lastiteel Barsaba fa Silaas, ndeeƭna goor niwe a ndeer no fog gimu waa.

²³ A cooxa a den o leetar olaa bindeena yee: «In fog nuun, ndefna apootar we fo maak we, in we simnaa a nuun, nuun fog gimu we ndeer no we ndefeerna Yaawuur ngenna Ancook fa Siri fa Silisi.

²⁴ I nana yee leng-leng no we inoorna na in, i ngebleerna tus no kaa farna no keene, owe njom’andaa a nuun, too a ngal’andaa a nuun fo fa lay.

²⁵ Ten taxu, a cinj ye i njofoorna boo ƈut, i ngebooxa yee fat i njil wiin, yoonandtiid a den a Barnabaas fa Pool we i mbexna mbex.

²⁶ Den ɗik weene a mbuusa o ñis den yaam gon le no Yaal in Yeesu Kiristaa.

²⁷ In we luliidaa a Yudaa fa Silaas boog, too xan a mbetandoox a nuun ke i mbindna no leetar ole boo ƈut.

²⁸ Yiif Tedu le fa in weeke sax, i ngebooxa yee i ndoxondkee a nuun a toq a lakas, a refangee ale waageerna o ñak o jeg.

²⁹ Ten refu yee nu mbootoox ñaamel ke sadaxeena ke refeerna Roog mbaat fo’oy mbaat med mbaat ceeq. Nu mbootooxangaa keene, xan nu mbi paax. Na jam!»

³⁰ Yaa da inoorna maaga koy, a ndeta Ancook. Ye da mbadna, a mbokata mbokatax naa, a coox a den o leetar ole.

³¹ A njangaan, too a sawar’a lool no saƭakin naaga.

³² Yudaa fa Silaas we ndeeƭna joojo’tan a Roog itam, a saƭakinooga fog gimu waa, too a ndif’itaa a den fa lay fa mayu.

³³ Yaa da moofna boo a ƥaatin, fog gimu waa a mbokta a den da nomtoox na jam farna fo we lul’ina a den. [

³⁴ Silaas o mat a yoqa maaga.]

³⁵ Pool fa Barnabaas a yoq’a Ancook. Den fo wiin lakas mayu a njangnooga, too a mbaare’aa Yegil mbaax ne na fa lay fee no Yaal oxe.

A ñaaƈ a ƭikandeer ale Pool

³⁶ A cinj a pe a leng-leng, Pool a laya a Barnabaas ee: «Fat i nomtoox ƭeetik fog gimu we kam teeru ke i yegnitna fa lay fee no Yaal oxe, boo and ke da ndefitna.»

³⁷ Barnabaas a bug’a o ɓis a Saŋ fee na lastiteel Mark itam,

³⁸ ndaa ke moƴan’ina a Pool, Mark a guloox, yaam kaa xaƴ’u a den Pamfili, a fañat o yoon fa den no calel ke.

³⁹ A ñimatir’a boo a nqaajoor. Maaga, Barnabaas a yoona fa Mark, da ndok na kaal, soo a ndet Sipere.

⁴⁰ Pool o mat, a jila a Silaas, too a ndeta a cinj ye fog gimu we a mbokatna a den fa yirmande fee no Yaal oxe.

⁴¹ A xaaña kam Siri fa Silisi, a dif’aa pokatax ke no gimu we kam o ngim onqe.