A pi ake 14 - NQAARIIT NE ROOG

Pool fa Barnabaas kam teeru faa Ikooñum

¹ Kam teeru faa Ikooñum leng kut ke a xewahina: Pool fa Barnabaas a ndoka kam mbind a qeƭ naa no Yaawuur waa, soo a laytaa naa taxna boo mayu no Yaawuur waa fo waa ndefeerna Yaawuur a ngimat.

² Kaa koy, Yaawuur we mbañ’ina o ngim, a sooba we ndefeerna Yaawuur, da mbuuxan fog gimu we.

³ Pool fa Barnabaas a miñ’a Ikooñum. Kaa layoogu fa doole, too a njeg a koolax no Yaal oxe. O Yaal oxe a ci’a a den sañ-sañ faa da mbi’taa xa anddiloor fo comlaand. Neene, a lalta yee ke da mbaare’oogna na yirmande fee ten ndigil kak oo.

⁴ Wiin waa na teeru faa fop a nqaajoora. Wene a mbar fo Yaawuur we, waana fo apootar we.

⁵ Kaa koy, Yaawuur we fo we ndefeerna Yaawuur, den fo kelfa den, a mbaajooga o ñagadil a Pool fa Barnabaas, too a mbug o mbarit a den a kac.

⁶ Yaa goor ɗik waa a nanna kaaga, a njaɓnooka kam teeru kaa Listeer fa Derbe mbogna no jegel olaa Likawoon fo ke widuuna.

⁷ Maaga, a ndefa no mbaare’aa Yegil mbaax ne itam.

Pool fa Barnabaas kam teeru faa Listeer

⁸ Kam teeru faa Listeer, a jega o koor oxaa a caf um a yeroox’ina. O mbiñ o leng a moofoogu. Kaa rimit’el ƥoof, too mosee o ñaaƴ muk.

⁹ A nan-gilooxooga ke Pool a layoogna. Maaga, Pool a naagaan jak a kid, too a ga’a yee a jega o ngim onqaa waaguuna o mucil.

¹⁰ Maaga, Pool a layaan a maak ee: «Inooxi! Geenooxi fo a caf of!» Maaga, a naaga daket a inoox, soo a ñaaƴ.

¹¹ Yaa faan laa a nga’na ke Pool a fi’’ina, a mbuuqa, a lay no lak no Liilikawoon waa yee: «Roog ke kaa nqawoox, a ndefat wiin, soo a mbudooxiid me in.»

¹² A nqoyoogata a Barnabaas Sewus fee da mbi’’ina roog fa maak fee den, soo Pool, da nqoyan Hermes fee da mbi’’ina roog fa lakas den, yaam ten saq’u fa lay fee.

¹³ Paam teeru faa koy a jeg’a mbind roog ne Sewus. O saasadax oxe Sewus a rokana qoox ceq pi’te piɗ taxar boo da mosat. Maaga, a ɓisiida a den boo paam a carind ake. Ten fo faan laa kaa mbug’u o ƥoxot a Pool fa Barnabaas sadax.

¹⁴ Yaa apootar ɗik waa a nanna kaaga, a mbaara toki den, yaam a njeg kaa feƭarna a den. Naaga, a ndigana a ndeer no faan laa, a mbuuq a maak, too a lay a den ee:

¹⁵ «Bara waay, fog we! Xar taxu nu mbi’aa kene? In itam, wiin i ndefu nen a nuun. Kaa i ƥisiid a nuun Yegil mbaax ne na xoyaa nuun, nu mbes a cinj xa koɓong axene nu mbi’na roog, too mbiƈaqiloox na Roog fa ñoow jok fee sakna asamaan fo lanq fo o maag ole fo fop ke refna teen.

¹⁶ No camaane ke mbaafna, Roog feene kaa xaƴ’u qeet ke fop da ndeefaa a ƭat a qoox den.

¹⁷ Yaag oo toox de, Roog mosee o ñak o lalit ke ta refna na pexey paax ke ta fi’aa: Kaa ci’taa a nuun na asamaan a teƥ fo tiig paax, a ci’aa a nuun ñaamel ke ndeyna, soo a mayƭandaa a qeeñ nuun fo o ɗaay.»

¹⁸ Ke apootar ɗik we a layitna naaga fop oo, a yaaca o ñak o mbaag o nqañit mbokatax naa, da ƥoxot a den sadax.

¹⁹ Maaga, a jeg’a Yaawuur waa inoor’ina Ancook fo Ikooñum. A ƈaxa faan laa nof, boo da ndeɓataa a Pool a kac, ndax da mbarin. Naaga, a ƭooqaan boo ta sutoox teeru faa, yaam kaa mboog’u yee a xona.

²⁰ Kaa koy, ye gimu waa a mbiduuna o kurul-keƥ, a inooxa, too a roka kam teeru faa. No feet olaa, a ndeta Derbe, ten fa Barnabaas.

Pooliin a nomtooxiida Ancook kam Siri

²¹ Pool fa Barnabaas a mbaare’a Yegil mbaax ne kam teeru faa Derbe, too a njegata daalbe mayu maaga. Cinj kaaga, a nomtooxa Listeer fa Ikooñum fa Ancook fee Pisidi.

²² A ndif’ooga a qeeñ ake no daalbe we, a saƭakinaa a den da sax no ngim onqe, too a layaa a den ee: «Kaa i mbar o ngom coono mayu, soo ndokkaa no Maat ne Roog.»

²³ No mbokatax no gimu nuu refna a njilana a den maak. A cinj ye da ngoorna, a nqeɗ boo a ƈut, a mbokata a den fo o Yaal oxe da ngim’atna.

²⁴ Cinj kaaga, a nqaaña o jegel olaa Pisidi, a ngar no jegel ole Pamfili.

²⁵ A yegnita fa lay fee Roog kam teeru faa Perge, soo a suur boo Atali.

²⁶ A ndokta maaga a kaal, a nqaad na teeru faa Ancook, maa da ndoxnit’eena na yirmande fee Roog calel ke da mbadin’atna.

²⁷ Yaa da mbadiidna Ancook, a mbokata waa mbog’ina no mbokatax ne no gimu we. A mbetandooxa gimu we ke Roog a fi’’ina fop na pexey den fo ne ta wetanit’ina we ndefeerna Yaawuur o don-maax ole, ndax da ngimat no ten, den itam.

²⁸ Maaga, a yoqa fo daalbe waa boo a pe a miñu.