A pi ake 13 - NQAARIIT NE ROOG

A ñaaƈ a eetaand ale Barnabaas fa Sool

¹ A jeg’a no mbokatax ne no gimu we Ancook duleer Roog fo jaajangin. Den ndeeƭu Barnabaas fa Simewon fee lastitoogeena Ɓaal fa Lukiyus fee genna Kireen fa Sool fa Manahen. Manahen feene koy, deƥandoong’u fo o maad Herood.

² Bes, ye da ƥoxotaa a Roog o ndam, too a ngooraa, Yiif Tedu le a laya a den ee: «Kesanaamoo a Barnabaas fa Sool, ndax da mbadin calel ke taxna um xoy a den.»

³ Maaga, a cinj ye da ngoorna, a nqeɗ boo a ƈut, a ndoona a den xa ƥay, soo a nqaƴ a den da ndet.

Barnabaas fa Sool a ndeta Sipere

⁴ Neene, Yiif Tedu le a lula a Barnabaas fa Sool. A ndeta Selewkiya, a ndokit maaga a kaal, soo a ndet no fimb laa Sipere.

⁵ Ye da mbadiidna Salamin, a ndefa no yegnitaa fa lay fee Roog kam pind a qeƭ ke no Yaawuur we. Saŋ fee lastitoogeena Mark a dimle’ooga a den.

⁶ A cinj ye da nqaañna fimb laa koy boo Pafos, a soƥa maaga o ñaañango o ne’e Bar-Yeesu. Oxeene o Yaawuur a reeƭu, a fi’ooxaa o laalay Roog.

⁷ Kaa genoogu no mbind gofornoor fee kelfa’’ina fimb le, too a ne’el Sergiyus Poolus, reeƭna o kiin o cegu yiif. Neene, gofornoor fee a xoyna a Barnabaas fa Sool, yaam kaa bug’u o nan-giloox fa lay fee Roog.

⁸ Kaa koy, Bar-Yeesu fee xoyoogeena itam Elimaas, tekitna o ñaañango xe na lak den, a ɗegooxooga a den, yaam a fañaa gofornoor fee a gim.

⁹ Maaga, Sool fee ne’ateena Pool, a may’a fo Yiif Tedu le, a naagin jak a kid, too a layin ee:

¹⁰ «Wo fee mayna fo naanaxir fo coxod ƥor, ref o ƥiy no ƈiƴ oxe, fañaa o cofel ole, ndax kaa waagiro waas a pi ake Roog o ñufaa?

¹¹ Ndiiki koy, o ɓay no Yaal oxe xe took of. Xan o fuul. Ga’katiro njeeƈ ne sax boo a pe a leng-leng.» Ndak fo ndak, a kuy fo o niɓaan a muura a kid ake Elimaas, too a naaɓooga oxaa damuuna no ɓay ndax ta ɗoxin.

¹² Ye gofornoor fee a ga’na ke xew’ina, a gima, too a jaaxiɗ’a na cangin ale jaginna no Yaal oxe.

Waare fee Pool kam Ancook no jegel olaa Pisidi

¹³ Pool fo we ta yoonit’ina a inooxa Pafos, a ndeef no maag olaa, soo a ndet na teeru faa Perge kam Pamfili. Maaga, Saŋ fee lastitoogeena Mark a xaajoora fa den, soo a nomtoox Yeerusaleem.

¹⁴ Den we inoor’ina Perge o mat, a ndeefa a ƭat ale boo a mbadiid Ancook kam Pisidi. Na bes faa na ñootnax alaa, a ndoka kam mbind a qeƭ naa, a moof.

¹⁵ Pitik, a jega oxaa jangna a maak kam safe le no kebil ke fo no safe le no duleer we boo a ƴut. Cinj kaaga, waa no mbind a qeƭ naa a simta da layel ee: «Fog we, nu njegangaa kaa nu mbaare’na mbokatax ne, layeenoo, ndax ta saƭakin a den.»

¹⁶ Pool a inooxa, a letin o ɓay um, a lay ee: «Nuun wiin we Isra’el fo nuun we ndefeerna Yaawuur, too saɗar a Roog, nan-gilooxyo!

¹⁷ Roog fee na xeet fee Isra’el jilu daan we in. A mayƭanda xeet feene, ye da ndefna xa kataakoon no saax laa Misira, soo a geleeroox, a sutit a den maaga o ɓay o jegu doole le ten.

¹⁸ A muñanooga a den boo xa kiid qarɓeen nahik na koƥ-a-ƥor alaa,

¹⁹ soo a cinj ye ta saŋikna qeet ɓetuu ƭik kam saax laa Kanaan, a ci’a a den da njegat saax laaga nen lam.

²⁰ Kaaga fop a fi’a ngap xa kiid teemeed nahik fo xa kiid qarɓeen ƥetik. Cinj kaaga, a cooxooga a den haahate boo na jamaane no tuleer Sami’el.

²¹ Maaga, a nqeɗa ndax da ci’el o maad, too Roog a ci’a a den a Sawul fee o ƥiy Kiis no kurcala le Bensame. Sawul feene a maadooxa boo xa kiid qarɓeen nahik.

²² Cinj kaaga, Roog a deɓa a Sawul, too a cooxa a den a Dawid, ta ref o maad den. Roog a seede’anaan ee: ‹Dawid feene refna o ƥiy Isay a felaxam no xeeñ es, too xan a fadin fop ke buguuma ta fi.›

²³ Yeesu o ndaan Dawid a reeƭu. Kaa Roog a dodanin xeet fee Isra’el, ta ref o Muumucil den ne ta regtituuna.

²⁴ Ye Yeesu a garafuleerna koy, Saŋ a waare’ooga xeet fee Isra’el fop, ndax da mbes pakaad den a cinj too a mbatiise’el.

²⁵ Ye Saŋ a faambirna fo a pe um, kaa layoogu yee: ‹Refiim oxe nu mboogtaxama. Kaa koy, a jega oxaa na reefaniidaxam, too o wolanin xa ñaaƭ um sax a jombaxam.›

²⁶ Fog es, nuun we xa taan Abraham fo nuun we ndefeerna Yaawuur, too saɗar a Roog! In o mat taxu fa lay feene na muc ale a lultiidel.

²⁷ We ngenna Yeerusaleem fo aa-adax den anddee a Yeesu. Andid’ee itam fa lay fee no duleer we da njangoogna na bes a ñootnax aluu refna, ndaa a mbadna fa lay den, ye da ƥoxotna a Yeesu.

²⁸ Ke da nga’eerna no ten tus kaa da mbartuuna fop oo, yaqanee a nqeɗooxa a Pilaat ndax ta warnoorin.

²⁹ A mbi’a fop no ten, too ke a Pind a Tedu ke a lay’ina no ten a mbadnooxa. Cinj kaaga, a mbudnitaan na kurwaa le, soo a ngeekin kam a mboy alaa.

³⁰ Kaa koy, Roog a xontooxnoor’aan a ndeer no xon we.

³¹ No ñaal mayu a feeñooxooga we yoonoogna fo ten, a inooraa Galile, a ndetaa Yeerusaleem. Weene mat ndefatu seede um ndiiki paam xeet fee.

³² In oo, kaa i yegnaa a nuun Yegil mbaax nene: Ke Roog a reg’ina daan we in,

³³ a fadnanaan a in, in we ndefna xa taan den. A fi’aan ye ta xontooxnoorna a Yeesu, ne ta bindteena na kim a tedu a ƭikandeer ale yee: ‹Wo refu o ƥees, xaye mi rimong.›

³⁴ Roog a yegnita kaa farna na qontax um a ndeer no xon we, ye ta layna yee nomtooxkatee me waagna o fotin cer. Neene, a lay’a yee: ‹Xam ci a nuun ke reg’uuma a Dawid! Keene kaa ted too a woor.›

³⁵ Ten taxu ta layahin o mbiñ o lakas ee: ‹Xaƴkiraamo, mi fee o Tedu xe wo, cer es a mbottik na semb.›

³⁶ Dawid a fi’a ke o Yaal oxe a bugna na jamaane um. Cinj kaaga, a xona, a gasel paam daan waa ten, too a fota.

³⁷ Oxe Roog a xontooxnoorna o mat xonkatee, too cer um mosee o mbot.

³⁸ Yaaga boog fog we, andyo kene: Na Yeesu nu yegnite a baasan ale no pakaad ke.

³⁹ Neene itam, oxuu gimna no ten, a ɗeete nen o cofu yaam o ten. O cofel o nandu neene koy, nu mbaagiran o njegit na pexey kebil ke Moyiis.

⁴⁰ Ten taxu, mbootooxyo yaam ndik ke duleer we a layna a dal took nuun.

⁴¹ ‹Nga’yo nuun we mayna fo o nqaadnax, njaaxiɗyo too mooc, yaam xam fi no ñoow nuun a pi alaa andoona yee nu mbetandoox’ange o ten, nu ngimkiran.› »

⁴² Ye Pool fa Barnabaas a sutooxna mbind a qeƭ naa, wiin waa a nqeɗa a den da nomtooxiid na bes a ñootnax ale na garaa, ndax da layit kaa farna no tig leng kut ke.

⁴³ Ye mbokatax naa a tasna, Yaawuur mayu fo waa tuub’ina na ƭat ale no Yaawuur we a ndeefana a Pool fa Barnabaas. Neene koy, Pool fa Barnabaas a njeetaayooga fa den, soo a saƭakinaa a den, ndax da ndamoox na yirmande fee Roog.

⁴⁴ Yaa bes faa na ñootnax alaa a dakooxiidna, moƴ-o-jaak waa na teeru faa fop a mbokatoor’a, ndax da nan-giloox fa lay fee no Yaal oxe.

⁴⁵ Ye Yaawuur we a nga’na faan le, a may’a fo ciis, a ndef no maaɓnaa a Pool, soo a mbenan.

⁴⁶ Maaga, Pool fa Barnabaas a laya a den a qool qac ee: «Nuun o mat fa lay fee Roog a war’e eet o waare. Kaa koy, ne nu mbañuuna, nu ngate’ana a qoox nuun ee o ñoow o fagkeer ole a jomba a nuun. Ten taxu in we ndetaa farna fo we ndefeerna Yaawuur.

⁴⁷ Yaam keeke o Yaal oxe a heblu a in: ‹Kaam dodong a qoolaand no qeet ke, ndax o ref o muumucil boo no cat adna.› »

⁴⁸ We ndefeerna Yaawuur a mbelakinooxooga ye da nanna a ƭelem akaaga. A simatooga fa lay fee no Yaal oxe, too fop we njagandan’eena o ñoow o fagkeer ole a ngim’ata.

⁴⁹ Fa lay fee no Yaal oxe a joot’a no jegel olaaga fop.

⁵⁰ Yaawuur waa a soobooga rew maak waa saɗar’ina a Roog fo wiin maak waa na teeru faa, ndax da ñagadil a Pool fa Barnabaas, soo a ndaxit a den no fiisel den.

⁵¹ Kaa koy, den ɗik a yirifa a den fo ut a caf den ndax ta ref seede na den, soo a ndet Ikooñum.

⁵² Daalbe waa Ancook fop a ƭaaya lool, too a may fo Yiif Tedu le.