A pi ake 12 - NQAARIIT NE ROOG

Saak a ware, Piyeer a damel

¹ Na jamaane fa leng kut fee, o maad Herood a ñagadiloogu leng-leng no waa mbog’ina no fog olaa no gimu waa.

² A warnoora a Saak fee o maag Saŋ fo laƥ.

³ Cinj kaaga, ye ta ga’na yee keene a fela Yaawuur we, a damnoora a Piyeer itam. Kaaga xaa jopir’a Xew faa no puuru canja’e ke.

⁴ A cinj ye ta damnooruuna, boo a ɓekin kaso, a ɓoxotaan a qaaj a nahak, a qaaj oo qaaj a ref xiixire nahuk, ndax da yetooxan, a njaƥatiraa. Kaa bug’u ndax Xew fee na colandax ale a faafangaa, ta hate’in mbaambir no xeet fee.

⁵ Piyeer kaa yetooxoogel na kaso faa, ndaa we mbogna no fog olaa no gimu waa kaa nqeɗanoogun a Roog kili.

Piyeer a woktooxa

⁶ No yeng olaa adooxna bes faa Herood a hate’nikan mbaambir xeet faa, Piyeer a humit’e ceen ƭik, a ɗaanaa ndeer xiixire ɗik. A jega itam yeeyetax lakas waa ngeenoox’ina paam a carind ale na kaso fee.

⁷ Yaa fop a naagna yereŋ, malaaka no Yaal oxe a diga o feeñoox, too a qoolaand a meleƈa kam kaso fee. Malaaka fee a duqa a Piyeer no saax, a yokin soo a layin ee: «Naagi daket inoox!» Ndak fo ndak, a cengir ake a yenta na xa ƥay um.

⁸ Kaa koy, malaaka fee a layaan ee: «Humnooxi o kumnoor of, rokoox xa ñaaƭ of.» Piyeer a fi’a kaaga. Malaaka fee a layahinaan ee: «Rokooxi ndoki of, reefanaam!»

⁹ Piyeer a sutooxa, a reefanin. And’ee koy ee ke malaaka fee a fi’aa ndigil oo. Kaa foog’un ee kaa ɗaaɗaa.

¹⁰ Ye da sutooxiidaa kaso faa, a njoona o yeeyetax o eetaand oxe, cinj kaaga o ƭikandeer oxe. A mbadiida no begax njelem ne, andoona yee o sutooxangaan, o ret kam teeru faa. Begax neene a wetooxana a xoox um mbaambir den, da sutoox. Yaa da nqotna o mbed, ndak fo ndak malaaka faa a riƈatooxa a Piyeer.

¹¹ Maaga, Piyeer a nomtooxiida na sagu um, too a laya yee: «Ndiiki koy andaam no ndigil ee o Yaal oxe luliidu malaaka um, ndax ta muclaam na xa ƥay axe Herood fo no paaxeer ke xeet fee no Yaawuur we a salanoogaxama.»

¹² Ye ta anddilooxna ke xewna, a reta farna fo mbind Mari fee ya Saŋ na lastiteel Mark, maa wiin mayu waa a mbokatoor’ina, a nqeɗaa.

¹³ Ye ta fadiidna, a koŋ-koŋna begax ne na rokteel, too o mbindaand onqaa ne’eena Rood a matiida, ndax ta wetanin.

¹⁴ A andda o ñuxur ole Piyeer. Kam o ɗaay um wetee begax ne, ndaa a ƴufa a yegnik lakas we yee Piyeer oxe tafil.

¹⁵ A ndoonaan ee: «Too ree koo ɗofiidaa?» Kaa koy, a xoxa a damtin ee keene cegu yoo. Maaga, a laya yee: «Malaaka um oo.»

¹⁶ Kaa koy, Piyeer a moƴ’a o koŋ-koŋnaa rek. A mbeta begax naa, too a njaaxiɗ’a lool ye da nga’uuna.

¹⁷ Piyeer a caxa a den fo o ɓay um, ndax da tiim. Maaga, a wetandooxa a den ne o Yaal oxe a muclit’uuna na kaso faa, too a doona teen ee: «Mbetandooxeenoo a Saak fo fog gimu lakas we.» Cinj kaaga, a sutooxa, a ret o mbiñ o lakas.

¹⁸ Ye Roog a feedna, a jeg’a combol maak ndeer no xiixire waa, ndax da and ne Piyeer a mujitna.

¹⁹ Herood a waaƭnooroogaan, ndaa ga’iran. A xoya yeeyetax waa, too a hebla yee fat da mbarel. Cinj kaaga, a inooxa Yudee a ret Kesare, a moof maaga.

Roog a xawa a Herood

²⁰ Herood a reeƭa no mbuuxoor ƭomu fo wiin waa Tiir fa Sidoŋ. Wiin weene a njofoora, ndax da ngar me ten. Yaa da ngaraa, a eeta o ngukir fa Balastus, reeƭna o aa-adax no mbind no maad naa. Cinj kaaga, a nqeɗa a Herood, ndax ta ci a den jam, yaam no saax le no maad oxeene saax den a ndaawtoogu ñaamel den.

²¹ Yaa bes fee da ndegoor’ina a fadiidna, Herood a rokooxa lori um, a moof no gamb no maad le ten, soo a ref no layaa.

²² Xeet faa a mbuuqa, a lay ee: «Keeke o ñuxur Roog oo, refee o ñuxur no kiin.»

²³ Na waxtu faaga sax sax, malaaka no Yaal oxe a xawa a Herood, yaam ɓoxot’ee a Roog tedaanga. Maaga, kusax a ñaamaan, soo ta xon.

²⁴ Naaga, fa lay fee Roog a moƴ’a o xayaa, too daalbe we a ƥaatooxooga.

²⁵ A cinj ye Barnabaas fa Sool a mbadinna nduleer den, a inoora Yeerusaleem, a nqaad. Saŋ fee lastitoogeena Mark a yoon’a fa den.