A pi ake 10 - NQAARIIT NE ROOG

Piyeer fa Korney

¹ Na teeru faa Kesare a jeg’a o koor oxaa ne’eena Korney. Kelfa no xiixire teemeed a reeƭu, a fog na qaaj ale Itali.

² O koor oxaaga kaa reefoogu a Roog, a saɗarin, ten fo ƥasil um fop. Kaa dimle’oogu rool mayu ndeer no Yaawuur we, soo a gen no xeɗaa a Roog kili.

³ Bes, farna fo waxtu kirandax, a ga’a a qool qac malaaka Roog faa garna me ten, a layin ee: «Korney!»

⁴ Korney a naaga malaaka faa jak a kid kam a kid, a diid bo. A doonaan ee: «O Yaal oxe, xar oo koy?» Maaga, malaaka fee a layaan ee: «A qeƭ ake wo fo sadax ke wo a mbadiida boo mbaambir Roog, too a wetandooxa a den.

⁵ Ndiiki koy, luli wiin da ndet na teeru faa Yope, ndax Simoŋ fee na lastiteel Piyeer a gar.

⁶ No mbind no koohoora o ne’e Simoŋ a dalu, paam o maag olaa.»

⁷ Yaa malaaka faa layoogna fo ten a retna, Korney a xoya ɗik no dag waa ten fo o qiixire o leng oxaa reeƭna na sañ-sañ um, too a reefoogu a Roog.

⁸ Maaga, a wetandooxa a den ke xew’ina fop. Cinj kaaga, a lula a den Yope.

⁹ No feet olaa, a ndeeƭa na ƭat, too a matiida teeru faa Yope. Kaaga xaa jopir’a Piyeer a ŋaay took taax naa farna fo njeeƈ ndeer xoox ndax ta xeɗ.

¹⁰ A xeex’e lool, too a bug’a o ñaam. Kaa koy, ye ta jawaneel kaa ta ñaamna, a feeñooxe.

¹¹ A ga’a asamaan fee a wetoox, soo kaa nandna nen ƭaap maak a humel na xa noflax xa nahaq axe, a fudooxiidaa a lanq.

¹² Kam ƭaap neene koy, a jeg’a o xos muumeen oluu refna: Muumeeniin, ƥoodiin, tiiƭiin.

¹³ Maaga, o ñuxur a layaan ee: «Piyeer, inooxi, war too ñaam!»

¹⁴ Kaa koy, Piyeer a doonaan ee: «Koo boo muk, o Yaal oxe! Mosiim o ñaam tus kaa na diimbeel mbaat kaa xoolaƭarna.»

¹⁵ No jaf ɗikandeer laa, o ñuxur olaa a layaan ee: «Ke Roog a layna yee a xoola, ba o ɗeetatin nen tiimbel.»

¹⁶ Kaaga a xewa boo a caf a tadak. Naaga, tigaa a nomtooxa na asamaan ndak fo ndak.

¹⁷ Piyeer kaa jaaxiɗ’u, too and’ee ke mbeeñil ne ta ga’’ina a tekitna. Kaa koy, wiin we Korney a luliid’ina, a laamta boo a and me mbind ne Simoŋ a refna. Na waxtu faaga, a ngeenooxa na carind ale,

¹⁸ a nqoy a maak. Kaa mbug’u o and ndax meene Simoŋ fee na lastiteel Piyeer a dalu.

¹⁹ Ye Piyeer a xalaataa ke mbeeñil ne a tekitna, Yiif le Roog a layaan ee: «Wiin daduk wey, a laamtang.

²⁰ Inooxi too fudoox, yoon fa den! Ba o jeg teen a yiif-a-ƭak, yaam mi lulu a den.»

²¹ Maaga, Piyeer a fudooxa, a lay wiin waaga yee: «Mexey, mi fee nu mbaaƭaa. Xar ɓisiidu a nuun mene?»

²² A ndoonaan ee: «Korney, o aa-adax no xiixire teemeed luliidu a in. O kiin o paax oo, a saɗar a Roog. Xeet faa no Yaawuur waa fop kaa seede’aa no ten paax. Malaaka Roog yegnun ee ta xoyniidong ndax o gar no mbind um boo ta waag o nan-giloox ke o laykan.»

²³ Piyeer a rokna a den, soo a dalin a den. No feet olaa, a inooxa, a yoon fa den. Leng-leng no fog waa Yope a yoonaan.

²⁴ No feet olaa a mbadu Kesare. Korney koy, kaa cungoogu a den, ten fo fog um fo qaariit um o ñis o leng we ta xoyin’ina.

²⁵ Yaa Piyeer a rokkaa, Korney a xetooxiidaan, a gooknoox na caf um, soo a ɓoxotin tedaanga.

²⁶ Kaa koy, Piyeer a inaan, soo a layin ee: «Inooxi, yaam mi itam, o kiin soom refum.»

²⁷ Maaga, a layooga fa Korney boo neen a roku kam mbind naa, too a soƥa maaga wiin mayu da mbokatoor.

²⁸ Piyeer a laya a den ee: «Refee nu anda yee a ƭat no Yaawuur kaa xañtaam um fokatoor fo o tefee o Yaawuur mbaat um rok no mbind um. Mi o mat, Roog kaa lalaam ee wariim o ɗeet o kiin o leng nen tiimbel mbaat qoolaƭaru.

²⁹ Ten taxu ye nu nqoyaxama, garaam too fañ o jeg teen a yiif-a-ƭak. Mexe laamtaa a nuun boog ke taxna nu lultaam?»

³⁰ Korney a laya yee: «Ñaal nahik key kaa andoona yee kaam xeɗoogu no mbind es na waxtu kirandax, na waxtu fene sax sax. Ñaal eetaand ne koy, a jeg’a o koor oxaa rokoox’ina ndoki naa na meleƈaa. A dalfooxa o geenoox mbaambir es,

³¹ a layaam ee: ‹Korney, Roog a nana a qeƭ of, too a wetandooxa sadax ke o fi’aa.

³² Luli boog wiin da ndet Yope, a nqoyaniidong a Simoŋ fee na lastiteel Piyeer. No mbind no koohoora o ne’e Simoŋ a dalu. Mbind naa koy, paam o maag olaa a refu.›

³³ Ndak fo ndak, luliidaam o kiin farna fa wo, too fi’aa paax yaam garaa! Ndiiki koy in fop, in wey mbaambir Roog, ndax i nan-giloox ke o Yaal oxe a hebloonga o layin a in.»

Waare fee Piyeer no mbind Korney

³⁴ Maaga, Piyeer a kafa fa lay faa, a lay ee: «No ndigil koy, andaam ee Roog naagee o samtirandaa wiin we,

³⁵ ndaa no qeet ke fop, oxe feluuna refu oxe saɗaruuna, too a fi’aa cofu.

³⁶ Nu anda fa lay fee Roog a lultiidna xeet fee Isra’el, ta ref Yegil mbaax ne na ci’taa jam na pexey Yeesu Kiristaa, refna o Yaal no fop.

^37-38 Nu anda ke xew’ina kam o jegel olaa Yudee fop. Keene kaa inoor’u na Yeesu o Naanasaret oxe ye ta jangoorna Galile, a soƥ Saŋ a waare’aa, a batiise’aa. Nu anda itam ne Roog a ɗuumit’ina a Yeesu feene, a soɗin Yiif Tedu le, ta retaa a ndeer saax fo saax, a fi’aa paax, too a wodandaa we ndeeƭna no mbaƭ ne no ƈiƴ oxe, yaam ne Roog a reeƭna fo ten.

³⁹ In ndefu seede um, layaa ke ta fi’na fop kam saax laa no Yaawuur waa fo kam Yeerusaleem. Kaa mbarin, a ndaaƴin took a teex.

⁴⁰ Roog a xontooxnooraan no ñaal ndadkandeer naa, soo a feeñlin.

⁴¹ Refee koy ee xeet fee fop a feeñlun, ndaa in we ndefna seede we Roog a jilna yaaga. In ndefu we ñaamna fo ten, yer fo ten a cinj ye ta xontooxna a ndeer no xon we.

⁴² Yeesu feene koy kaa hebil a in i mbaare’aa xeet fee, too seede’aa yee o ten Roog a dodu oxe na hate’kaa ñoow we fo xon we.

⁴³ Duleer we fop a seede’a no ten ee oxuu gimna no ten, a daaw a baasan pakaad no gon um.»

Waa ndefeerna Yaawuur a ndaawa Yiif Tedu le

⁴⁴ Ye Piyeer a maadna o layaa kaaga, Yiif Tedu le a fudooxa took no fop we nan-gilooxoogna waare fee ten.

⁴⁵ Gimu we mbogna na xeet fee no Yaawuur we fop, too a yooniid fa Piyeer, kaa njaaxiɗ’u yaam ne Roog a fudinna Yiif Tedu le took no we ndefeerna Yaawuur, a ci’in a den.

⁴⁶ Kaa nan’u da layaa lak lakas, a simataa o magnel ole Roog. Maaga, Piyeer a laya yee:

⁴⁷ «Ndax i mbaaga o mbañit wiin weeke ndaawna Yiif Tedu le nen a in, da mbatiise’tel foofi?»

⁴⁸ Maaga, Piyeer a heblita yee fat da mbatiise’el no gon Yeesu Kiristaa. Cinj kaaga, a nqeɗooxaan, ndax ta yoq fa den ñaal leng-leng.