A pi ake 1 - NQAARIIT NE ROOG

Yiif Tedu le a regte

¹ O koor es Tewofiil, mi o mat layaam no safe eetaand es ke Yeesu a ferna o fi, a jangnin fop, xotitna no mberaandoong naa,

² boo neen Roog a yoɗun na asamaan, cinj ye ta cooxna apootar we ta jil’ina bargal ke ten na pexey Yiif Tedu le.

³ Cinj ye Yeesu a xonna, a cooxa a den xa anddiloor xa mayu ndax ta feedin a den ee oxe ñoowaa. A feeñooxooga a den boo a pe qarɓeen nahik, a layaa a den kaa jofna no Maat ne Roog.

⁴ Bes, a soƥ ta reer fa den, a maƭooxa a den ee: «Ba nu ngoƭ a Yeerusaleem, ndaa fat nu cung ke Faap fee a regitna, too um yegnin a nuun.

⁵ Mee ndax Saŋ, foofi a batiise’toogu, ndaa nuun koy, ndeer mene fo a pe a mayeer, xan nu mbatiise’tel Yiif Tedu le.»

Yeesu a ŋaaya na asamaan

⁶ Maaga, apootar waa mbokatoor’ina fa Yeesu a laamtaan ee: «O Yaal oxe, ndax no camaane kene o sinjatinkaa maat ne Isra’el?»

⁷ Yeesu a doona a den ee: «Refee yee nuun mbaru o and camaane ke fo baxtu ke Faap fee a geennitna sañ-sañ um.

⁸ Kaa koy, xan nu ndaaw doole, yaa Yiif Tedu le a fudooxkaa took nuun, too xan nu ndef seede es, layaa kaa jofna na mi kam Yeerusaleem, kam o jegel olaa Yudee fop, kam saax laa Samari, boo no cat adna.»

⁹ Cinj yaa Yeesu a layna kaaga, a dalfooxa o yoɗoox na kid den, too ye da ƭeetan, eel a singaan.

¹⁰ Yaa da ndefna maaga, a ndaxaaƴooxan ta retaa, goor ɗik waa ndokooxna tikoorik tan a mbeeñooxa a den,

¹¹ a lay a den ee: «Ndi nuun Gaagalile we, xar taxu nu ngeenoox ƭeetaa na asamaan? Yeesu feene yoɗeena a ndeer nuun, a ret na asamaan, ne nu nga’tuuna ta yoɗel, neene o mat a nomtoortiidkaa.»

Oxe rondandna a Yudaa

¹² Maaga, apootar we a nomtooxiida Yeerusaleem, a inoortiid no joong olaa xoyoogeena o Joong ole no taxar oliiw kaa, reeƭna paam Yeerusaleem. O koƭel um a fodir’a fo ke ci’teena o ñaaƴel na bes fee na ñootnax ale.

¹³ Yaa da mbadiidna, a ŋaaya no taax-took naa maa da mer’ina o mbokatoortaa. A ndeeƭa: Piyeer, Saŋ, Saak, Andare, Filip, Tomaa, Bartelemi, Mace, Saak fee o ƥiy Alfe, Simoŋ oxe na xoxtaa saax um fa Yudaa fee o ƥiy Saak.

¹⁴ Den fop kaa mbog’u xeeñ leng, a ngen na qeƭ. A jeg’a itam rew leng-leng nen a Mari fee ya Yeesu fo xa teɓ axe Yeesu.

¹⁵ Na pe akaaga, Piyeer a inooxa a ndeer no fog olaa. Waa mbokatoor’ina a ndeeƭa ngap wiin teemeed fo wiin qarɓeen ƭik. Maaga, Piyeer a laya a den ee:

¹⁶ «Nuun fog es, Yiif Tedu le a yegnita no don Dawid kam a Pind a Tedu ke no kaa farna na Yudaa fee adooxan’ina waa ndam’ina a Yeesu, too fa lay feene a wara o fadnoox.

¹⁷ Yudaa o leng na in a reeƭu, too a jeg’a a las no calel ke in.

¹⁸ O koor oxeene a janga xaaliis fee ta rabid’eena na bakaad fee ta fi’’ina, a jiktin o qol. Cinj kaaga, a yena, a adin xoox um, cer um a ƭeg a ndeer, laaw um fop a ƥaxooxiid tafil.

¹⁹ Waa ngen’ina Yeerusaleem fop a yega ke xew’ina, too a taxa da nqoyaa o qol oleene no ɗelem den Hakeldama, kaa tekit ee ‹o qol fo’oy›.

²⁰ Neene mat a bindte no safe le na Kim a tedu ke: ‹Sam ngenand um a fes a pec, too ba o leng a genat teen.› A binde itam ee: ‹Fat o lakas a rondandin.›

²¹ Neene boog, fat i njil o koor o leng a ndeer no we yoonoogna fa in na jamaane faa o Yaal oxe Yeesu a refaa fa in,

²² no kaa xotitna yaa Saŋ a batiise’uuna boo a koom alaa ta yoɗteena a ndeer in, yaam a wara o jeg oxaa refna fa in nen o seede xaa na laytaa a qontax ale ten.»

²³ Maaga, a njila goor ɗik: Oxe moolan’eena Yoseef, too a xoyoogel Barsaba, a lastiteel Yustus fo xaa ne’eena Macaas.

²⁴ Cinj kaaga, den fop a nqeɗa yee: «O Yaal oxe, wo fee andna a qeeñ ake no wiin we fop, lali a in o leng oxe jiloona no ɗik weeke,

²⁵ ndax ta rondand a Yudaa na seek um ale refna calel apootar kene ta xaƴna, soo a xaad me ta jegeena.»

²⁶ A mbanjanga, too a yena took Macaas fee fokat’ateena no apootar xarɓaxay fo apootar o leng oxaa.