A paɗax ale 2 - NQAARIIT NE ROOG

Sadax tuufe-duufe ke

¹ «Boo o kiin a bugna o ɓisiid o Yaal oxe sadax tuufe-duufe nen ci’it, fat a waaƭ mbiɗel, a yoonandtin diwliin fa cuuraay.

² Fat a ɓisiidin saasadax we, ndefna xa ƥiy Aaroon. Fat o saasadax oxe a naq o ɓay o leng no mbiɗel ke, a jaxasin fa diwliin fee fa cuuraay fee fop, a dox keene took o sadaxand ole nen betandoor. Keene xan a ref sadax faa felna tuñ bo no Yaal oxe.

³ Ke na yoqkaa na sadax fee, Aaroon fo xa ƥeem na njegkan. Sadax feene ɓoxoteena o Yaal oxe koy, xan a ref sadax fa tedu tigi.

⁴ Boo o sadaxtaa kaa juɗeena, fat a ref mbiɗel, ta ref xa kaf axaa njanja’eena, a njaxastel diwliin mbaat xa puudu xaa njanja’eena, a sulel diwliin.

⁵ Boo sadax of a refna o gaf olaa saafeena, fat a ref mbiɗel kaa mbosolteena diwliin too baa njeg poɗaxnir.

⁶ Fat o xaptin teɓ-reɓ soo yip diwliin took fee. Keene xan a ref sadax faa hatna no tuufe-duufe ke.

⁷ Boo sadax of a refna o gaf olaa jaweena, fat a ref mbiɗel kaa mbosolteena diwliin.

⁸ Fuu ta refna no sadax keene, fat o ɓisiidin, ta cooxel o saasadax oxe, ta ɓoxotin took o sadaxand ole.

⁹ Fat o saasadax oxe a xot teen ke wareena o sadaxit nen betandoor soo a doxin took o sadaxand ole. Keene xan a ref sadax faa felna tuñ bo no Yaal oxe.

¹⁰ Ke na yoqkaa na sadax feene ɓoxoteena o Yaal oxe koy, Aaroon fo xa ƥeem na njegkan, tig tedu tigi yoo.

¹¹ Sadax fa leng faa kesaneena o Yaal oxe waree o jeg poɗaxnir, yaam nu mbaree o ƥoxot dara kaa saqna poɗaxnir mbaat suum ndeer sadax ke na ndoxaneel o Yaal oxe.

¹² Nu mbaaga o yoonandit a den fo ke nu ƥoxotaa o Yaal oxe no ke eeteena o saxad no duufe le. Kaa koy, baa ndoxel took o sadaxand ole nen sadax faa felna tuñ.

¹³ Fat o yip fo jem took sadax nduufe-duufe nuu refna. Ba o ñakin o jemaƭ muk, yaam fo jem ole kaa ref o anddiloor ole no ngiɓoor ne a ndeer of fa Roog. Ten taxu fat o yip teen fo jem.

¹⁴ Boo o ɓisiidaa o Yaal oxe sadax no ke eetoona o saxad no duufe of, fat o ɓoxot xa yaƥ xa qas axaa njuɗeena na fiɗel soo a ndaƈtel boo a mok, ta ref nen sadax no ke eetoona o saxad.

¹⁵ Fat o yip teen diwliin soo ɓaat teen cuuraay, ta ref sadax tuufe-duufe.

¹⁶ Fat o saasadax oxe a dox a qaaj ale ne’eena betandoor, refna ref a qaaj ale no pep ke mokandeena fo ale na diwliin fee, a yoonandtin cuuraay fee fop, ta ref nen sadax fa mbetandoor. Keene xan a ref sadax faa doxaneena o Yaal oxe.»