Amos 6 - NQAARIIT NE ROOG

Ndaɗand mbooreer

¹ «Ndaw sabab took nuun, nuun we na ñoowaa no yaadax kam Siyoŋ, nuun we mboogna yee o joong ole Samari ngenand mbooru yoo. Kaa nu mbi’oox a salma-koor kam saax le adooxanna qeet ke, bo tee mbind Isra’el sax nuun a mbi’u yaakaar.

² Xar yaqanu nu ƥer boo Kalne, nga’an a qoox nuun, suur boo Hamat, yaal gon le, mbudoortiid Gaat, ndeer no Fiifilista we: Ndax teeru keene moƴu o naat maat ke nuun? Ndax xa saawit den moƴu o yaaj axe nuun?

³ Nu mbugee nan kaa farna no ñaal ne o njakad a fudooxankaa a nuun boo ƈut, soo mbi’aa kaa na qicaa took nuun maat yednu.

⁴ Kaa nu ndeɓaa o ndalaq no cong mosandte a ñiiñ fa ñiig, a kakandax a ndeer a nuun, nu yablooraa a suk a neeru fo a tegeƴ ƥuj kude.

⁵ Kaa nu ngimaa, yoonandtin o nqilimb, mbi’in boo mbodandooraa a Dawid, tee kaa nu mberaa a kim,

⁶ yeraa a qaf biiñ a podu ne sabab, ndaxaɓooxaa goonga fee moƴna o fel, too o liir nuun o leng jaaɓee a koom alaa mbind Yoseef a gefna boo tuƈ.

⁷ Ten taxu nuun na eetkaa o ndefik faɗ, o neq nuun a mooc boo faw.»

Xan Samari a gefel

⁸ Mi o Yaal oxe na refkaa boo faw, ref Roog fee Hupna fop, mexe daaɓoortaa a xoox es ee: «A magnandax ale Yakoob a feƭaraxam lool, too bugiim o doon a ngid pind ke saŋe a yetooxaa o mosel den. Ten taxu xam fi wiin jan a ngar, a njaɓ saax le fo ke refna teen fop.

⁹ A koom no mbind nuu wiin xarɓaxay a yoqna yaam a saŋ, xan a nqonit maaga.

¹⁰ Yaa o kiin a ɓiskaa o dal no pog um, a gasin, xan a gat, a laamit ee: ‹Nam koy?› O kiin a doonin ee: ‹Naagi meek waay! Mbind ne fop a mbadatinooxa. Yoqatee meeke oxaa na ne’aa gon le no Yaal oxe.›

¹¹ O Yaal oxe xaa layaa o ɗelem o leng, mbind maak nuu refna a gefel, pind teɓ ke a nduguñel.»

Felakinooxan cegeer

¹² «Ndax pis a naaga ƴufneel kam a ƥil? Ndax o kiin a mosa o humin naak a xooxik o maag? Ten nu mbi’u toox de, yaam kaa nu tax gon o cofel a sibel, a pi o cofel nu mbi’in xa tim ndali.

¹³ Kaa nu mbelakinooxan cegeer, soo layaa yee: ‹Ke i njegna, ndax kaa i ndaawtiran no onj in fa doole in?›

¹⁴ Ten taxu, keeke layum, mi o Yaal oxe Roog fee Hupna fop: ‹Xam in xeet ta songiid a nuun, nuun mbind Isra’el, too xan a toroxand a nuun, a xotit no ndokand naa Hamat farna fo ɓemb-roog o janoon, boo na xur faa na koƥ-a-ƥor alaa Araba farna fo ɓemb-roog o ñamaak.› »