Amos 5 - NQAARIIT NE ROOG

A kim a ƭomatax

¹ «Nuun mbind Isra’el, nan-gilooxyo a ƭomatax es took nuun.

² Wo Isra’el o ndoog onqe, woxe bup too o leng inkatirang, ɗaasoox a lanq, too inooxkatiro muk.»

³ Keeke o Yaal oxe na refkaa boo faw a layu: «A ndeer Isra’el boo Isra’el a xet, saax le a salma-koor juni a sutooroogna, teemeed soom na ndefkataa taaga, le teemeed a sutooroogna, xarɓaxay rek a ndefat taaga.»

Nomtooxi no Yaal of!

⁴ Keeke o Yaal oxe a layu mbind Isra’el: «Me mi nu mbaru o ngar, nu mbugangaa o ñoow.

⁵ Ba nu ndet Betel, kaam ee, ba nu ndet boo Gilgal, too nu ndeyee ƈaktooxaa Beer-Seeba, yaam we Gilgal xan a ndefik faɗ, we Betel a nduguñel.

⁶ Ngaryo me no Yaal oxe, nu mbugangaa o ñoow! Nu mbi’angiran, xan a raaɓ mbind Yoseef, too o leng oxaa ñufuuna jegkee Betel.

⁷ Kaa nu naɗ o cofel ole boo ta refat xa tim ndali, ngeleeroox ndakan.

⁸ An saku xa Kulook axe fo Ndaalaand ne? Kaam ee, an saku xa qoor axeene? An na suttaa mbeet no niɓaan, ñaal ta dugandtin o yeng, a fokat poofi ke no maag ole, soo a picit a den took lanq ke? Mee ndax ten ne’e o Yaal oxe!

⁹ Ten na jiƭtaa we saxna a paƴ, a saŋkax a ɓood boo no duf le no saŋe ke.

¹⁰ Andaam koy ee nu mbugee oxaa lalna a nuun njofaƭar nuun, ne’atiim oxaa na doonaa nqol no ndigil ne yaa fo nqeloor.

¹¹ Kaa nu ndak o toroxu xe suur, njang ñaamel ke ta yaakaar’ina. Ten taxu nuun wey maxaa pind saƭku, ndaa nu ngenkee teen. A ƭing taxar biiñ ake nu njimbna a neqa lool itam, ndaa ndefkee muud nuun,

¹² yaam ga’aam paaxeer ke nu mbi’aa, na nqayaa ndetaa. Kaa nu ñagadilaa jofu we, ngindaa neexil, o ndool onqe nu nqañtin ɓur yaa fo nqeloor yaam o neew doole um.

¹³ Ten taxu, oxuu jegna yiif xan a geekoox, yaam jamaane fee felee.

¹⁴ Naaɓyo paax, paaxeer nu ƈufin! Nu mbi’angaan, xan nu ñoow, too o Yaal oxe Roog fee Hupna fop xan a ref fa nuun, ne nu mboogtuuna.

¹⁵ Kaam ee, nu sib paaxeer, mbex paax, ñaaƴin o cofel no xeloorand ole. Yaaga o Yaal oxe Roog fee Hupna fop a waaga yirimkaa a nuun, nuun yoqatin we no mbind Yoseef.»

¹⁶ Ten taxu, keeke o Yaal oxe Roog fee Hupna fop refna o Yaal es a layu: «Xan xa paɗax a njibit muu refna, a coytax a refat simnir. Xan o qooxoox sax a xurel, a geƈ helaar um, a xaaraandik, we a coytax a refna calel den a simel xa paɗax.

¹⁷ A koom alaa um xaañkaa a ndeer nuun, xan xa paɗax a njibit no qol oluu refna.» O Yaal oxe layun.

Bes fee no Yaal oxe

¹⁸ Ndaw sabab took nuun, nuun we na tayaa bes fee no Yaal oxe! Xar nu cungtan, ye ta refeerna bes a qoolaand, ndax a ref bes o niɓaan?

¹⁹ A koom nu nand fo koor oxaa na ƴufaa njogoy, a xet fo ursu, a rok no mbind um, a geƈnoox no tabax, a ñootnooxaa, a baloor a ŋatin.

²⁰ Ne laytanuuma a nuun, bes fee no Yaal oxe, bes o niɓaan a refkaa, jegkee a qoolaand a leng.

A paɗax kasaara

²¹ «Jegee dara kaa felaxama no toofeen ke nu mbi’anaxam, o xetand nuun a wataam xus nen ƈaq.

²² Dara feliraam no sadax toxel ke fo no sadax tuufe-duufe ke nu ƥoxotaxam, xeeñ es a sib cegel ke nu nqirsaa, tee kaa nu sadaxtaa.

²³ Ndiƈatooxaamoo fo a kim ake nu ndoxanaxam! Bugatiim o nan a qiin ake nuun nu mbakaa, tee kaa nu simataxam.

²⁴ Ke buguuma refu a ƭat ale na xayaa nen a ƈufnand, o cofel ole na ɓunaa nen xur fa ŋiiskeer.

²⁵ Nuun mbind Isra’el, ndax nu ƥoxot’axam sadax na xa kiid qarɓeen nahik axe nu ndeeƭna na koƥ-a-ƥor ale?

²⁶ Kaa koy, kaa nu ndoxondoox’u o daaƴ ole no maad nuun Sakuut nu mbi’na roog nuun, tapin fa Kewan, o xoor ole nu mbaɗooxaa.

²⁷ Ten taxu xam fi nu ƥisel took o hup doole kaltaa Damaas.» Keene mat o Yaal oxe gon um a refna Roog fee Hupna fop a layu.